Ikorosi mu gukurikirana abasirikare b’Abafaransa bari inyuma yo gutererana Abatutsi mu Bisesero

Yanditswe na Rabbi Malo Umucunguzi
Kuya 17 Ugushyingo 2017 saa 08:28
Yasuwe :
0 0

Imiryango Iharanira ko abagize uruhare muri Jenoside yakorewe abatutsi bashyikirizwa ubutabera, yababajwe no kuba u Bufaransa bwaradohotse mu gushaka ukuri ku ruhare rw’Abafaransa muri Jenoside yakorewe Abatutsi mu Rwanda mu gihe bwasaga n’ubutangiye gukusanya ibimenyetso.

Kuwa 31 Ukwakira nibwo umucamanza mu bujurire mu Rukiko rwa Paris, yemeje ko urukiko rutazumva ubuhamya bw’uwari Umugaba w’Ingabo z’u Bufaransa mu gihe cya Jenoside, Jacques Lanxade n’uwari umwungirije ashinzwe ibikorwa General Raymond Germanos.

Ni igikorwa imiryango irimo Survie, FIDH na LDH ivuga ko ari rutangira ku bikorwa bigamije gushaka ukuri ku ruhare abayobozi ba politiki n’igisirikare mu Bufaransa bagize mu bwicanyi bwakorewe mu Bisesero, ubwo Ingabo z’Abafaransa zatereranaga abatutsi kandi zarabonaga neza ko basumbirijwe n’interahamwe.

Kutagira ikibazwa abayobozi bakuru b’Ingabo b’u Bufaransa ngo bishobora kuganisha ku iherezo ry’iryo perereza.

Kuwa 27 Kamena 1994 nibwo Abatutsi bari bahungiye mu Bisesero babonye Abafaransa bahatungutse, babasaba kubarinda ariko ntibabatega amatwi, barababwira ngo bakomeze bihishe bazagaruka nyuma y’iminsi itatu baje kubatabara, barabahendahenda baranga.

Bagitirimuka, haje ibitero byica Abatutsi barenga 4000 muri 6000 birenga bari bahasigaye, nyarama Ingabo z’Abafaransa zari zageze mu Rwanda zitwaje indege z’intambara zirenga 30, abasirikare 2400 n’ibindi bikoresho bihambaye ku buryo iyo baba bazanywe n’ubutabazi bitari bubananire.

Abafaransa ngo bagarutse mu Bisesero kuwa 30 Kamena 1994 uwicwa yamaze kwicwa, bafata abakomeretse cyane babatwara mu ndege ntoya i Goma ahitwa i Gituku.

Mu iperereza ryakorwaga ku byabereye mu Bisesero, ni “ukureba niba uko gukererwa iminsi itatu uhereye ku gihe baboneye Abatutsi mu Bisesero n’igihe bahagarukiye, bitagize ubufatanyacyaha ku byaha bya jenoside n’ibyaha byibasiye inyokomuntu byakorewe abatutsi bari bahungiye mu Bisesero, bakaza kwicwa n’interahamwe n’ingabo za leta y’icyo gihe.”

Guhera mu 2015, imiryango iharanira ubutabera yasabye ko Amiral Lanxade na Général Germanos bazumvwa n’umucamanza uri gukurikirana icyo kibazo.

Gusa ku wa 31 Ukwakira, urukiko rw’ubujurire rwashimangiye umwanzuro wari wafashwe kuwa 28 Kanama, ko abo basirikare bakuru bayoboraga ingabo z’u Bufaransa batazumvwa muri icyo kirego.

Washingiye ku buryo amategeko muri izo ngabo yahererekanywaga, aho ngo Général Jean-Claude Lafourcade wayoboraga ingabo zari muri Operation Turquoise ari we utanga amabwiriza ku bamwungirije, ku buryo bari bafite ubwigenge busesuye, bityo byaba bidafite ishingiro kumva ubuhamya bw’abayoboreraga ingabo mu Bufaransa.

Ibyo byiyongera ku kuba ubuhamya imiryango iharanira ubutabera yasabye ko bwazatangwa guhera mu 2015 butarigeze butangwa ku buryo iperereza ryasinziriye, ndetse n’inyandiko zikomeye zagombaga gutuma uko ibintu byagenze kumvikana kurushaho, ntizigeze zishyirwa ahagaragara na Minisiteri y’Ingabo mu Bufaransa.

Mu itangazo iyi miryango yashyize ahagaragara, yagize ati “Kwanga gukurikirana abantu bose n’abayobozi bakomeye mu ngabo z’u Bufaransa bagize uruhare muri ibyo bikorwa, bikomeye bibangamiye iperereza rigamije kugaragaza ukuri ku ruhare rw’abayobozi ba gisirikare na politiki ku bwicanyi bwabereye mu Bisesero.”

Iyo miryango ivuga ko na nyuma y’imyaka 23, bigisa n’aho kugaragaza impamvu nyayo y’ishyirwaho rya Opération Turquoise no kugaragaza uruhare rw’abayobozi b’Abafaransa muri Jenoside yakorewe abatutsi mu 1994 bigisa n’ikizira.

Ubwo yumvwaga muri Mutarama 2016, uwayoboraga ubutumwa bwa Operation Turquoise, Général Jean-Claude Lafourcade yafashwe nk’umutangabuhamya ufasha urukiko kimwe na batatu bari bamwungirije, ku buryo we atari mu mwanya wo guhatwa ibibazo.

Imiryango itandukanye ivuga ko imaze imyaka ibiri isaba ko hakumvwa n’ubuhamya bwa François Léotard wari Minisitiri w’Ingabo kimwe no gukurikirana abandi basirikare bagenda bashyirwa mu majwi.

Iri perereza rigenda biguru ntege mu gihe mu Ugushyingo 2016, Ubushinjacyaha bw’u Rwanda bwatangiye iperereza ku ruhare rw’abasirikare bakuru b’u Bufaransa 20 bakekwaho ko bagize muri Jenoside yakorewe Abatutsi muri Mata 1994.

Ni igikorwa cyatangijwe nyuma y’uko mu Ukwakira umwaka ushize, Komisiyo y’igihugu yo kurwanya jenoside yatangaje ko abategetsi benshi b’u Bufaransa bagize uruhare muri Jenoside yakorewe Abatutsi, haba mu kuyitegura, kuyikora cyangwa mu kugambana, ariko bakaba badashaka ko ibyo bakoze bijya ahagaragara.

Icyo gihe yanasohoye urutonde rw’abasirikare 22 n’uruhare bakekwaho muri jenoside yakorewe abatutsi, barimo na Lafourcade wari umuyobozi w’ikirenga w’ingabo z’abafaransa zari muri Turquoise kuva tariki 22 Kamena kugeza 22 Kanama 1994. Abo basirikare bashinjwa ko bafatanyije n’abayobozi bariho mu gukora jenoside.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza