Ikizamini cy’Icyongereza cyaba kigiye kubika imbehe y’abarimu bamwe?

Yanditswe na Ferdinand Maniraguha
Kuya 27 Kanama 2018 saa 11:10
Yasuwe :
0 0

Minisiteri y’Uburezi iri kunoza gahunda y’ikizamini cy’Icyongereza kigiye kujya gihabwa abarimu bigisha mu mashuri makuru na za Kaminuza.

Ni icyemezo cyakurikiye umwanzuro w’Umwiherero w’Abayobozi bakuru b’Igihugu wabaye kuva ku wa 26 Gashyantare kugeza ku itariki ya 1 Werurwe 2018, uvuga ko Icyongereza kigomba kugirwa isomo ryigishwa mu myaka yose ya kaminuza.

Imyaka ibaye icumi Icyongereza kigizwe ururimi rwo kwigishwamo mu mashuri yo mu Rwanda.

Umuyobozi Mukuru w’Inama y’amashuri makuru na za Kaminuza (HEC) Dr Muvunyi Emmanuel, mu kiganiro yagiranye na IGIHE, yavuze ko hari kunozwa gahunda y’uburyo abarimu bahabwa ikizamini cy’Icyongereza, hakamenyekana urwego bariho.

Muvunyi avuga ko iyo gahunda intego ya mbere atari ukwirukana abarimu nkuko bamwe babitekereza.

Yagize ati “Abarimu ba Kaminuza kimwe n’ab’amashuri yisumbuye, bazasabwa gukora ibizamini by’Icyongereza kugira ngo bigaragaze urwego bariho, banasabwe kuba bashyira imbaraga mu kwitoza mu rurumi rw’Icyongereza ariko bakajya bagira igihe mu mwaka nka gatatu cyangwa kabiri bakora ibizamini, bakareba uko bazamuka.”

Umwarimu uzafashwa kuzamura urwego ariho mu Cyongereza bikaza kugaragara ko ntacyo yiyongera, Dr Muvunyi avuga ko ashobora kwirukanwa.

Ati “Niba uyu munsi ukoze ikizamini ukaba ugeze kuri uru rwego, ubutaha nugikora urasabwa kuzamuka ukaba ugeze ku rundi rwego kugeza igihe uzagera ku rwego rukenewe.”

“Ngira ngo hazaba igihe runaka aho uzaba utageze kuri urwo rwego azaba adashobora gukomeza kwigisha kuko ugomba kuba ufite urwo rwego kugira ngo ushobore kwigisha.”

Si abarimu gusa bazasabwa gukora ikizamini kuko n’abanyeshuri bagiye kwinjira muri Kaminuza mu masomo basabwa kuba batsinze neza hagomba kuba harimo Icyongereza.

Kwinjira muri Kaminuza nabwo hazajya hakorwa ikindi kizamini kigaragaza ubumenyi bw’umunyeshuri mu Cyongereza, akomeze gufashwa na Kaminuza hashingiwe ku rwego ariho.

Kugira ngo umunyeshuri asohoke muri Kaminuza nabwo azajya abanza gukora ikizamini cy’Icyongereza nagitsindwa asabwe gusubiramo kugira ngo ahabwe impamyabumenyi.

Kaminuza zose zaba izigenga zasabwe gushyiraho Laboratwari igezweho ifasha abanyeshuri n’abarimu kumenya ururimi rw’Icyongereza.

Dr Muvunyi yavuze ko hari ibiganiro n’ibigo mpuzamahanga bizobereye mu gutegura ibizamini by’Icyongereza ku buryo byatanga umusanzu.

Ati “Turimo kuganira na British Council n’abandi bazi gutanga bya bizamini bitangwa ku Isi ku buryo ukoze icyo kizamini nanjye nkagikora bakaduha amanota amwe, biba bigaragaza ko turi ku rwego rumwe.”

Ibyishimo n’impungenge ku barimu

Umwarimu mu Ishuri ry’itangazamakuru n’itumanaho rya Kaminuza y’u Rwanda, Prof Raphaël Nkaka, yavuze ko aho gushyira imbaraga mu gutanga ikizamini ahubwo zashyirwa mu kwigisha.

Yagize ati “Gutanga ikizamini ubwabyo simbona ko ari cyo gisubizo ahubwo kucyigisha. Niba babona ari gike bacyigisha kurusha uko batanga ikizamini ariko bagitanze ni uburenganzira bwabo kandi ni inshingano zacu zo kugikora.”

Prof Nkaka yavuze ko abantu badashobora kunganya ubumenyi mu rurimi, ahubwo ko uwagaragaza ubumenyi buke yafashwa kubwongera aho kumwirukana.

Ati “Uwagira make yahabwa izindi nyigisho kugira ngo azamure urwego aho kugira ngo bamwirukane kuko ururimi rurigwa kandi abantu ntibarumenya ku buryo bureshya. N’Ikinyarwanda cyacu nacyo ntitukizi ku buryo bureshya, indimi ntabwo abantu bazimenya ku buryo bungana.”

Umuyobozi Mukuru wungirije ushinzwe amasomo muri Kaminuza y’ubukererugendo n’ubucuruzi (UTB), Dr Tombola Gustave, akurikije igihe kwigisha mu Cyongereza byatangiriye, nta mwarimu wakabaye yigisha muri Kaminuza atarakimenya.

Ati “Kuva 2010 kugeza ubu, niba hari umwarimu uri muri Kaminuza utazi Icyongereza kandi byitwa ngo nicyo yigishamo, ntabwo yakabaye akihigisha.”

Tombola avuga hashyizweho gahunda zigamije gufasha abarimu kongera ubumenyi mu Cyongereza ku buryo uwaba atarabikoze byaba ari ubushake bwe.

Guverinoma y’u Rwanda yatangije gahunda yo kwigisha mu Cyongereza mu 2008, igamije guha amahirwe abanyarwanda kwisanga mu Isi y’ubukungu n’ubucuruzi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza