Imibare idasanzwe igaragaza aho u Rwanda ruhagaze ku rwego mpuzamahanga

Yanditswe na Rabbi Malo Umucunguzi
Kuya 30 Kanama 2018 saa 05:00
Yasuwe :
0 0

U Rwanda ni igihugu kigendwa n’umubare munini w’abaturuka impande zose z’Isi baba abashoramari, abakeneye gusura ibirutatse binyuze mu bukerarugendo. Gusa ntibyikora kuko hari ibibareshya.

Ibyo bihuzwa n’uko u Rwanda ruri mu bihugu bike ku Isi byafunguriye amarembo abashaka kubyinjiramo, aho umuntu wese, mu gihugu yaba aturutsemo, yaka viza ageze aho yinjirira mu gihugu.

-  Ni igihugu gitekanye

Raporo y’Ikigo cy’Abanyamerika Gallup’s Law and Order Index 2017, yashyize u Rwanda ku mwanya wa Gatanu ku Isi mu bihugu bitekanye n’amanota 87%.

Raporo yayo ya 2018 yo yashimangiye ko ruza ku mwanya wa kabiri mu bifite abaturage batekanye muri Afurika.

Ugutekana kw’abanyarwanda ntikurangirira mu kuba barya bakaryama gusa.

Amafaranga leta ishyira mu bikorwa by’iterambere ava mu nguzanyo z’amahanga, ibipimo bigaragaza ko u Rwanda rufite izibasha kugenzurwa kurusha ibindi bihugu byo mu karere.

Ibyo bijyana n’uburyo rugaragaza ubushobozi bwo kwishyura inguzanyo rufata, nk’uko byagaragajwe na Standard and Poor (S&P) Global Ratings 2018.

Raporo y’Ihuriro Mpuzamahanga ry’Ubukungu (World Economic Forum, WEF) mu 2016, igaragaza ko u Rwanda ari igihugu cya mbere muri Afurika gifite guverinoma itajegajega, rukaba ku mwanya wa karindwi ku Isi.

Raporo y’Ihuriro ry’Ubukungu ku Isi (WEF), igaragaza uko Polisi z’Ibihugu zihagaze mu kugirirwa icyizere n’abaturage, yashyize iy’u Rwanda ku mwanya wa mbere muri Afurika n’uwa 13 ku Isi.

-  Ni igihugu kiri kwihuta mu iterambere

U Rwanda ruheruka kuza ku mwanya wa kabiri mu bihugu bifite ubukungu buri kwihuta cyane muri Afurika.

Raporo ya Ibrahim Index ya 2017, yerekanye ko ruri ku mwanya wa Mbere muri Afurika mu bihugu byateje imbere inzego zose, harebwe mu myaka itanu ishize.

U Rwanda kandi rwaje imbere ku Isi mu bihugu byateye intambwe ikomeye mu guteza imbere ubushobozi bw’abaturage.

Naho Raporo y’Umuryango wa Afurika Yunze Ubumwe yashyize u Rwanda ku mwanya wa mbere mu bihugu 54, mu gushyira mu bikorwa imyanzuro icyenda irebana no guteza imbere ubuhinzi yafatiwe mu nama y’abakuru b’ibihugu na Guverinoma yabereye muri Guinée équatoriale mu 2014.

-  Ni igihugu kibereye ishoramari

Raporo ya Banki y’Isi imaze kumenyerwa nka Doing Business, ya 2016/17, igaragaza ko u Rwanda ruza ku mwanya wa kabiri muri Afurika mu korohereza abakora ubucuruzi, inyuma y’Ibirwa bya Maurice. Ruza ku mwanya wa 41 ku Isi muri uru rwego.

Mu bijyanye no kwandika ubucuruzi bushya, u Rwanda ruhiga ibihugu byinshi ku Isi kuko kwandika ikigo gishya bifata amasaha atarenze atandatu.

U Rwanda kandi ruri kuzamura abanyeshuri bize za kaminuza kuko nibura abagera ku 47,000 barangiza buri mwaka.

Mu korohereza abashoramari kandi, si ukwandika ibigo cyangwa kubona abakozi gusa, kuko na internet ibafasha kwihutisha ibikorwa byabo, imaze kugezwa mu gihugu hose ku gipimo cya 95%.

Mu bindi bipimo bigaragaza uko u Rwanda ari igihugu gihagaze neza, ni uko rwaje ku mwanya wa kane ku Isi n’uwa mbere muri Afurika mu kuziba icyuho mu buringanire hagati y’abagabo n’abagore.

Ibyo bigaragazwa na raporo ya Global Gender Gap 2017.

