Kwamamaza

Imfungwa n’abagororwa bazakora ibizamini bya Leta nta kigaragaza ko bafunze

Yanditswe kuya 14-09-2016 saa 20:52' na Ntakirutimana Deus


Ubuyobozi bw’Urwego rw’Igihugu rw’Imfungwa n’Abagororwa (RCS), bwatangaje ko abana bagororerwa muri Gereza ya Nyagatare bazakora ibizamini bisoza amashuri abanza n’ay’icyiciro rusange, batambaye impuzankano ibagaragaza nk’imfungwa.

Umuvugizi wa RCS, CIP Hillary Sengabo yatangarije IGIHE ko mu gihe aba bana baba bakora ikizamini imbere hari umucungagereza urinze imfungwa n’abagororwa bari gukora ibizamini, ngo hari abo byatera ipfunwe, abandi bakagira ubwoba bushobora gutuma banatsindwa.

CIP Sengabo avuga ko abana bagororerwa muri Gereza ya Nyagatare bazakora ibizamini bya Leta bisoza umwaka w’amashuri wa 2016, muri bo 11 bazakora iby’abasoza amashuri abanza, batanu bakore iby’abasoza icyiciro rusange.

Urwego rw’Igihugu rushinzwe Imfungwa n’Abagororwa rwavanyeho impungenge zitandukanye abantu bashoboraga kuzagira babonye umuntu ari gukora ikizamini cya leta arindishijwe imbunda ari kumwe n’abandi batarebwa n’ubwo burinzi.

Mu Kiganiro IGIHE yagiranye n’Umuvugizi wa RCS, CIP Sengabo Hillary, yavuze ko ntawe ugomba kugira izo mpungenge kuko bafashe ingamba zituma zivaho.

Ati “ Bazakora ibizamini bambaye nk’abandi banyeshuri, bakorere ikizamini muri Nyagatare High School barindwe no mu bundi buryo.”

CIP Sengabo yavuze ko n’ubusanzwe bafite imyambaro y’ishuri bigana idatandukanye n’iy’abandi banyeshuri badafunze ku buryo ariyo bazambara muri ibyo bizamini.

Ku bijyanye n’uburinzi na bwo ngo bazaba barinzwe n’abantu batambaye imyenda y’abacungagereza bambaye bisanzwe nk’abahagarariye ikorwa ry’ibizamini.

Ibyo ngo bizabarinda kuba bagira ipfunwe, kudashungerwa ndetse no kuba byatera ubwoba abazaba bakorana na bo ikizamini, babatinya bo ubwabo cyangwa abacungagereza.

Ni ubwa mbere imfungwa n’abagororwa bazaba bakoze ibizamini bya Leta mu Rwanda, gusa no mu bafungiye mu yandi magereza nkuko Hillary Sengabo yabitangarije IGIHE bashobora kuzagera igihe bakora ibyo bizamini.

Yavuze ko ikibibuza ari uko hakiri imbogamizi zo kubona aho bigira, ndetse no kumvikana n’abashinzwe ibizamini uko icyo gikorwa cyanozwa.

Gereza y’abana ya Nyagatare ifungiyemo abagera kuri 296 barimo abakobwa 22 n’abasore 273.

Abagera ku 186 bahafungiye biga mu mashuri abanza, 14 mu yisumbuye naho 96 biga imyuga n’ubumenyingiro, aho bahabwa impamyabushobozi iyo barangije, kandi mu gihe bimenyereza bakabikorera hanze ya Gereza mu mujyi wa Nyagatare.

Abafunguwe batarakora ibizamini bya Leta bahabwa indangamanota zituma bakomereza amashuri yabo hanze ya Gereza.

RCS itangaza ko abenshi mu bafungiye muri iyo gereza baba barakatiwe ibihano biri munsi y’imyaka itanu.

Kuri uyu wa kabiri basuwe na Komiseri Mukuru wa RCS, CGP George Rwigamba, mu rwego we yise "gutera akanyabugabo" abo bana b’abanyeshuri bagiye gukora ikizamini za cya Leta bwa mbere mu magereza y’u Rwanda.

CGP George Rwigamba yavuze ko iki ari igikorwa cyiza kandi kibayeho bwa mbere, ngo yizeye ko kizakomeza kikaba buri mwaka kuko aba bana bafite amahirwe yo kwiga nubwo bafunze.

Leta ivuga ko ishishikajwe n’uburenganzira bwabo cyane, kugira ngo bunguke ubumenyi buzatuma bagira icyo bigezaho mu gihe bafunguwe.

Kuva iyi gereza iherereye mu mu Murenge wa Nyagatare yatangira kwakira abo bana muri 2009, imaze kwakira abagera kuri 763, abamaze gufungurwa ni 465.

CGP George Rwigamba yasuye abana bagororerwa muri Gereza ya Nyagatare bagiye gukora ibizamini bisoza amashuri abanza n'ay'icyiciro rusange. Ifoto/RCS

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved