Kwamamaza

Imashini imwe rukumbi ibika intanga z’ibimasa yari imaze amezi atandatu yarapfuye, yongeye gukora

Yanditswe kuya 3-11-2016 saa 07:19' na IGIHE


Imashini imwe rukumbi u Rwanda rwifashisha mu kubika intanga z’ibimasa mu kigo cy’Ubushakashatsi cya Rubirizi, yari imaze amezi atandatu idakora yarabuze ibyuma bisimbura ibyashaje, yongeye gusubukura serivisi zayo mu ntangiriro z’Ukwakira.

Mu rugendo Abadepite bagize Komisiyo ishinzwe ubuhinzi, ubworozi n’ibidukikije bagiriye muri icyo kigo kuri uyu wa Gatatu tariki 2 Ugushyingo 2016, basanze imashini yifashishwa mu gutera intanga imaze ukwezi yongeye gutangira imirimo yayo.

Amabwiriza y’Ikigo cy’Igihugu cyo guteza imbere Ubuhinzi n’Ubworozi avuga ko inka zororerwa hamwe zishobora gusangira imfizi ariko izororerwa ahantu hatandukanye, zigomba guterwa intanga mu rwego rwo kwirinda gukwirakwiza uburwayi bukomoka ku bimasa.

Depite Ignacienne Nyirarukundo, Umuyobozi w’iyo Komisiyo yavuze ko ibura ry’intanga ku borozi rishobora guteza ingaruka zirimo umusaruro muke n’indwara zikomoka ku bimasa bibangurira inka zitandukanye.

Yagize ati “Ikimasa kigiye aha kikajya ahangaha byaragaragaye ko bitera indwara bakagerageza kubivura, ariko cyane cyane cya cyororo abantu bari bategereje ntibakibonye ariko hari n’abatarabonye n’imfizi zo kubanguriraho.”

Depite Nyirarukundo akomeza avuga ko kubura intanga bizagira ingaruka ku mukamo no ku bwoko bw’inka buzavuka mu buryo butari ubwo gutera intanga.

Abadepite basabye ko harebwa uburyo iki kigo cyagura indi mashini yunganira isanzwe kugira ngo bidakomeza kudindiza ubworozi.

Umuyobozi w’Ishami rishinzwe gupima no gusuzuma indwara z’amatungo mu kigo gishinzwe ubuhinzi n’ubworozi, RAB, Dr.Christine Kanyandekwe, avuga ko iyi mashini imaze ukwezi yongeye gusubukura imirimo yayo.

Yagize ati “ Iyi mashini imaze ukwezi itangiye imirimo yayo yo gutanga intanga ku bazikeneye. Ubu turimo kugerageza kujyana amatembabuzi n’intanga hirya no hino mu turere kugira ngo igikorwa cyo gutera intanga noneho tugikore mu buryo budasanzwe, na za nka zitabashije guterwa ziterwe kuko muri iki gihe cy’imvura ari cyo cyiza kugira ngo inka zifate kuko ziba zabonye ubwatsi buhagije, kubera ko ziba zimeze neza.”

Asobanura ku kibazo cy’iyi mashini imaze ukwezi itangiye gukora nyuma y’asaga atandatu ihagaze yagize ati “Muri Gicurasi imashini yagize ikibazo ariko duhita dusaba uburenganzira bwo gutumiza ibikoresho byo kuyisana. , ubu imaze ukwezi kose yongeye gutangira gutanga serivisi zayo ku borozi b’inka, ndetse tukanabasaba kurushaho kutwegera.”

Yakomeje atangaza ko mu minsi iri imbere bateganya gutumiza indi mashini izajya iyunganira kugira ngo serivisi zihabwa abagenerwabikorwa zirusheho kunozwa. Mu Rwanda imashini imwe gusa ni yo ikoreshwa mu gukora umwuka wa "Azote" ukoreshwa mu kubika neza intanga z’inka.

Iyi mashini imwe mu Rwanda yaguzwe miliyoni 500 y’amafaranga y’u Rwanda mu 2009, ifasha ikigo cya RAB kubika neza intanga zituruka ku bimasa zigashyikirizwa aborozi.

Umuyobozi Mukuru Wungirije Ushinzwe Ubworozi mu kigo cy'igihugu cy'Ubuhinzi n'Ubworozi 'RAB', Dr Kanyandekwe Christine

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved