00:00:00 IGIHE NETWORK KN KINYARWANDA EN ENGLISH FR FRANCAIS

Imigendekere y’urugamba rw’inkundura rwagejeje RDF ku kwigarurira Mocímboa da Praia muri Mozambique

Yanditswe na Philbert Girinema
Kuya 8 Kanama 2021 saa 05:54
Yasuwe :
0 0

Nyuma y’urugamba rutoroshye, Ingabo z’u Rwanda zigaruriye agace ka Mocímboa da Praia, kafatwaga nk’icyicaro gikuru cy’imitwe y’iterabwoba.

Aka gace kari kamaze imyaka itanu kari mu maboko y’inyeshyamba zivuga ko zigendera ku matwara y’Idini ya Islam, RDF yakigaruriye mu rugamba rutoroshye, rubura nibura iminsi ibiri ngo rwuzuze ukwezi kuko rwatangiye ku wa 10 Nyakanga 2021.

Urugamba rwagejeje kuri iyi ntsinzi rwasojwe saa Mbili z’igitondo kuri iki Cyumweru tariki ya 8 Kanama 2021.

Kuri iyo saha ni bwo Ingabo z’u Rwanda ziturutse ahitwa Mueda mu Majyaruguru hafi ya Tanzania hamwe n’iziturutse Palma mu Majyepfo zose zahuriye Mocímboa da Praia, Umujyi wa Cabo Delgado.

Ni yo ntego zari zihaye na mbere ko Mocímboa da Praia izafatwa ziturutse muri ibyo byerekezo.

Ibikorwaremezo Ingabo z’u Rwanda zihutiye gufata ni Ikibuga gito cy’Indege hamwe n’icyambu gikomeye cyo muri aka gace.

IGIHE yabonye abasirikare ba Mozambique bari kubyina indirimbo z’umuhanzi Jah Prayzah uri mu bagezweho muri iki gihugu, bishimira intsinzi yo kuba uyu mujyi usubiye mu maboko ya leta.

Ingabo z’u Rwanda zahise zishyikiriza iza Mozambique ibikorwa birimo icyambu cyo muri ako gace, ubu kiri kugenzurwa n’Umutwe w’Ingabo za Mozambique zirwanira mu mazi.

Saa Cyenda zo mu rukerera ni bwo Ingabo z’u Rwanda zari zitangiye kwisuganya kugira ngo zinjire muri uyu mujyi. Nta mirwano ihambaye yabaye, ahubwo kuva ku munsi w’ejo zakwica abarwanyi bane, abandi bari hafi aho bahise bakwira imishwaro.

Ubu Mocímboa de Praia hari abasirikare benshi b’u Rwanda, inguni yose wakatamo urababona, bafite akanyamuneza ku maso.

Ugana muri aka gace, aho imirwano yabereye ku munsi w’ejo ni mu bilometero bitandatu. Imirambo y’abarwanyi bishwe iracyari mu muhanda, bigaragara ko ari abantu bakuru bari mu myaka 40.

Umuyobozi w’Ingabo z’u Rwanda ziri muri Mozambique, Brig Gen Muhizi Pascal, yatangarije IGIHE ko ikintu cy’ingenzi cyari ugukura umwanzi muri aka gace hanyuma hagakurikiraho kumuhiga aho aherereye.

Ati "Aha niho Mocímboa District, ni cyo cyari icyicaro cy’umwanzi, niho yari afite ubuyobozi, niho yari yarigaruriye. Ibyo yakoraga byose agaba ibitero ni aha yagarukaga ku birindiro bye. Ni umujyi yari yarabohoje abamo igihe kirekire kirenga imyaka itanu. "

Iyi Mocímboa ubusanzwe yari nk’icyicaro gikuru cy’akarere ariko ubu nta kintu na kimwe kikiyirangwamo, hose hahindutse amatongo.

Ku rundi ruhande, mu bikorwa inyeshyamba zari zarigaruriye, harimo igifaru zambuye Ingabo za Leta. Icyo gihe zazishe ziziciye imitwe hanyuma zikwira imishwaro. Ubu nacyo cyashyizwe mu maboko y’Ingabo za Mozambique.

Commander Oscar A. Lucas, ni Umusirikare Mukuru mu Ngabo za Mozambique. Ni we wari witabiriye igikorwa cyo gushyikirizwa icyambu.

Ni icyambu gifatwa nk’inzira ikomeye y’ibicuruzwa nk’uko twumva Mombasa muri Kenya cyangwa Dar es Salaam muri Tanzania.

Lucas yagize ati "Mbere na mbere nababwira ko ari icyambu cy’ingenzi kuri Mozambique. Ikindi kandi aha ni amarembo y’umwanzi uhungabanya abaturage bacu [...] Gufata iki cyambu ni ingenzi cyane kuri Guverinoma ya Mozambique no ku Banya-Mozambique bose."

Commander Lucas yavuze Ingabo z’u Rwanda n’iza Mozambique ari "abavandimwe" bityo byo ubwabyo bisobanura ubu bufatanye.

Ati "Ikintu cya mbere ni uko turi abavandimwe, umusanzu w’Ingabo z’u Rwanda ni ingenzi cyane, ni wo utumye turi hano. Dufashe uyu mwanya kugira ngo dushimire Abanyarwanda."

Mu bice byose bigana Mocímboa de Praia, nta na hamwe hatuwe. Ni mu gihe ari ahantu harehare, nibura hangana no kuva i Kigali ujya i Musanze.

Mu nzira igana mu gace ka Mocimboa da Praia, Ingabo z'u Rwanda zahagabye ibirindiro mu mashyamba ahari. Iyo uhanyuze, ubona amahema zikoresha
Iki cyambu cyari kimaze imyaka itanu kiri mu maboko y'inyeshyamba
Nyuma yo gufata Mocímboa da Praia muri Mozambique, ingabo z'u Rwanda zahakajije umutekano
Ibiro by'inzego z'ibanze mu Ntara ya Cabo Delgado byabohojwe nyuma y'igihe kinini biri mu maboko y'inyeshyamba
Iki cyambu cyari kimaze imyaka itanu kidakoreshwa kiri mu maboko y'imitwe y'iterabwoba
Gifite akamaro gakomeye ku bukungu bwa Mozambique kuko kiyihuza na Tanzania
Brig Gen Pascal Muhizi uyoboye Ingabo z’u Rwanda ziri muri Mozambique aganira na Commander Oscar A. Lucas, Umusirikare Mukuru mu Ngabo za Mozambique zirwanira mu mazi
Iki kibuga cy'Indege ni kinini kandi nubwo cyarengewe n'ibihuru, kiramutse cyitaweho cyatanga umusaruro
Mu Mujyi wa Mocimboa da Praia, ibikorwa remezo birimo na za sitasiyo za lisansi byarangiritse ku buryo bukomeye
Muri uyu muhanda ugana ku cyambu cya Mocimboa da Praia nta n'inyoni iba itambamo
Akanyamuneza kari kose ku maso y'Ingabo za Mozambique ubwo zari zimaze kugaruka muri aka gace zaherukagamo kera
Ingabo z'u Rwanda zashimiwe umusanzu ukomeye zatanze muri uru rugamba rwo kurwanya imitwe y'iterabwoba
Ubwo iki cyambu cyari kimaze gushyirwa mu maboko y'ingabo za leta, iz'u Rwanda zahise zikomeza urugendo zijya guhiga abarwanyi aho birukankiye
Ingabo za Mozambique zatangiye kugenzura icyambu

Amafoto na Video: Philbert Girinema / Mozambique - Cabo Delgado


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .