Imaramatsiko ku rugendo rw’ibilometero 1000 Ntigurirwa yagenze n’amaguru azenguruka u Rwanda

Yanditswe na Muvunyi Arsène
Kuya 27 Nyakanga 2019 saa 01:03
Yasuwe :
0 0

Tariki 15 Mata 2015 nibwo Ntigurirwa Hyppolite yahagurutse kuri Paruwasi ya Mibirizi mu Karere ka Rusizi, atangira urugendo rw’ibilometero 1000 ruzenguruka igihugu cyose.

Ni urugendo rwari rugamije kongera kwibuka inzira y’umusaraba abazize Jenoside yakorwe Abatutsi mu 1994 banyuzemo no gutanga ubutumwa bugamije kwimakaza amahoro mu banyarwanda.

Ari kumwe n’umunyamerika witwa Dylan bahetse ibikapu mu mugongo batangiye urugendo.

Igikapu cya Ntigurirwa ubwacyo cyonyine cyapimaga ibiro birenga 30, aho cyarimo ihema, umwenda wo kuryamamo, ibikoresho by’ubuvuzi bw’ibanze, imyenda yo kwambara, ibikoresho by’isuku, ibitabo n’akamatola gato kari kaziritse inyuma y’igikapu.

Nyuma yo kuva mu ntara y’Uburengerazuba bakomereje mu Majyaruguru, bahinguka mu Ntara y’Uburasirazuba, Amajyepfo barahindura basubira mu Mujyi wa Kigali.

Ishusho y’urugendo

Ntigurirwa yabwiye IGIHE ko iyo yabaga ari mu nzira yagendaga aganiriza abantu ahuye nabo mu nzira, agakora imiganda, agasura ibigo bitandukanye bihuriramo abafite ibibazo, asura inzibutso za Jenoside yakorewe Abatutsi, asura abarokotse jenoside bahaye imbabazi ababahemukiye, abarokoye abantu n’ibindi byinshi.

Muri gahunda yari afite agitangira gukora uru rugendo yateganyaga ko azajya arara ku mashuri, mu ngo z’abaturage no ku nsengero ariko siko byamugendekeye kuko ahanini yaraye mu macumbi akodeshwa.

Ati “Mu minsi ya mbere nabanje kubura aho ndara, ugasanga ngiye nko ku nsengero cyangwa ku mashuri nkasanga harafunze cyangwa ntibanyemerere kuharara. Hari aho naraye ku murenge cyangwa nkahita nkomeza nkajya kure nkarara ahari umuntu nzi. Ni naho byatumye mvuga ngo ko mbona bitangiye kungora kubona aho ndara, mpita ntangira kwishuyura.”

Mu rwego rwo kudahindura urugendo rwe nk’igikorwa cy’ubukerarugendo Ntigurirwa yiyemeje kurara ahantu hatarengeje amafaranga 5000 mu ijoro rimwe.

Yaramesaga bikamwumiraho

Ahaguruka i Mibirizi yari afite ipantalo imwe ya siporo n’amakabutura atatu. Ku munsi wa gatatu yahise atanga amakabutura abiri ageze muri Musanze indi ayohereza i Kigali yari imuremereye.

Ipantalo imwe yari asigaranye yarayambaye agera i Gicumbi yacitse hagati y’amaguru arayidodesha arayitanga. Yaguze indi ayigendana iminsi 80 yose y’urugendo yari asigaranye.

Yari afite kandi imipira ibiri yanditseho “Biba Amahoro” umwe w’umukara waracuyutse atumizaho undi umwe.

Yavuze ko atakundaga kubona umwanya wo kumesa imyambaro ye ndetse n’iyo yabikoraga ngo yahitaga yambara bikamwumiraho.

Ati “Naramesaga ariko hari n’igihe cyashiraga nkabura uko nyimesa. Cyangwa nkawumesa mu gitondo nkahita nywambara nagendaga ibilometero bibiri ukaba wumye. Cyangwa nkanika ku gikapu bikuma ndi kugenda.”

Koga nabwo ntabwo byabaga akenshi ahubwo yifashishaga impapuro z’isuku akihanagura ubundi agakomeza urugendo.

Umubyeyi we kandi yari yaramubujije kwiyogoshesha umusatsi gusa ntiyigeze amubwira impamvu yabyo nabyo yarabyubahirije.

Hari inzibutso yangiwe ko asura

Nk’uko muri gahunda y’urugendo rwe harimo no gusura inzibutso za Jenoside yakorewe Abatutsi, Ntigurirwa avuga ko hari aho yageze akangirwa kuzisura bitewe n’ibyangombwa byinshi yasabwaga.

Ati “Hari nk’inzibutso byansabaga ko ngenda nkasaba impapuro kugira ngo nsure aho hantu bikambera ikibazo. Harimo nk’urwibutso rwa Nyabihu narahageze barambwira ngo nzabanze njye gusaba icyangombwa ngo kinyemerera gusura, urwa Gakenke, urwa Rukumberi izo ni ingero ariko hari n’izindi nyinshi”.

Yanditse amabaruwa 40

Ajya gutangira iki gikorwa, Ntigurirwa yari yasabye abantu bose babyifuza kuzandika amaburwa arimo ubutumwa bifuza bwose mu rwego rwo kwifatanya na we.

Avuga ko yabonye amabaruwa menshi yohererejwe n’abantu baba mu bihugu bitandukanye akaba ateganya kuzayashyira mu nyandiko.

Nawe yanditse amabaruwa agera kuri 40 yandikiye abantu bazize Jenoside, abo yahuye nabo, ndetse n’ibindi bitari abantu.

Ati “Nagiye nandikira abantu nzi, abo ntazi, abo nahuye nabo mu rugendo, nandikira ibiti bitewe n’icyo nibuka, uko numvaga igitekerezo kije nahitaga nandika.”

Imwe muri ayo mabaruwa yanditse, harimo iyo yandikiye umwana wari inshuti ye wishwe muri Jenoside yakorewe Abatutsi mu 1994.

Icyo yakuyemo

Ntigurirwa avuga ko nyuma y’iminsi 1000 amaze azenguruka u Rwanda n’amaguru yakuyemo isomo rikomeye ry’urugendo rw’intambwe y’ubumwe abanyarwanda bateye mu myaka 25 ishize.

Ati “Uru rugendo rwansigiye ko kugira neza ari intwaro ikomeye y’amahoro. Kuko aho nanyuze mu Rwanda hose, nta muntu ukurebamo ko uri umuhutu umututsi cyangwa umutwa cyangwa ikindi cyose bitandukanye n’imyaka 25 ishize.”

Ntigurirwa kandi avuga ko hakiri urugendo rukomeye buri muntu ku giti cye akeneye gukora, kuko hari abatarakira ibikomere bya Jenoside yakorewe Abatutsi.

Yishimira umutekano uri mu Rwanda kuko mu gihe cyose yamaze agenda nta muntu wigeze amusagarira cyangwa se ngo agire ikindi kimuhungabanya.

Ntigurirwa amaze igihe akora urugendo rw'ibilometero 1000 ashushanya inzira y'umusaraba abatutsi bazize Jenoside banyuzemo
Yanyuze mu nzira zitoroshye
Ntigurirwa yagendaga acumbika ahantu hatandukanye
Yifatanyije n'abarokotse Jenoside mu bikorwa byo kwibuka
Bamwe mu banyamahanga bifatanyije na Ntigurirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza