Imbuto Foundation na UNFPA basabye ababyeyi kwita ku burere bw’abangavu hirindwa inda zitateguwe

Yanditswe na Habimana James
Kuya 27 Kamena 2019 saa 12:01
Yasuwe :
0 0

Umuryango Imbuto Foundation ufatanyije n’Umuryango Mpuzamahanga wita ku bikorwa by’abaturage (UNFPA), bahuye n’abafatanyabikorwa batandukanye mu nama yari igamije gushyira hamwe ngo harebwe uburyo barwanya ikibazo cy’abana bakiri bato bakomeje guterwa inda.

Izi nzego kandi zasabye umuryango muri rusange guhagurukira iki kibazo gikomeje kwiyongera hirya no hino mu gihugu, abana bagahabwa ubumenyi ku bijyanye n’imyororokere.

Umuyobozi Mukuru wungirije wa Imbuto Foundation, Umutesi Geraldine, yavuze ko Imbuto Foundation bafatanyije na UNFPA n’akarere ka Rubavu, bakoze umushinga w’intangiriro kugira ngo barebe iki kibazo cyo guterwa inda kw’abangavu cyagabanyuka.

Yavuze ko nka Imbuto Foundation bibaza ku musanzu batanga mu gushaka uko iki kibazo cyakumirwa mbere na mbere, ariko na babandi bamaze gutwita hakarebwa ngo ese babafasha gute kugira ngo batongera gutwita bwa kabiri cyane ko baba bakiri bato.

Kuva mu 2017 Umuryango Imbuto Foundation ufatanyije na UNFPA, batangije iyi gahunda y’ubukangurambaga bwo gukumira ko abana bakiri bato baterwa inda bahera mu Karere ka Rubavu, kugeza ubu hatangwa amahugurwa ku miryango ngo iki kibazo gikumirwe.

Hari kandi uguhuriza hamwe aba bana babyaye bakiri bato kugira ngo biteze imbere, guhugura ababafasha ku bigo nderabuzima, kubasubiza mu miryango yabo n’ibindi.

Mu myaka itatu ishize Minisiteri y’Ubuzima yagaragaje ko abana 55,018 bari hagati y’imyaka 15-19 aribo batwaye inda zitateguwe, Intara y’Iburasirazuba niyo iza imbere, mu turere twa Nyagatare, Gatsibo na Kirehe.

Imibare kandi igaragaza ko abana bangana na 95% babyara bakiri bato, baba abo mu bihugu bikiri mu nzira y’amajyambere.

Mu Rwanda ho imibare yagaragaje ko abana baterwa inda bakiri bato bagiye biyongera kuko mu 2010 bari kuri 6.1%, bigeze mu 2015 baba 7.3%.

Umutesi Geraldine yagize ati "Icya mbere twasanze ari ugukumira ko abana bacu baterwa inda, ababyeyi bakigishwa ubuzima bw’imyororokere, icya kabiri ni ukwita ku bamaze gutwara inda n’abamaze gutera inda iyo tubabonye.

Yakomeje avuga ko ikindi bakora ari ukureba icyo umuryango nyarwanda ukora ngo habeho uburyo burambye busubiza ikibazo cy’inda zitateguwe kigenda kigaragara ahantu hose.

Ati “Umuryango ukwiye kumenya uko umwana yaramutse, uko yiriwe n’uko yaraye, hari ubwo tuvuga inzego z’ibanze ariko tugomba kumenya ko umuryango ari urwego rukomeye cyane.”

Umuyobozi w’Ishami ry’Umuryango w’Abibumbye ryita ku bikorwa by’abaturage (UNFPA) mu Rwanda, Mark Bryan Schreiner, yavuze ko ikibazo cy’abana baterwa inda gikomeje kwiyongera bityo hakenewe ubufatanye bwa buri nzego.

Yagize ati “UNFPA yishimiye gufatanya na Imbuto Foundation mu gukemura ikibazo cy’abana baterwa inda bakiri bato, iki kibazo kirimo kuzamuka aho ubona abana bato barimo guterwa inda, twatangiriye mu karere ka Rubavu ariko ubu turashaka uko cyakwagurwa.”

Umuyobozi wa komisiyo y’igihugu y’abana, Dr. Claudine Uwera Kanyamanza, yagaragaje ko hagendewe ku mibare bafite yo mu 2015 yerekana ko abana 7.3% batwaye inda, iyi mibare ikaba ari myinshi.

Yagize ati “Ariko tugenda tubona n’andi makuru avuye muri Minisiteri y’Ubuzima atwereka ko iki kibazo gifite uburemere butoroshye, impamvu zibitera harimo uburere buke kuko usanga abana badafite n’ubumenyi buhagije kuri iki kibazo.”

Yasabye inzego zose n’ababyeyi guhagurukira iki kibazo kugira ngo kirandurwe.

Abahanzi bagaragaje umukino ugaragaza uko urubyiruko rwakwirinda gutwara inda bakiri bato
Abayobozi bitabiriye iyi nama bafashe umwanzuro wo gufatanya ngo iki kibazo cy'abana baterwa inda kirandurwe
Abayobozi mu nzego zitandukanye bahuriye hamwe mu kureba uko gahunda yo kurwanya abana baterwa inda yagezwa mu turere twose
Iki gihangano cyeretswe abayobozi barimo uwa Imbuto Foundation, UNFPA na Komisiyo y'Igihugu y'Abana
Umunyabugeni Remy Iradukunda yagaragaje igihangano yakoze kigaragaza agahinda umwana w'umukobwa yatewe no kubyara akiri muto ariko ko kubera Imbuto Foundation afite icyizere cyo kubaho neza
Umutesi Geraldine yavuze ko umuryango ukwiye gukurikirana ubuzima bwa buri munsi bw'umwana
Umuyobozi Mukuru wa (UNFPA) mu Rwanda, Mark Bryan Schreiner (ibumoso) avuga ko umwana akwiye kwitabwaho bihagije
Umuyobozi wa komisiyo y'igihugu y'abana, Dr. Claudine Uwera Kanyamanza we yagaragaje ko hagendewe ku mibare bafite yo mu 2015 yerakana ko abana 7.3% batwaye inda
Umuyobozi w'Ishami ry'Umuryango w'Abibumbye ryita ku bikorwa by'abaturage (UNFPA) mu Rwanda, Mark Bryan Schreiner, yavuze ko ikibazo cy’abana baterwa inda gikomeje kwiyongera bityo hakenewe ubufatanye bwa buri nzego
Umuyobozi wungirije wa UNFPA Mercy Mungai yitabiriye iyi nama

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza