Kwamamaza

Nyabugogo: Imibereho y’abana bo mu muhanda ubuyobozi buvuga ko butari buzi (Amafoto)

Yanditswe kuya 15-09-2016 saa 10:52' na Thamimu Hakizimana


Mu gihe Leta y’u Rwanda ikomeje gushyira imbaraga muri gahunda yo guca ubuzererezi bw’abana, iyo utembereye hirya no hino mu bice by’Umujyi wa Kigali usanga bakigaragara ndetse bamwe muri bo bashobora kuvamo abajura bakaze hatagize igikorwa.

Iyo ugeze Nyabugogo mu Karere ka Nyarugenge hafi ya Gare, ku kiraro gitandukanya umurenge wa Muhima n’uwa Kimisagara ahacururizwa indabo, uhasanga abana bo mu muhanda benshi cyane harimo abaryamye, abari kunywa ibiyobyabwenge, abari kumesa imyenda n’abandi baba biyicariye aho ntacyo bakora.

Aba bana muraganira bakakubwira ko bahisemo kwibera mu buzima bwo mu muhanda kubera ibibazo bitandukanye birimo ubukene n’amakimbirane y’urudaca ahora mu miryango bavukamo n’ibindi.

Mu kiganiro IGIHE yagiranye na bo bemeza ko bahangayikishijwe n’ubuzima bwabo ariko ko bahisemo kwibera aho mu rwego rwo kwiha amahoro.

Bamwe barara muri gare abandi ku mugezi

Abo bana ngo bigabanyije mu matsinda kugira ngo babone aho kurara, ku buryo usanga abakobwa benshi muri bo barara muri gare ya Nyabugogo, abasore bo bakarara hafi y’umugezi wa Nyabugogo hateganye na ruhurura yegereye inyubako y’umucuruzi Mirimo.

Umwe muri bo ufite imyaka 18, uvuka mu Karere ka Rubavu, umaze imyaka itatu yibera mu muhanda yagize ati “ Njye nirarira muri gare hanze muri twa tuzu abagenzi bakunda kwicaramo ku manywa, mu gitondo kare nkazindukira hano mu gishanga nkaba ariho nirirwa.”

Hari abakobwa bicuruza kugira ngo babone amafaranga

Undi w’imyaka 15 yagize ati “Iyo twabuze amafaranga kandi dushonje hari gihe dusambana n’abagabo banyura hano mu gishanga bakaduha ayo tuguramo ibiryo.”

Akomeza ashimangira ko hari n’igihe baryamana n’abagabo ku mafaranga 500 gusa mu rwego rwo kugira ngo baticwa n’inzara.

Hari ababyarira mu gishanga cya Nyabugogo

Umwe yagize ati “ Kubyarira hano barahabyarira yewe si n’umuntu umwe cyangwa babiri bahabyarira, ni ibintu bimenyerewe cyane, none se n’ubwo umbaza utyo urabona hatari n’abatwite? None se uragira ngo bazabyarira kwa muganga nta mituweli bafite?”

Barya ibiryo byasigajwe n’abakire bita ’Umusige’

Undi wo muri bo w’imyaka 18 uvuka mu Kagari ka Nyakarekare,mu Murenge wa Mbuye, Akarere ka Ruhango, yemeza ko bahangayikishijwe n’ubuzima bwabo ngo kuko bahitamo kurya ibiryo biba byasigaye muri resitora kugira ngo baticwa n’inzara.

Yagize ati “ Nyine turya imisige;ni ibiryo abakire baba basigaje ku buryo n’iyo ugiye ugasanga nko muri resitora babishyizemo amazi, uremera ukabirya kugira ngo uticwa n’inzara gusa kuko n’iyo tubibuze duhitamo kwiba kugira ngo tubibone.”

Akarere ka Nyarugenge gasanga ikosa atari iry’abo bana

Munyabugingo Gaston, ushizwe itangazamakuru mu Karere ka Nyarugenge, yemeza ko kuba abo bana bibera mu muhanda atari ikosa ryabo ahubwo ko ari iry’ababyeyi babo baba bateshutse ku nshingano zabo zo kubitaho uko bikwiye.

Yagize ati “Gahunda yo guca inzererezi irahari rwose ariko irimo ibice bibiri, icy’abana bo muhanda n’icy’abakuru bacururiza mu kajagari, gusa kuba bari mu muhanda si ikosa ryabo ahubwo n’iry’ababyeyi. Twifuza gukora ubukangurambaga mu migoroba y’ababyeyi no mu Nteko z’abaturage zibera mu midugudu iba nyuma y’umuganda kugira ngo tubasabe kwita ku nshingano zo guha abana babo uburere bukwiye.”

Ubundi umubyeyi uteshutse ku nshingano mu kurera umwana abihanirwa n’amategeko, aho ingingo ya 227 y’igitabo cy’amategeko ahana ibyaha mu Rwanda iteganya ko umubyeyi cyangwa umwishingizi wirengagiza kubahiriza imwe mu nshingano ze nta mpamvu yumvikana ku buryo bizahaza ubuzima, umutekano, imibereho y’umwana we cyangwa uwo ashinzwe kurera ukiri muto, ureka umwana cyangwa uwo ashinzwe kurera akishora mu buzererezi, ahanishwa igifungo kuva ku mezi abiri (2) ariko kitageze ku mezi atandatu (6) n’ihazabu y’amafaranga y’u Rwanda kuva ku bihumbi ijana (100.000) kugeza kuri miliyoni imwe (1.000.000) cyangwa kimwe gusa muri ibyo bihano.

Munyabugingo akomeza avuga ko bigoye kumenya umubare w’abana b’inzererezi bagaragara muri aka Karere ariko yemeza ko abagera kuri 259 basubijwe mu miryango yabo cyane ko bo baba bazwi amazina.

Polisi iti "Icyo ni ikintu gishya"

Umuvugizi wa Polisi y’Umujyi wa Kigali, SP Emmanuel Hitayezu, avuga ko bagiye gukurikirana iki kibazo vuba ngo kuko nta bana benshi bakibarirwa mu muhanda cyane ko bafatanyije n’ubuyobozi bw’inzego z’ibanze mu minsi yashije bakora igikorwa cyo gusubiza abana benshi bagaragaraga mu mihanda mu miryango yabo.

Yagize ati “ Icyo ni kintu gishya kuko abana bari bazwi ko ari abamaline habaye igikorwa cyo kubafata bagasubizwa mu miryango yabo, ubundi icyo polisi ikora ni ibyo yakoze mu minsi ishize ifatanyije n’inzego z’ibanze, habayeho ibikorwa byo gufata abana nk’abo bagahuzwa n’ababyeyi babo .”

Yavuze ko Polisi igiye kubikurikirana nk’uko isanzwe ifatanya n’inzego zibanze kugira ngo abo bana bashyikirizwe imiryango yabo, ku buryo abafite imyaka yo kuba bakwigishwa imyuga n’ibindi bikorwa byabafasha mu mibereho yabo bahita bajyanwa muri ibyo bigo biyigisha.

Ikibazo cy’abana bo mu muhanda cyakunze kugarukwaho n’abayobozi banyuranye barimo na Perezida Paul Kagame, wavuze ko bitumvikana ndetse ko bitanakwiye ko umwana w’umunyarwanda aba mu muhanda, asaba inzego bireba gukemura iki kibazo bidatinze.

Minisiteri y’Uburinganire n’Iterambere ry’Umuryango ndetse n’abandi bafatanya na yo, bavuze ko bagiye guhagurukira iki kibazo kigakemurwa vuba, ariko na n’ubu abana nk’abo baracyagaragara hirya no hino ku mihanda inyuranye mu gihugu.

Aha ni ho birirwa, abakobwa iyo bwije bajya kurara muri Gare ya Nyabugogo
Amazi bakoresha mu buzima bwabo bwa buri munsi
Biba imodoka ziri kugenda
Ababashije kubona ibiryo (Umusige) babirira ku ikarito
Uku ni ko baryama

Amafoto: Thamimu Hakizimana


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved