Ikipe y’u Rwanda yitabiriye imikino y’abafite ubumuga muri Brazil (Amafoto)

Yanditswe na Philbert Girinema
Kuya 2 Nzeri 2016 saa 09:51
Yasuwe : XX
0

Ikipe y’Igihugu ya Sitting Volleyball igizwe n’abakinnyi 12 yageze i Rio de Janeiro muri Brazil yitabiriye imikino Paralempike (Paralympic Games) izatangira kuva tariki 7-18 Nzeli 2016.

Aba bakinnyi bari kumwe n’ababaherekeje barimo Nsengiyumva Jean Marie Umutoza wungirije w’Ikipe y’Igihugu ya Sitting Volleyball, Sibomana Aimable utoza Muvunyi Hermas, umuganga Nkurayija Jean Pierre na Angelique Niragire ushinzwe ubuzima bw’abakinnyi (Team manager).

Muvunyi Hermas ufite ubumuga bw’ingingo azasiganwa muri Metero 400 na 1500 mu gihe abandi bazaba bakina Sitting Volley Ball.

Iyi kipe kandi yanaherekejwe na Bizimana Dominique wahoze ari Umuyobozi wa Komite y’Igihugu y’Imikino y’abafite ubumuga (NPC Rwanda), ariko ubu akaba ari muri Komite Mpuzamahanga y’Imikino y’Abafite Ubumuga (IPC) aho ashinzwe iterambere ry’imikino y’abafite ubumuga muri Afurika, Dr Mutangana Dieudonne ushinzwe iterambere rya siporo n’amarushanwa muri NPC Rwanda na Nzeyimana Celestin Umuyobozi wa NPC Rwanda bakaba basanze yo Karasira Eric wari waragiye gutegura urugendo.

Nk’uko twabitangarijwe n’Ushinzwe itangazamakuru uri kumwe n’iyi kipe, Bakomere Pascal, Umutoza Mukuru w’Ikipe y’Igihugu ya Sitting Volleyball Peter Karreman ubusanzwe ubarizwa mu Buholandi na we biteganyijwe ko azagera muri Brazil tariki ya 4 Nzeli 2016 agakomezanya imyiteguro n’iyi kipe yajyanye intego yo gushaka umudali uyu mwaka.

Ikipe y’u Rwanda ya Sitting Volleyball izakina umukino wa mbere kuwa Gatandatu tariki ya 10 Nzeli 2016 aho izahura n’u Bushinwa guhera saa yine za mu gitondo z’i Rio de Janeiro arizo saa cyenda z’i Kigali, umukino wa kabiri uzaba kuwa 12 Nzeli aho Ikipe y’u Rwanda izahura na Iran, u Rwanda ruzongera guhura na Amerika kuwa 14 Nzeli 2016.

Itsinda rihagarariye u Rwanda rirakirwa ku mugaragaro kuri uyu wa Gatanu tariki ya 2 Nzeli 2016 saa kumi z’i Rio de Janeiro ari zo saa tatu z’ijoro z’i Kigali.

Muri 2012 nibwo Ikipe y’Igihugu y’Abagabo yitabiriye bwa mbere imikino Paralempike yabereye i Londres mu Bwongereza, itsinda igihugu kimwe gusa ari cyo Maroc.

Icyo gihe yari yabonye itike iserukiye ibihugu byo munsi y’ubutayu bwa Sahara naho bitandukanye n’uyu mwaka aho igiye muri Brazil iserukiye umugabane wa Afurika nyuma yo gutsinda Misiri mu mikino yo gushaka iyi tike yabereye mu Rwanda muri 2015.

Umutoza wungirije w'Ikipe y'Igihugu ya Sitting Volleyball Nsengiyumva Jean Marie na Nzeyimana Celestin Umuyobozi wa NPC Rwanda [Ibumoso] bari mu rugendo
Muvunyi Hermas umwe mu bakinnyi bategerejweho kuzana umudali
Hon. Rwaka Claver ni umwe mu baje gusezera ku bakinnyi b'ikipe y'Igihugu mbere yo kwerekeza muri Brazil

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza