Imbogamizi mu kubyaza umusaruro amakuru y’iteganyagihe mu Rwanda

Yanditswe na Evariste Nsengimana
Kuya 16 Nzeri 2018 saa 12:03
Yasuwe :
0 0

Ikigo cy’Igihugu gishinzwe Ubumenyi bw’Ikirere, cyatangaje ko kimaze kugira ubushobozi bwo gutanga amakuru ajyanye n’ihindagurika ry’ibihe yizewe ariko hakiri imbogamizi z’uburyo abanyarwanda bayabyaza umusaruro.

Inshuro nyinshi usanga abantu binuba ko amakuru atangwa y’itegenyagihe adafasha abaturage gukumira ingaruka zaterwa n’ibiza bishingiye ku ihindagurika ry’ibihe.

Urugero ni imvura yaguye ku wa Kane w’iki cyumweru, yari irimo umuyaga wahiritse ibiti, ugatwara ibisenge by’inzu n’ibindi.

Si ibyo gusa kuko mu ntangiriro z’uyu mwaka haguye indi idasanzwe yahitanye ubuzima bw’abantu basaga 200, yangiza imyaka, isenya inzu n’ibindi.

Mu kiganiro Kubaza bitera kumenya cyanyuze kuri Radiyo Rwanda kuri iki Cyumweru cyibanze ku iteganyagihe ry’Umuhindo wa 2018(Nzeri-Ukuboza) n’uburyo amakuru atangwa akoreshwa, hagarutswe ku mpamvu ibyo biza bitabasha gukumirwa.

Umuturage witwa Sabato Israel, yabajije abatumirwa niba ikibazo ari ubushobozi bucye bw’ibyuma bipima bya Météo Rwanda ku buryo batabasha kuburira abaturage.

Umuyobozi w’ishami rishinzwe gufata, gusesengura no kureba ko ibipimo byujuje ubuziranenge muri Meteo Rwanda, Musoni Didace, yavuze ko hejuru ya 70% by’amakuru batanga aba ari ukuri kandi yunganira ubumenyi bw’abaturage mu kumenya niba imvura igiye kugwa.

Umuyobozi w’Agategenyo w’ishami rishinzwe iteganyagihe n’uko rishyirwa mu bikorwa muri Meteo Rwanda, Mbati Mugunga, yavuze ko bafite ubushobozi bwo kumenya aho imvura igwa n’ubukana bwayo mu minota 30 itaragwa.

Ibyo babifashwamo n’ibyuma birimo Radar biri hirya no hino mu gihugu, bigaragaza ibicu bifite imvura nyinshi, aho bituruka, aho bigana n’igihe bihagerera.

Mugunga yakomeje avuga ko imbogamizi zikiri mu buryo amakuru atangwa atagira akamaro uko bikwiye.

Ati “Haracyari ingorabahizi kuko twe ntitwahagarika iyo mvura! Iyo tubivuze n’izindi nzego zikabimenya, kuko biba mu gihe gito, dufite ubushobozi ki ku buryo n’umuturage ubyumvise yahita afata ingamba? Icyo kirasa n’aho tugifitemo urujijo.”

Yakomeje agira ati “Abahanga bakwiye kwicara bakareba icyahita gikorwa ku kintu nk’icyo kimenyekanye mu mwanya muto, hatabaye impanuka.”

Yakomeje avuga ko hari n’ubwo abaturage baburirwa ntibagire icyo babikorano, atanga urugero nk’igihe basabwa kubaka inzu zifite ibisenge bidakomeye, abari mu manegeka ko bimuka n’ibindi ariko bakinangira.

Imvura idasanzwe ivanze n’umuyaga mwinshi yaguye ku mugoroba wo kuri uyu wa 12 Nzeri 2018 mu Mujyi wa Kigali yakangaranyije benshi ndetse inangiza ibintu byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza