Ikoreshwa nabi ry’umutungo? Umuzimu waritse muri Kaminuza zigenga mu Rwanda utuma zitamara kabiri

Yanditswe na Akayezu Jean de Dieu
Kuya 23 Mutarama 2021 saa 09:48
Yasuwe :
0 0

Abanyarwanda bo ha mbere bagiraga umuco wo gutera inzuzi bakabaza abakurambere impamvu ibyo bateguye gukora bitari kugenda uko babiteganyaga. Ubanza hageze ngo abahanga bajye kutubariza bamenye umuzimu wateye muri kaminuza zigenga mu Rwanda ngo hamenyekane impamvu ituma zifungwa nyuma y’iminsi mike zitangiye gukora.

Mu 2017, hadutse inkundura y’ifungwa rya Kaminuza zigenga zakoreraga ku butaka bw’u Rwanda, icyo gihe zafungiwe kutuzuza ibisabwa ngo zitange ireme ry’uburezi ryifuzwa.

Ku isonga y’ibyatumye izi kaminuza zifungwa harimo ibibazo by’imiyoborere, ibyo gukoresha nabi umutungo, kutagira abakozi bahagije, abarimu bake cyangwa se n’abahari ugasanga bafite indi mirimo mu zindi bityo ntibabashe kwigisha neza.

Ibindi bibazo byagiye bigaragara muri izo kaminuza harimo ibikoresho bike, kudahemba abakozi n’abarimu n’ibindi.

Ubusanzwe kugira ngo ishuri cyangwa kaminuza runaka ifungwe hashingirwa ku bipimo by’ireme ry’uburezi ritanga, imibereho y’abarimu n’abanyeshuri.

Mu Ukwakira 2017, icyo gihe Inama Nkuru y’Amashuri Makuru na za Kaminuza, HEC, yatangaje ko yafunze burundu Rusizi International University na STES (Singhad), Nile Source Poltyechnic of Applied Arts, Open University of Tanzania na Mahatma Ghandi University.

Muri uwo mwaka kandi hari Kaminuza ya Jomo Kenyatta yo yandikiye HEC ivuga ko ihagaritse gukorera mu Rwanda. Ibi ariko byaje nyuma y’uko yari yakorewe igenzura bikagaragara ko hari ibyo itari yujuje.

Icyo gihe uwari Minisitiri w’Uburezi, Dr. Papias Musafiri Malimba, yatangaje ko nubwo iki cyemezo cyagize ingaruka nyinshi ku banyeshuri, ariko ari na bo gifitiye akamaro kuko ngo nibasubira ku ishuri bazahabwa ireme ry’uburezi ryazabagirira akamaro.

Igenzura ryakozwe mu 2017, ryasize kandi hari izindi kaminuza zihagarikiwe amashami atandukanye ahanini biturutse ku kuba zidafite ubushobozi bwo kuyatanga hashingiwe ku bikoresho.

Rwasibiye aho ruzanyura?

Nyuma y’imyaka itatu habaye iyo nkundura yo gufunga Kaminuza zitujuje ibisabwa, HEC yarongeye ikora ubugenzuzi bugamije kureba niba zimwe muri Kaminuza zari zasabwe kuzuza ibisabwa zarabikoze.

Umwaka wa 2020, usa n’uwatunguye benshi mu ngeri zitandukanye aho kaminuza eshatu zafunzwe burundu mu gihe indi imwe yahisemo gufunga imiryango aho gutegereza ko Minisiteri y’Uburezi yizanira ingufuri zayo.

Ku wa 3 Ugushyingo 2020, nibwo iyahoze ari Kaminuza yigenga ya KIM, yashyize ahagaragara ibaruwa ivuga ko ifunze imiryango kubera ibibazo by’amikoro bishingiye ku kugabanyuka k’umubare w’abanyeshuri bajyaga kuyigamo.

KIM University yari imaze imyaka isaga 14 ikorera mu Mujyi wa Kigali mu Karere ka Kicukiro mu Murenge wa Nyarugunga, dore ko yashinzwe mu 2006 yitwa Kigali Institute of Management, iza guhindura izina mu 2015 yitwa KIM University.

Ubwo yafungaga imiryango, umwe mu bayobozi bayo yabwiye IGIHE ati “Tubikoze kugira ngo tureke gukomeza gutesha igihe abanyeshuri bategereje kandi tubona bitari mu nzira yo gukemuka vuba (ibibazo by’amikoro).”

Ifunga rya KIM ryaje rikurikira icyemezo cya Minisiteri y’Uburezi cyo gufunga burundu Ishuri Rikuru Ndangaburezi rya Ruhango [College Indangabureziri], ryatangaga amasomo y’uburezi, Kaminuza ya Kibungo izwi nka INATEK ndetse na Kaminuza yari izwi nka CHUR [Christian University].

Nyuma y’uko CHUR na INATEK zifunzwe, abayobozi bazo bahise bakurikiranwaho ibyaha bitandukanye bishingiye ku madeni bari baragiye bajyamo kubera izo kaminuza bari baratangije.

Nka Dr Pierre Damien Habumuremyi washinze Christian University mu Ugushyingo 2020, yakatiwe gufungwa imyaka itatu ahamijwe icyaha cyo gutanga sheki zitazigamiye, anacibwa ihazabu ya miliyoni 892 n’ibihumbi 200 Frw.

Mu rukiko byavuzwe ko Dr Habumuremyi yahaye sheki zitazigamiye abantu batandukanye n’izindi yashyizeho umukono mu izina rya kaminuza ye.

Inama Nkuru y’Amashuri Makuru na za Kaminuza, HEC, yifuza ko abagiye gutangiza za kaminuza bazajya basabwa ibyangombwa birimo kugaragaza ubushobozi no kugira nibura inzu zo gukoreramo aho gukorera mu bukode.

Mu kiganiro Minisiteri y’Uburezi n’Ibigo biyishamikiyeho baherutse kugirana n’abanyamakuru hasobanuwe ko iki kibazo cya kaminuza zifungwa n’izifunga imiryango kiri kuvugutirwa umuti ku buryo burambye.

Dr Mukankomeje Rose uyobora HEC ati “Ahenshi twasanze nyine amafaranga atarimo, abarimu badahembwa, iyo umwarimu atahembwe murabizi ntabwo yigisha neza, iyo atahembwe nawe ajya gushaka uko abaho, ireme ry’uburezi rikagira ingorane.”

Avuga ko kuri ubu abajya gufungura amashuri mashya cyangwa abari bayafite yafunzwe basaba gukomorerwa, basabwe kujya babanza kwishyura amadeni babereyemo abakozi babo barimo n’abarimu.

Ati “Twabasabye ko babanza bakishyura amadeni barimo, nibura umwarimu wigishije akajya gutangira ideni bararimwishyuye, hari ababikoze ariko hari abo byananiye, umuntu bamurimo miliyoni 8 Frw cyangwa 10 Frw ugasanga bamwishyuye ebyiri gusa. Hari abo twanze gufungurira kuko twasanze dushobora kubafungurira bya bibazo bikagaruka.”

Yakomeje agira ati “Abagiye gutangira amashuri mashya twifuza ko nibura baba bafite aho bakorera, kuko usanga amafaranga menshi agendera mu bukode ugasanga bishyura miliyoni 20 Frw cyangwa n’arenga miliyoni 30 Frw. Uretse ko izafunze zose atari ko zitari zifite aho zikorera.”

Bivugwa ko ubusanzwe Kaminuza kugira ngo yemererwe gutangira isabwa kwishyura imari shingiro ingana na miliyari 1 Frw. Ku bijyanye n’ikiguzi cy’uburezi usanga nibura muri kaminuza zigenga mu Rwanda abanyeshuri bishyura hagati y’ibihumbi 350 Frw na 800 Frw.

Dr Mukankomeje avuga ko hari amashuri aba ategereje ko afungurirwa kugira ngo abanyeshuri bishyure amafaranga y’ishuri noneho ubuyobozi buyafate bwishyure imyenda bubereyemo abantu. Avuga kandi ko ikindi gikomeye basaba abashora imari muri za kaminuza ari ukuba bafite ubushobozi.

Ati “Ni ukuvuga ngo amafaranga umunyeshuri atanga uyu munsi, barayakoresha bajya kwishyura amadeni ya kera. Ukamubaza uti ese ko ikiguzi cy’uburezi niba usaba amafaranga y’ishuri ibihumbi 500 Frw cyangwa 600 Frw, nayatanga ukajya kwishyura wa mwarimu cyangwa uwaguhaye ibikoresho mbere, wa mwana aziga ate?”

HEC ivuga ko kuri ubu hafashwe ingamba zikarishye zizatuma nta muntu wongera kubaca mu rihumye ngo atangize kaminuza adafite ubushobozi aho uzajya ajya kuyitangiza azajya yerekana ko afite amafaranga ashobora kwifashisha ahemba abakozi mu gihe habayeho ikibazo.

KIM University iheruka gufunga imiryango kubera ibibazo by'amikoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .