Iminsi irabaze: Amatakirangoyi ya FDLR nyuma y’imvugo za Cardinal Ambongo na Muzito

Yanditswe na Rabbi Malo Umucunguzi
Kuya 14 Mutarama 2020 saa 10:35
Yasuwe :
0 0

Umutwe w’abarwanyi wa FDLR umaze igihe ukora ibikorwa by’iterabwoba mu Burasirazuba bwa Repubulika Iharanira Demokarasi ya Congo, wuririye ku mvugo z’Abanye-Congo bavuga ko hari ibihugu bishaka kwigarurira uburasirazuba bwayo.

Uyu mutwe w’abarwanyi washinzwe n’abiganjemo abagize uruhare muri Jenoside yakorewe Abatutsi mu 1994, ariko ihagaritswe bayabangira ingata bahungira muri Repubulika Iharanira Demokarasi ya Congo, ari naho bamaze imyaka igera kuri 25 bakora ibikorwa birimo kwica abasivili, gufata ku ngufu, gushimuta n’ibindi.

Mu gihe Ingabo za FARDC zikomeje kugaba ibitero ku mitwe yitwaje intwaro ikorera mu Burasirazuba bw’icyo gihugu, FDLR kuri uyu wa Mbere yasohoye itangazo, ivuga ko yamagana ubufatanye bw’u Rwanda na RDC mu “kwica impunzi z’Abanyarwanda mu Burasirazuba bwa Repubulika ya Demokarasi ya Congo.”

Wakomoje ku mvugo yo kwigabanya uburasirazuba bwa RDC cyangwa “balkanization”, iheruka kugarukwaho n’abarimo Arkiyepiskopi wa Kinshasa, Cardinal Fridolin Ambongo na Adolphe Muzito wabaye Minisitiri w’Intebe wa RDC, ubu ni umuvugizi w’ihuriro Lamuka.

Cardinal Ambongo mu mpera z’ukwezi gushize yavuze ko ubuyobozi bwa Congo bukwiye kumvisha ibihugu baturanye by’u Rwanda, u Burundi na Uganda, guhagarika kwinjiza abaturage babyo ku butaka bw’Uburasirazuba bwa RDC, ko hari umugambi wo kwigabanya igice cy’uburasirazuba bwa Congo .

Yavuze ko Abanyarwanda cyangwa Abanya-Uganda bamaze imyaka myinshi muri RDC “nta washidikanya ku bwenegihugu bwabo bwa Congo, ariko igiteye inkeke ni abakomeje kwiyongerayo, kandi tukanaha umwanya wo guhita nk’Abanye-Congo.”

Yabivuze mu rugendo aheruka kugirira mu gace ka Beni na Butembo muri Kivu y’Amajyaruguru, kabarizwamo ibikorwa bitandukanye by’imitwe yitwaje intwaro irimo abarwanyi ba Allied Democratic Forces (ADF) bakomoka muri Uganda, FDLR n’inyeshyamba z’Abarundi za National Liberation Forces (FNL), asaba abaturage gufatanya n’igisirikare mu kurwanya iyo mitwe.

Mu Ukuboza umwaka ushize nabwo Muzito yabwiye abanyamakuru ko kugira ngo igihugu cye gitekane, gikwiye gutera u Rwanda ndetse kikarwiyomekaho, kugira ngo kirangize ikibazo kimaze imyaka isaga 20 mu Burasirazuba bwa RDC.

Ni imvugo FDLR yuririyeho

Mu gihe FARDC ikomeje ibitero simusiga ku mitwe yitwaje intwaro, mu itangazo FDLR yatakaje abarwanyi benshi muri ibyo bikorwa yasohoye kuri uyu wa Mbere, yavuze ko ibirimo kuba ku mpunzi z’abanyarwanda muri RDC, bihura n’umugambi wa “guverinoma y’u Rwanda wo kwigarurira RDC rwakomeje kurota kuva mu 1990.”

FDLR ntiyorohewe na FARDC muri iyi minsi kuko umwaka ushize wasize intimba mu barwanyi bawo, kuva ubwo Nsekanabo Jean Pierre uzwi nka Lt.Col Abega Kamara wari ushinzwe iperereza muri FDLR na La Forge Fils Bazeye wari umuvugizi wa FDLR, bafatirwaga ku mupaka wa Bunagana mu Ukuboza 2018 bavuye muri Uganda mu nama yahuje abahagarariye RNC na FDLR.

Ubu bari imbere y’inkiko mu Rwanda baregwa kuba mu mutwe w’iterabwoba wa FDLR, kugira uruhare mu bikorwa bya FDLR, kugambana no gushishikariza abandi gukora ibikorwa by’iterabwoba, kugirana umubano na leta y’amahanga bigamije gushoza intambara, icengezamatwara ryo kwangisha leta y’u Rwanda mu mahanga no kurema umutwe w’ingabo utemewe.

Ntibyateye kabiri, Gen Mudacumura Sylvestre wari umuyobozi w’ibikorwa bya gisirikare by’uyu mutwe yarishwe, ndetse n’abamurindaga bafatwa mpiri.

Umunyamabanga wa Leta muri Minisiteri y’Ububanyi n’amahanga, Amb Olivier Nduhungirehe, yavuze ko abari basigaye kuririra kuri bene izi mvugo z’abanyapolitiki n’abanyamadini bari mu nshingano zitari izabo, ari “FDLR yateje umutekano muke mu Burasirazuba bwa RDC kuva mu 1994.

Yakomeje ati “Ariko kubera FARDC, iminsi ya FDLR irabaze.”

Perezida Tshisekedi yahuye na Cardinal Ambogo

Perezidansi ya RDC, kuri uyu wa Mbere yatangaje binyuze kuri Twitter ko Perezida Felix Tshisekedi yakiriye mu biro bye Cardinal Fridolin Ambongo Besungu.

Yakomeje ivuga ko “ibiganiro byibanze ku ruzinduko rwe mu Burasirazuba no ku ruzinduko ruri imbere rwa Perezida i Vatican.”

Ntibyatangajwe niba ikibazo yazamuye cy’umugambi wo kwigabanya uburasirazuba bwa RDC cyaraganiriweho, gusa birashoboka bitewe n’uko yakivuze ari muri uru ruzinduko rwari mu bigomba kuganirwaho hagati y’abayobozi bombi.

Mu bitekerezo byagiye bitangwa kuri Twitter, abaturage batinze ku kuvuga ko bizeye ko yamubajije kuri uwo mugambi.

Mu kiganiro aheruka kugirana n’abanyamakuru, Minisitiri w’Ububanyi n’Amahanga, Dr Vincent Biruta, yabajijwe ku mvugo y’abanyapolitiki bo muri RDC ko igihugu cyabo kidashobora kubona amahoro “tudateye u Rwanda, byaba ngombwa tukarufata,” nk’uko byavuzwe na Adolphe Muzito wigeze kuba Minisitiri w’Intebe wa RDC.

Dr Biruta yavuze ko imvugo z’abanyapolitiki bamwe bo muri RDC ku Rwanda zibabaje kuko ahanini n’ibyo bavuga ari ibintu biba bidafite inshingiro.

Ati “Ni ibintu bibabaje, wakwiteguye ko ibyo bavuga biba bifite icyo bafite bashingiraho gifatika ariko nta gihari. Ntabwo ari ubwa mbere bene ibi bibazo bibaho, hashize igihe hari abanyapolitiki bo muri RDC bumva ko kugira ngo abaturage babo babemere ari uko bavuga nabi u Rwanda.”

Biruta yavuze ko ibyavuzwe n’aba banyapolitiki ndetse na bamwe mu bo muri Kiliziya Gatolika bidashobora guhungabanya umutekano w’u Rwanda na RDC.

Ati “Bavuge ibyo babonye, biriya ntabwo bizabura kandi n’igihe kizerekana ko ntaho byari bishingiye.”

Minisitiri Dr Biruta yashimye uruhare rw’ubuyobozi bwa RDC mu guhashya imitwe yitwaje intwaro ibarizwa mu Burasirazuba bwa RDC irimo na bamwe mu bagize uruhare muri Jenoside yakorewe Abatutsi.

Yavuze ko u Rwanda rumaze kwakira abantu 1919 bari mu mashyamba ya Congo aho ingabo za RDC zagabye ibitero ku mitwe yitwaje intwaro. Abo batahutse hacumbikiwe mu nkambi ya Nyarushishi.

Abarwanyi 562 nabo bagaruwe mu Rwanda, aho ubu bari kwigishwa kugira ngo babe basubira mu buzima busanzwe.

Ati “Ingabo za RDC zakoze ibikorwa byiza, zishe benshi muri abo harimo n’abayobozi b’utwo dutsiko.”

U Rwanda na RDC bifitanye umubano mwiza cyane cyane nyuma y’aho Felix Tshisekedi atorewe kuyobora icyo gihugu, akavuga ko arajwe ishinga no kubana neza n’ibihugu by’ibituranyi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza

Article (128803) Re-process this page