-  U Rwanda rwifatanya n’amahanga

Byanditswe mu mateka ya Afurika ko ku wa 21 Werurwe 2018, aribwo ibihugu 44 bihuriye muri AU, byari bikoraniye muri Kigali Convention Centre, byashyize umukono ku masezerano ashyiraho isoko rusange rya Afurika, AfCFTA.

Ubu ibihugu bimaze kuyashyiraho umukono byamaze kurenga 50 kandi u Rwanda rwayasinye ndetse ruyemeza burundu mu bya mbere.

U Rwanda kandi ubu rufite ikigo cy’indege gikoresha ikoranabuhanga kiruhuza n’ibindi bihugu birimo ibyo muri Afurika, RwandAir.

Hamwe n’ibindi bikorwa remezo u Rwanda rugenda rwubaka, umurwa mukuru warwo Kigali uheruka kuza ku mwanya wa gatatu muri Afurika nka hamwe mu hantu hakunzwe n’abategura inama mpuzamahanga.

Uyu mwanya u Rwanda rwawushyizweho n’Ishyirahamwe Mpuzamahanga rishinzwe ibyo gutegura Inama zikomeye (ICCA), muri Gicurasi 2018.

-  Ibyarwo ni kamere

Raporo zitandukanye zigaragaza ko ibikoresho biva mu Rwanda byifashishwa mu nganda ari iby’umwimerere.

U Rwanda nk’igihugu gikundwa na ba mukerarugendo benshi, ni nayo ntaho y’umubare munini w’ingagi zo mu misozi ku Isi.

Ubushakashatsi buheruka bwerekanye ko muri Kamena 2016 ingagi zari 604 zivuye kuri 480 zabaruwe mu 2010.

Byatumye n’abantu barusura baba benshi kuko nk’umwaka ushize bageze kuri milioni 1.5.

Kubera umutekano no korohereza abashoramari, ibikorwa by'iterambere bizamurwa mu Rwanda uko bwije n'uko bukeye
Kigali Convention Center yatangiye kubakwa mu mwaka wa 2009, itahwa mu 2016 itwaye akayabo ka miliyoni 300 z’amadolari ya Amerika
Kigali Convention Centre imaze kuba ikirango cy'ishoramari mu gihugu, kigaragaza ko igihugu kiri gutera imbere kandi ko n'imishinga minini ishobora gushyirwa mu bikorwa
Inyubako ya Kigali Heights yatwaye miliyoni 30$ ni kimwe mu bikorwa bikomeye by'ishoramari mu gace kiswe Kimihurura Gateway
Mu duhigo u Rwanda rwihariye harimo no kugira isuku, aho nka Kigali ifite ubusitani udapfa gusanga ahandi
Inyubako ya MIC mu Mujyi wa Kigali rwagati, ni rimwe mu ishoramari rigaragaza icyerekezo cy'igihugu
Iyi nyubako ya CHIC yafunguwe na Perezida Kagame ku wa 5 Ukuboza 2016, nyuma yo kuzura itwaye miliyari 19 na miliyoni 800 z’ Amafaranga y’ u Rwanda
Mu gutwara abantu, hubatswe ibikorwa remezo byaciye akavuyo mu buryo bw'ingendo, gasigara mu bindi bihugu
Kigali City Tower yabimburiye izindi nyubako zikomeye mu mujyi rwagati, kuyubaka bisozwa mu 2011, ariko ubu imaze gukurikirwa n'imiturirwa ikomeye
Urebeye hejuru ubona inzu zisumba izindi nka Centenary House, Grand Pension Plaza na M Peace Plaza
Imbere y'Umujyi wa Kigali uhasanga ibibumbano by'ingagi, zimaze guhinduka ikirango cy'ubukerarugendo mu Rwanda
Kubera umutekano no korohereza abashoramari, imishinga y'ubwubatsi irazamuka ubutitsa
Iyi ni inyubako ya COGEBANQUE, imwe muri banki zashimye urubuga rwo gukoreraho ubucuruzi mu Rwanda
Banki ya Kigali ubu ni yo banki ya mbere mu Rwanda urebye ku mari shingiro no ku nguzanyo ishora mu bikorera
BPR Part of Atlas Mara nayo imaze kuzamura umuturirwa ukomeye, byose kubera inzira u Rwanda rurimo
Raporo zitandukanye zikomeza gushyira Kigali ku mwanya wa mbere mu kugira isuku
Kubera umutekano, ubu iterambere riraganje n'abana bose bagana ishuri
Ubu imihanda iri kubakwa, n'iyubakwa n'inguzanyo, u Rwanda rufitiwe icyizere n'ibihugu kimwe n'imiryango mpuzamahanga

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza