Iminsi 12 irirenze Bosco Ntaganda yiyicisha inzara muri gereza ya ICC

Yanditswe na Philbert Girinema
Kuya 19 Nzeri 2016 saa 07:15
Yasuwe :
0 0

Bosco Ntaganda wahoze ayobora umutwe w’inyeshyamba muri Repubulika Iharanira Demokarasi ya Congo, amaze iminsi 12 yiyicisha inzara muri gereza mu buryo bwo kwigaragambya yinubira uburyo afunzwemo.

Kuva kuwa 7 Nzeri uyu mwaka nibwo Ntaganda yatangiye kwiyicisha inzara ari nako yanga kugaragara mu cyumba cy’iburanisha cy’Urukiko Mpuzamahanga Mpanabyaha ICC avuga ko ubuzima bwe butameze neza.

Ntaganda yahagaritse kurya nyuma yo kutishimira ikumirwa ku kuvugira kuri telefoni no kwamburwa uburenganzira bwo gusurwa, ibintu byatangiye mu mwaka wa 2014 ubwo byavugwaga ko ashobora kuba yagirana imikoranire n’abatangabuhamya bikaba byahutaza imigendekere myiza y’urubanza.

Ibi byatumye atangaza ko yatakaje icyizere kuko atagishoboye kubona umugore we n’abana be nkuko bisanzwe, yanongeyeho ko ariyo mpamvu yiteguye no gupfa.

Ibiro Ntaramakuru by’Abafaransa, AFP, byatangaje ko umwunganizi we mu by’amategeko Stephane Bourgon yavuze ko ubutabera barimo guhabwa buhabanye n’ubwo bari biteze ku rukiko mpuzamahanga mpanabyaha.

Yagize ati “Ni ryari ibi bishobora kuzarangira, ubu nibwo butabera dushaka mu rukiko mpuzamahanga mpanabyaha? Ntabwo dukwiye kwirengagiza ko uregwa atari mu rukiko kuko ubuzima bwe buri mu kaga.”

Kuri uyu wa Mbere umucamanza Robert Fremr yavuze ko umuganga yamubwiye ko Ntaganda agaragaza umunaniro ariko nta kimenyetso cy’uburwayi afite yaba ku mubiri cyangwa mu mutwe, ategeka ko ari muzima bityo agomba kujya kuburana.

Ntaganda niwe wa mbere mu baburanishijwe na ICC ukoze imyigaragambyo yo kwiyicisha inzara. ICC yavuze ko azitabwaho n’abaganga ariko nta mpamvu n’imwe yo kumuhatira kurya.

Urubanza rwa Ntaganda rwatangiye kuburanishwa mu mizi umwaka ushize nyuma y’uko afatiwe muri Ambasade ya Leta Zunze Ubumwe mu Rwanda mu 2013.

Ntaganda ahakana ibyaha 13 aregwa, birimo iby’ intambara n’ibyibasiye inyokomuntu ashinjwa ko yakoze hagati y’umwaka 2002 na 2003 mu Karere ka Ituri, mu Burasirazuba bwa Repubulika Iharanira Demokarasi ya Congo, ubwo yari ayoboye igisirikare cya UPC (Union des Patriotes Congolais).

Bosco Ntaganda amaze iminsi 12 yiyicisha inzara aho afungiye muri gereza ya ICC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza