Imibiri irenga 500 y’abazize jenoside yabonetse mu kigo cya gisirikare yashyinguwe mu cyubahiro

Yanditswe na Thamimu Hakizimana
Kuya 5 Ukwakira 2017 saa 05:02
Yasuwe :
0 0

Abaturage bo mu Karere ka Kicukiro bashyinguye mu cyubahiro imibiri 547 y’inzirakarengane zazize Jenoside yakorewe Abatutsi mu 1994 yabonetse mu kigo cya gisirikare cya Kanombe ahitwa muri “Champ de Tir ”.

Kuri uyu wa Kane tariki ya 5 Ukwakira 2017, ni bwo iyi mibiri yiganjemo abana n’abagore bari butuye mu bice bitandukanye by’Akarere ka Kicukiro, yashyinguwe mu cyubahiro mu Rwibutso rwa Jenoside rwa Nyanza.

Iyi mibiri yabonetse biturutse ku modoka yayiguyeho ikora umuhanda ku kigo cya gisirikare i Kanombe.

Umuyobozi wungirije wa Ibuka, Nkuranga Egide, yasabye abaturage bazi ahaba hari imibiri y’abishwe muri jenoside gutanga amakuru igashyingurwa mu cyubahiro.

Yagize ati “Ndangira ngo nsabe abantu baba bazi ibindi byobo cyangwa ahantu bacu bari, bo kunangira imitima kuko hashize imyaka 23, bajya banatubwira aho imibiri yabo iri kuko si ngombwa ko banigaragaza ariko nibura tukagira icyo dukuramo kuko iyo tubonye abacu tukabashyingura mu cyubahiro biradufasha."

Kubera igihe kinini cyari gishize, iyi mibiri yashyinguwe ntawabashije kumenya niba harimo uwe.

Uretse ibyo gutanga amakuru, Umunyambanga Nshingwabikorwa wa Komisiyo y’Igihugu ishinzwe kurwanya Jenoside (CNLG), Dr. Bizimana Jean Damascene, we yasabye inzego z’ibanze kurangiza imanza z’abangije imitungo y’abarokotse Jenoside.

Yagize ati "Ikibazo cyirebana n’imitungo no kurangiza ibihano muri rusange ni ngombwa ko abantu bose baburanishijwe bagahamwa n’icyaha barangiza ibihano kubera ko babanje bahabwa igihe cyo kuyiyishyura. Rero bagomba kuyishyura rwose kandi Leta nayo yashyizemo imbaraga kandi izakomeza inazishyiremo kugira ngo abahamwe n’iki cyaha bakurikize uko ibihano bimeze.”

Yakomeje anavuga ko umunsi nk’uyu wo gushyingura imibiri y’abazize Jenoside yakorewe Abatutsi mu 1994 ari n’umwanya mwiza wo kwamagana abanyamahanga bayipfobya n’abafite imikorere nk’iyo.

Urwibutso rwa Nyanza ya Kicukiro rushyinguwemo imibiri y’abazize Jenoside igera ku bihumbi ibihumbio 11.

Umunyambanga Nshingwabikorwa wa Komisiyo y’Igihugu ishinzwe kurwanya Jenoside (CNLG), Dr. Bizimana Jean Damascene
Umuyobozi wungirije wa Ibuka, Nkuranga Egide

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza