Ikipe ya Arsenal igiye kwamamaza ubukerarugendo bw’u Rwanda mu gihe cy’imyaka itatu

Yanditswe na Rabbi Malo Umucunguzi
Kuya 23 Gicurasi 2018 saa 08:59
Yasuwe :
6 0

Ikigo cy’Igihugu cy’Iterambere mu Rwanda, RDB, binyuze mu kigo gishinzwe guteza imbere ubukerarugendo bushingiye ku nama, Rwanda Convention Bureau, cyinjiye mu bufatanye n’ikipe ya Arsenal FC yo mu Bwongereza, bugamije kumenyekanisha u Rwanda nk’icyerekezo gikomeye cy’ubukerarugendo, binyuze mu gushyira ikirango cy’u Rwanda ku maboko y’imyenda yayo.

Iyi kipe iri mu zifite abafana benshi ku Isi ni imwe mu zikunzwe mu Rwanda, ikaba ari nayo ifanwa na Perezida Paul Kagame ndetse muri Gicurasi 2014 yashyikirijwe impano zivuye muri Arsenal na Tony Adams wabaye kapiteni wayo.

Arsenal FC yatangaje ko muri aya masezerano y’imyaka itatu, u Rwanda rubaye umufatanyabikorwa wa mbere igize izajya yambara ku maboko, amagambo ‘Visit Rwanda’ akazagaragara ku kuboko kw’ibumoso guhera muri Kanama, ku mipira izakoresha mu mwaka wa shampiyona wa 2018/2019 ku mwambaro mushya wa Puma iyi kipe izaserukana washyizwe ahagaragara ku wa 22 Gicurasi 2018.

Aya masezerano ni bumwe mu buryo bugiye gukoreshwa mu kurushaho kugaragariza Isi amahirwe u Rwanda rufite mu bukerarugendo nka Pariki z’Igihugu zisurwa n’ibihumbi by’abakerarugendo bakeneye kureba urusobe rw’ibinyabuzima igihugu gifite, udasize amahirwe y’ishoramari cyihariye n’ibikorwa byo guteza imbere umupira w’amaguru.

Ubu u Rwanda ni kimwe mu bihugu bifite inyamaswa eshanu zikomeye muri Afurika cyangwa ‘Big Five’, muri pariki ukaba usangamo inyamaswa nk’Inkura, Intare, Imparage, Inguge n’Ingagi zitaba ahandi ku Isi.

Umuyobozi Ushinzwe Ubucuruzi mu Ikipe ya Arsenal, Vinai Venkatesham, yagize ati “Ubu ni ubufatanye bukomeye buzatuma dushyigikira gahunda y’u Rwanda yo kubaka urwego rw’ubukerarugendo. Iki gihugu kimaze kugira impinduka zikomeye mu myaka ishize kandi uburyo Arsenal ifanwa cyane bizashyira u Rwanda mu mitwe y’abantu mu buryo bushya kandi bukomeye.”

Yakomeje agira ati “Imyambaro ya Arsenal igaragara inshuro miliyoni 35 ku munsi ku Isi kandi turi imwe mu makipe arebwa cyane ku Isi. Dushimishijwe no gukorana n’itsinda rya ‘Visit Rwanda’ mu kurushaho kugira igihugu icyerekezo cya mbere mu bukerarugendo.”

Biteganyijwe ko aya magambo ‘Visit Rwanda’ azajya agaragara ku myambaro yose y’ikipe nkuru ya Arsenal, iy’abatarengeje imyaka 23 no ku myambaro y’ikipe y’abagore kugeza mu 2020/21.

Umuyobozi Mukuru w’Ikigo cy’Igihugu cy’Iterambere, RDB, Clare Akamanzi, yavuze ko u Rwanda rushimishijwe no gufatanya na Arsenal mu kugaragaza amahirwe n’ubwiza bw’u Rwanda, rushyize imbere gukora cyane no guhanga udushya.

Yakomeje agira ati “Sura u Rwanda umenye impamvu turi igihugu cya kabiri gifite ubukungu bwihuta cyane muri Afurika. Abashoramari mu Rwanda babasha kwandikisha ubucuruzi mu masaha atandatu gusa kandi bitegura kuryoherwa n’amahirwe yo gufungirana ubucuruzi twasinyanye n’ibihugu bisaga 50.”

Uyu muyobozi yavuze ko abasura u Rwanda, uretse igikorwa cyo gusura ingagi kimaze kuba umwihariko mu gihugu, baryoherwa n’imikino yo mu mazi, kunyonga amagare, kureba inyoni n’ibindi.

Abakinnyi ba Arsenal bategerejwe i Kigali

Mu itangazo yashyize ahagaragara, Arsenal FC yakomeje igira iti “Abakinnyi bo mu makipe yacu y’abagabo n’abagore bazasura u Rwanda ndetse abatoza bacu bazakira amahugurwa agamije gushyigikira iterambere ry’umupira mu bagabo n’abagore muri icyo gihugu.”

Biteganywa ko ‘Visit Rwanda’ izajya itakwa ku byapa by’imbere muri Emirates Stadium ku munsi w’imikino, ku byapa bigaragara inyuma y’aho batangira ibiganiro n’abanyamakuru no mu bindi bikorwa by’imenyekanisha rikorwa na Arsenal.

Aya masezerano kandi ateganya ko itsinda ry’u Rwanda rizajya rigira umwanya wo kuganira n’abafana ba Arsenal hirya no hino ku Isi, binyuze ku mbuga nkoranyambaga z’ikipe ya Arsenal.

Mu mwaka ushize u Rwanda rwagize abashyitsi bagera kuri miliyoni 1.3, barimo 94,000 basuye pariki eshatu z’igihugu zirimo iya Nyungwe, iy’Akagera na Pariki y’Igihugu y’Ibirunga.

Ubukerarugendo kandi bumaze guhanga imirimo 90,000 bukaba ari imwe mu nzira zikomeye u Rwanda rukuramo amadevize.

Guverinoma yiyemeje gukora ibishoboka ngo mu 2024 inyungu u Rwanda ruvana mu bukerarugendo izabashe kwikuba kabiri igere kuri miliyoni $800 zivuye ku zigera kuri miliyoni $440 nk’intego yari yihawe mu mwaka ushize.

Bimwe mu bimaze gukorwa harimo nka filimi mbarankuru, Rwanda:The Royal Tour aho Perezida Kagame aba yereka Peter Greenberg ibyiza bitatse u Rwanda, nayo ikomeje kwerekanwa hirya no niho ku Isi.

Ubu bufatanye bw’u Rwanda na Arsenal FC kandi buzunganirwa na National Geographic, nayo izakoresha uburyo bwayo mu kumenyekanisha u Rwanda nk’icyerekezo cy’ubukerarugendo.

Nubwo hatatangajwe amafaranga u Rwanda rwishyuye Arsenal FC, ugendeye ku yandi makipe akomeye mu Bwongereza yamamaza ku kuboko, nka Western Union yishyura Liverpool amasezerano afite agaciro ka miliyoni 5$ ku mwaka, Manchester City yamamaza Nexen Tire na Chelsea yamamaza Alliance Tyres zishyurwa agera kuri miliyoni 8$ ku mwaka.

Mesut Ozil, Alexandre Lacazette na Pierre-Emerick Aubameyang nibo bagaragaye ku mafoto y'itangazwa ry'ubu bufatanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza