Imanza hafi 40,000 za Gacaca zarangirijwe mu byumweru byahariwe ubufasha mu by’amategeko

Yanditswe na Evariste Nsengimana
Kuya 18 Mutarama 2018 saa 12:21
Yasuwe :
0 0

Minisiteri y’Ubutabera yatangaje ko mu myaka umunani hatangijwe Politiki yo gutanga ubufasha mu by’amategeko, hamaze kurangizwa imanza zisaga ibihumbi 40, zirimo 39,678 zarangijwe zerekeye imitungo yangijwe n’iyasahuwe muri Jenoside yakorewe Abatutsi.

Politiki yo gutanga ubufasha mu by’amategeko yatangijwe mu 2009. Ku wa 15 Ukwakira 2014 nibwo Inama y’Abaminisitiri yemeje Politiki y’igihugu y’Itangwa ry’ubufasha mu by’amategeko, igena uburyo bwo kubutanga mu byiciro bitandukanye by’abantu bakeneye kwitabwaho, bagahabwa ubutabera bwihuse kandi nta kiguzi.

Ibyo byiciro birimo abarwaye, imfungwa n’abagororwa, cyane cyane abadafite ubushobozi bwo kwiyishyurira abavoka.

Mu kiganiro Minisiteri y’Ubutabera yagiranye n’abanyamakuru, kuri uyu wa 18 Mutarama 2018, kigamije kugaragaza ibikorwa bizakorwa mu cyumweru cyahariwe ubufasha mu by’amategeko ku nshuro ya cyenda, yagaragaje ko mu myaka yabanje, imanza zirenga ibihumbi 40 zarangijwe.

Muri izo manza, harimo 39,678 zarangijwe zerekeye imitungo yangijwe n’iyasahuwe muri Jenoside yakorewe Abatutsi muri Mata 1994; 1050 zireba abana; 22 z’abagore batwite n’abari kumwe n’abana muri gereza na 182 z’ibindi byiciro by’abantu bakuru byari bikeneye kwitabwaho kurusha ibindi.

Minisitiri w’Ubutabera akaba n’Intumwa Nkuru ya Leta y’u Rwanda, Busingye Johnston, yavuze ko icyumweru cy’uyu mwaka kizaba kuwa 22-26 Mutarama 2018, cyagenewe insanganyamatsiko igira iti “Menya amategeko akurengera, uharanire uburenganzira bwawe.”

Muri icyo cyumweru, Minisitiri yavuze ko kizarangwa n’ibikorwa birimo kunganira no kwihutisha imanza z’abakekwaho ibyaha barimo abagore batwite n’abafunganye n’abana, abasheshe akanguhe n’abafite indwara zikomeye, bakanunganirwa ku buntu.

Hazanabaho guhugura abaturage ku mategeko; gusura gereza; gusura abaturage mu mirenge batanga ubutumwa bwo guhashya ibiyobyabwenge n’ihohoterwa rishingiye ku gitsina n’ibindi.

Busingye yavuze ko bitewe n’impamvu zitandukanye hari ubwo kureshya imbere y’amategeko bishobora kuba ikibazo cyangwa bigatinda, iki cyumweru kikaba ari umwanya wo kwereka Abanyarwanda ko urwego rw’ubutabera rubari hafi.

Asobanura impamvu bahisemo iyo nsanganyamatsiko, Minisitiri Busingye yagize ati “Umunyarwanda afite inshingano zo kumenya amategeko, ntawakwitwaza kutayamenya ngo agire icyo ahungabanya.”

Umuyobozi w’Ihuriro ry’Imiryango itari iya Leta itanga ubufasha mu by’amategeko, Kananga Andrew, yavuze ko kuva mu 2014, abantu barenga ibihumbi 201 bafashijwe gukemura ibibazo byabo mu mahoro no mu bwumvikane.

Perezida w’Urugaga rw’abavoka, Me Kavaruganda Julien, yavuze ko mu manza zizaburanishwa muri icyo cyumweru, muri dosiye zisaga 46 harimo iz’abana basaga 31 kandi ko bizakorwa ku buntu.

Icyumweru cyahariwe ubufasha mu by’amategeko biteganijwe ko ku rwego rw’Igihugu kizatangirizwa mu Murenge wa Gihango ho mu Karere ka Rutsiro, Intara y’Uburengerazuba ku wa 23 Mutarama 2018.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza