Imijyi yunganira Kigali igiye kuzajya yakira inama mpuzamahanga zikomeye

Yanditswe na Ndayishimye Jean Claude
Kuya 11 Gicurasi 2018 saa 02:35
Yasuwe :
1 0

Mu gihe u Rwanda rukomeje kuza ku isonga mu bihugu byakira inama nyinshi muri Afurika, Ikigo cy’Igihugu cy’Iterambere (RDB) gitangaza ko hari gutekerezwa uburyo inama nini zajya zoherezwa mu mijyi yunganira Kigali.

Umuyobozi Mukuru ushinzwe Ibikorwa muri RDB, Emmanuel Hategeka, yabibwiye itangazamakuru ku wa Gatatu nyuma yo kuganira na Komisiyo y’Ingengo y’Imari n’Umutungo by’Igihugu ku mbanzirizamushinga y’ingengo y’imari iki kigo kizakoresha umwaka utaha.

Yavuze ko muri gahunda y’ubukerarugendo bushingiye ku nama, imijyi yunganira Kigali imaze kugira ibikorwaremezo bihagije na yo izajya izakira nubwo atatangaje igihe bizatangira gushyirwa mu bikorwa.

Yagize ati “Inama zinjira mu gihugu ni byiza ko dushobora no kuzigeza mu mijyi yunganira Kigali ariko bisaba ko haba ibikorwaremezo, bisaba ko haba hari amahoteli ashobora kwakira abo bantu, bisaba imyiteguro.”

Yatanze urugero rw’imijyi imaze kugira ibikorwaremezo ku buryo nta kabuza yabasha kwakira izo nama. Iyo ni nka Nyagatare ifite Epic Hotel, Umujyi wa Musanze ufite ibikorwaremezo bihagije, Umujyi wa Rubavu n’iyindi.

Hategeka yakomeje agira ati “Uko rero ibikorwaremezo bigenda bigaragara muri iyi mijyi yunganira Kigali ni ko n’inama bizoroha kugira ngo tuzoherezeyo.”

U Rwanda ruri ku mwanya wa gatatu muri Afurika nka hamwe mu hantu hakunzwe n’abategura inama mpuzamahanga.

Uyu mwanya rwawushyizweho n’Ishyirahamwe Mpuzamahanga rishinzwe ibyo gutegura Inama zikomeye (ICCA) ku rutonde ryasohoye kuri uyu wa Mbere.

Iyi Raporo yashyize u Rwanda kuri uyu mwanya yibanze ku nama mpuzamahanga zizwi zabereye mu Rwanda by’umwihariko iziba mu gihe runaka (inshuro imwe cyangwa ebyiri mu mwaka) zikitabirwa n’abantu basaga 50.

Mu nama nk’izo u Rwanda rwagiye rwakira harimo nk’Inama Nyafurika mu bushakashatsi n’amahugurwa ku ndwara ya Kanseri, Inama y’Ubutegetsi y’Ikigega Global Fund, Inama y’Ishyirahamwe rya Afurika ryita ku Bukerarugendo (ATA), Inama rusange y’Ishyirahamwe rya Sosiyete zitwara abantu mu ndege muri Afurika (AFRAA) n’izindi.

Umwaka ushize u Rwanda rwakiriye abashyitsi 28 308 bitabiriye inama bavuye ku 23 804 mu mwaka wa 2016.

Leta yafashe icyemezo ko imijyi itandatu yunganira Kigali igomba guhabwa ubuyobozi bwihariye butandukanye n’ubw’uturere iherereyemo hagamijwe kunoza uburyo iyobowe, nka bumwe mu buryo buzatuma irushaho kuzamura urwego rwayo.

Guverinoma yiyemeje ko mu cyerekezo 2020 Abanyarwanda 35% bazaba batuye mu mijyi kandi batuye neza na ho abagera kuri 80% bakazaba batuye mu midugudu, ikaba ari na yo mpamvu yiyemeje kongerera imbaraga imijyi ya Huye, Muhanga, Musanze, Nyagatare, Rubavu na Rusizi.

Ubukerarugendo bushingiye ku nama bwinjirije u Rwanda miliyoni z’amadolari 42 mu mwaka wa 2017; uyu mwaka hitezwe miliyoni z’amadolari 74.

Umuyobozi Mukuru ushinzwe Ibikorwa mu Kigo cy’Igihugu cy’Iterambere (RDB), Emmanuel Hategeka, yavuze ko imijyi yunganira Kigali imaze kugira ibikorwaremezo bihagije izajya yakira inama mpuzamahanga
Umujyi wa Muhanga uri mu yunganira Kigali ukataje mu iterambere
Musanze imaze kwiganzamo ibikorwaremezo bishobora kuyemerera kwakira inama mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza