Imibare y’abangavu baterwa inda yikubye kabiri mu turere tumwe

Yanditswe na Prudence Kwizera
Kuya 18 Nzeri 2019 saa 08:43
Yasuwe :
0 0

Uko bigaragara hirya no hino mu gihugu imibare y’abangavu baterwa inda imburagihe igenda yiyongera uko umwaka utashye. Ni ikibazo gihangayikishije Leta y’u Rwanda, ababyeyi, abarezi n’abafatanyabikorwa.

Hirya no hino mu turere tw’igihugu hagaragara ibikorwa bitandukanye bigamije gukumira inda ziterwa abangavu ariko hakibazwa impamvu aho kugabanyuka cyangwa ngo bicike imibare igenda izamuka.

Nko mu Ntara y’Amajyepfo, uturere twa Nyanza, Huye, Gisagara na Nyaruguru turi mu dufite imibare myinshi y’abangavu batewe inda imburagihe.

Umuyobozi Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciate, yavuze ko abangavu batewe inda barenga 600.

Ati “Ubushize twavugaga ko dufite abangavu 338 batewe inda ariko ubu twarabaze neza dusanga bageze kuri 699; ni abana benshi cyane.”

Mu Karere ka Nyanza ho imibare yavuye ku bangavu 200 igera ku basaga 450.

Umuyobozi wungirije ushinzwe imibereho myiza y’abaturage mu Karere ka Nyanza, Umutesi Solange, yavuze ko abangavu baheruka guterwa inda barenga 450.

Ati “Iyo turebye nk’imibare dufite kuva mu kwa karindwi ku mwaka ushize dusanga dufite abangavu 455 batewe inda. Abo ni ababyaye ushobora no gusanga hari n’abandi bahohotewe batabyaye ariko iyo mibare iratwereka ko ari ikibazo kiremereye.”

Mu Karere ka Gisagara, Ubuyobozi buheruka gutangaza ko hamaze kubarurwa abangavu 623 batwaye inda zitateguwe harimo abahetse impinja n’abagitwite.

Umuyobozi w’Akarere ka Gisagara, Rutaburingoga Jérôme ati “Dufite abana batewe inda bagera ku 198 bari munsi y’imyaka 18 n’abandi 425 bari munsi y’imyaka 20. Muri rusange ni umubare munini, ni icyorezo, ni ikibazo gikomeye cyane dusaba ubufatanye bwa buri wese ngo tugihagarike.”

Abatanga ibitekerezo basanga hakwiye guhuzwa ingamba no gukurikirana ishyirwa mu bikorwa ryazo kuko haba ubwo zifatwa zigahinduka amagambo gusa.

Mu kiganiro na IGIHE, Umuhuzabikorwa wa Reseaux des Femmes mu Ntara y’Amajyepfo, Muteteri Caritas, ko ikibazo cy’abangavu baterwa inda gihangayikishije “kuko imibare ikomeje kuzamuka, usanga abangavu baterwa inda bakabyara bakiri bato. Ni ikibazo tugomba guhagurukira nk’ababyeyi nk’imiryango kugira ngo aba bana bareke guhohoterwa”.

Muteteri asanga ingamba zifatirwa icyo kibazo zitaranozwa neza kugira ngo zibashe gutanga umusaruro uhamye.

Kuba abangavu bakomeje guterwa inda imburagihe bibagiraho ingaruka ubwabo bikazigira no ku muryango nyarwanda.

Usanga hirya no hino mu turere abangavu batewe inda baravuye mu ishuri ndetse babayeho mu buzima bugoranye.

Urugero ni urwa Aline Mukarugwiza wo mu Karere ka Gisagara watewe inda afite imyaka 12 y’amavuko ubuzima bumubera ingume.

Yahuye n’ibibazo byo kubura icyo areresha umwana, uburwayi ndetse no guhangayika kuko n’umusore wamuteye inda yaburiwe irengero.

Hari abavuga ko guterwa inda kw’abangavu imburagihe biri mu byongera umubare w’abana bazerera mu muhanda kuko abo bana bavuka muri ubwo buryo usanga batabona urukundo rwa kibyeyi ngo bahame mu muryango.

Abarezi n’ababyeyi babivugaho iki?

Umurezi akaba n’Umuyobozi w’Ikigo cy’amashuri abanza cya Kavumu Gatolika mu Karere ka Nyanza, Kirumugabo Jean de Dieu, avuga ko ababyeyi n’abarezi badohotse ku nshingano yo kurera bityo bakwiye kwisubiraho.

Ati “Ababyeyi baba bihugiyeho, abarezi nabo usanga hari abo bitarajyamo ku buryo bakurikirana ihohoterwa rikorerwa umwana w’umukobwa. Ku kigo nyobora twashyizeho amatsinda yo kwigishyirizamo ibijyanye n’ihohotera ku buryo abana bamaze kumenya akamaro ko kurwanya ihohoterwa no kuritangaza.”

Bamwe mu babyeyi bemeza ko nta ko batagira ngo batoze abana babo uburere no kwirinda ibishuko byabashora mu busambanyi ariko bikananirana.

Ufitinema Pacifique wo mu Karere ka Huye ati “Ikibazo gihari ni uko bashukwa n’abagabo bakuze bafata nk’ababyeyi babo. Ubu se ko ujya kubona umwana w’imyaka 15 yatewe inda n’umugabo w’imyaka 40, ubwo urumva bidateye isoni n’agahinda”.

Basanga umugabo wateye inda umwangavu aburanishirijwe mu ruhame aho yakoreye icyaha byatanga isomo ku bantu benshi bakareka gushuka abana bato no kubasambanya.

Nyiramategeko Sélaphine ati “Njye numva bajya bamanuka bakaza kuburanishiriza urubanza aho icyaha cyabereye cyangwa bitashoboka bakaza kuhasomera imyanzuro y’urubanza. Isomo byasiga ni uko ababibonye, hari n’uwari ufite umugambi wo gukora icyo kintu yahita azibukira ntazongere kubitekereza”.

Umukozi wa Action Aid mu mushinga ugamije kwigisha abana ubuzima bw’imyororokere no gukumira ihohoterwa rishingiye ku gitsina, Nagingu Robina, avuga ko bagiye kwiga ahari ikibazo bakoresheje ikarita nsuzumamikorere.
Ati “Tuzabaza abana n’ababyeyi kugira ngo tumenye igituma ibibazo byiyongera kandi hari inzego zigomba kubikemura n’amategeko ahari.”

Kimwe mu bibazo bigaragazwa bituma umubare w’abangavu baterwa inda ukomeza kwiyongera ni icy’uko abagabo bazibatera badahanwa.

Bamwe mu bangavu batungwa agatoki ko guhishira abagabo babatera inda n’ababyeyi babo bakababibafashamo.

Ahanini ngo biterwa n’uko abo bagabo babatera ubwoba ko nibabavuga bazabagirira nabi cyangwa bakabashukisha kubaha amafaranga.

Perezida w’Inama y’Abepisikopi Gatolika mu Rwanda, Musenyeri Phillipe Rukamba, muri Mutarama 2019 yavuze ko ikibazo gikomeye gishingiye mu myumvire aho usanga hari ababyeyi bumva ko kurera umwana ari ukumugaburira no kumuryamisha gusa.

Yagaragaje ko ibisubizo bikubiye mu bufatanye bushingiye ku mbaraga z’ababyeyi bakurikirana umwana, amadini na Leta mu guhangana n’ikibazo cy’inda ziterwa abangavu.

Ati “Ni ukongera kwigisha, gusobanura no kujya inama binyuze mu biganiro. Ukabwira abana ububi bwo gusambana. Ni ukwigisha umwana kwifata, nk’uburyo bwo gukura no kubaho neza. Ukamwigisha ko ari icyaha imbere y’Imana kandi na we ko bimwicira ubuzima.’’

Yavuze ko Kiliziya Gatolika yateye intambwe y’ibanze yo guhangana n’ikibazo cy’abangavu baterwa inda, ihereye mu mashuri yayo. Yatangiye gushyiraho abajyanama bihariye baba hafi abanyeshuri, bakamenya imibereho yabo.

Kugeza ubu hirya no hino mu turere hakomeje igikorwa cyo gukusanya imibare y’abangavu batewe inda imburagihe ariko kikajyana no gukora iperereza ku bagabo bakekwaho kuzibatera kugira ngo bahanwe.

Imibare iheruka yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

Bamwe mu bangavu bo mu Karere ka Gisagara batewe inda imburagihe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza