Kwamamaza

Imanza zaciwe n’inkiko za kanto zavuye kuri 3610 muri 2003 zigera ku 41953 muri 2014/2015

Yanditswe kuya 3-11-2016 saa 09:09' na Ntakirutimana Deus


Umugenzuzi w’Inkiko akaba n’Umuvugizi wazo, Emmanuel Itamwa asanga nta Munyarwanda ushobora kubura ubutabera kuko Leta yakoze amavugurura mu nzego z’ubucamanza, yagaragaje impinduka ndetse atanga umusaruro ufatika.

Izo mpinduka zirimo kuzamura umushahara w’abacamanza, kubongerera ubumenyi, gukoresha abashoboye ndetse no kubaha ibindi byangombwa bibafasha mu kazi kabo.

Ibi yabitangaje mu kiganiro yahaye abanyamakuru bo mu Muryango Pax Press bari mu mahugurwa ku gukora inkuru zijyanye n’ubutabera ari kubera i Musanze kuva ku wa Kabiri tariki ya 1 Ugushyingo 2016.

Yavuze ko mu rwego rwo gushimangira ivugurura ry’urwego rw’ubucamanza, mu mpera z’umwaka wa 2004, hemejwe gahunda y’igenamigambi ishingiye ku nkingi zo kwegereza abaturage ubutabera bunoze kandi mu buryo bwihuse; gushimangira ubwigenge bw’urwego rw’ubucamanza no kunoza imikoranire yarwo n’izindi.

Biciye mu kwifashishwa ikoranabuhanga ryatumye akazi koroha kakanihuta, byorohereza abacamanza n’abaturage bagana inkiko kugira ngo ibirego byabo na serivisi bashaka bajye bazibona bitabaye ngombwa ko bajya ku nkiko.

Yavuze ko zimwe mu mbogamizi zigaragara zirimo ahakivugwa ruswa akenshi abacamanza bashorwamo n’ababuranyi ndetse n’inkiko zidakoresha ikoranabuhanga uko bikwiriye kubera ikibazo cya internet ariko ngo ntibyabuza abayegereye batayikoresha guha abaturage iyo serivisi.

Ku baturage batuye mu bice bifite ibyo bibazo ngo boroherezwa gutanga ibirego ku mpapuro mu buryo busanzwe.

Aya mavugurura yatanze umusaruro ufatika

Imishahara y’Abacamanza yariyongereye, ku buryo uhabwa utangiye akazi mu rukiko rw’ibanze wikubye hafi inshuro 14 uwugereranyije n’uwatangwaga mu Rukiko rwa Kanto, rwafatwaga nk’urw’ibanze mbere ya 2004.

Imanza zicibwa ari nyinshi nkuko imibare igenda ibigaragaza. Urugero ni uko muri 2003, Inkiko za kanto zose zaciye imanza 3.610 ariko muri 2014-2015, Inkiko z’Ibanze zaciye izigera ku 41.953.

Inkiko za mbere z’Iremezo zose zaciye imanza 6.540 ariko muri 2014-2015, Inkiko Zisumbuye zaciye izigera ku 18.766 .

Iz’Ubujurire zose zaciye imanza 1.567 ariko muri 2014-2015, Urukiko Rukuru n’ingereko zarwo zaciye imanza 5.831.

Muri 2003 kandi Urukiko rw’Ikirenga rwaciye imanza 69 ariko muri 2014-2015, ruca 636.

Mu bijyanye no kumenyekanisha ibikorwa by’urwego rw’ubucamanza mu buryo butandukanye, hanogejwe serivisi zihabwa abagana inkiko.

Mu byakozwe birimo gushyiraho abanditsi bashinzwe kwakira no kuyobora ababuranyi, bahabwa amahugurwa n’amabwiriza yanditse asobanura ibyo bagomba kwitaho.

Hashyizweho kandi muri buri rukiko, agasanduku k’ibitekerezo, ibyashyizwemo bigakorerwa raporo igezwa buri kwezi ku bugenzuzi bw’inkiko ndetse n’amatangazo amenyesha ababuranyi uburenganzira bwabo yamanitswe ku nkiko zose.

Ku bijyanye no kugendana n’igihe hatejwe imbere ikoranabuhanga hashyirwaho internet ifasha guhererekanya inyandiko n’ubutumwa hagati y’inkiko. Iyo gahunda imaze kugera mu Rukiko rw’Ikirenga, mu Rukuru n’ingereko zarwo no mu nkiko zisumbuye zose.

Ibyumba by’iburanisha mu Nkiko z’Ubucuruzi byashyizwemo uburyo bugezweho bwo gufata no kubika amajwi y’ababuranyi ndetse hanubakwa n’uburyo bwo guhuza umurongo w’amajwi n’amashusho (Video Conferencing systems) ahantu hatanu mu ntara enye z’igihugu, amakuru yose agahurizwa mu Rukiko rw’Ikirenga.

Mu bindi byakozwe, harimo gukoresha abacamanza bafite impamyabumenyi zihanitse mu bijyanye n’amategeko.

Umugenzuzi w’Inkiko akaba n’Umuvugizi wazo, Emmanuel Itamwa ashimangira ko ubutabera bw'u Rwanda bwateye imbere mu buryo bufatika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved