00:00:00 IGIHE NETWORK KN KINYARWANDA EN ENGLISH FR FRANCAIS

Icyihishe inyuma y’ubuhezanguni bwa Rashid, Idamange, Karasira, Cyuma n’abandi

Yanditswe na Musangwa Arthur
Kuya 2 Nzeri 2021 saa 01:55
Yasuwe :
0 0

Burya koko abo umwami yahaye amata nibo bamwimye amatwi! Bijya bibaho ko umubyeyi arera umwana we mu buryo bukwiriye, akamuha byose afite kugira ngo akure neza, ariko wa mwana akazakura atabibona, akaba ikirumbo, agahombera umuryango nyamara waramushoyemo byinshi.

Iyo bagize bati ‘Rwanda ngobyi iduhetse’, byumvikanisha ko ishyano nk’iri rishobora no kugwirira igihugu, gishobora gushyira imbaraga zose mu kurera abana bacyo, ariko bamara gukura bageze hamwe bagatangiye kucyitura, bagahitamo kugitera umugongo bameze nka bamwe batema amashami y’igiti bicayeho.

Kenshi uzasanga bene abo bemera guhara igihugu bagahitamo indonke, nubwo n’ubundi zitabuze mu gihugu, ariko kutanyurwa no kutagira intego zo guharanira iterambere, bigatuma bahitamo inzira y’ubusamo ibaganisha ku bukire bwihuse.

Bimwe mu bizakubwira abagengwa n’ayo maco y’inda, harimo kwemera gutoneka igihugu bagoreka amateka ya Jenoside yakorewe Abatutsi mu 1994, atari uko batazi ukuri, bagahitamo kugupfukirana kugira ngo baramuke kabiri.

Uherutse kwaduka muri aba ni Hakuzimana Abdou Rashid, umaze iminsi yumvikana ku mbuga nkoranyambaga zirimo YouTube, avuga ko ‘ihanurwa ry’indege yari itwaye Perezida Habyarimana mu 1994, ari ryo ryabaye intandaro ya Jenoside’.

Uyu ariko amenyekanye vuba aha kuko mbere ye, hari abarimo Idamange Iryamugwiza Yvonne ukurikiranyweho ibyaha birimo guteza imvururu cyangwa imidugararo muri rubanda, guteza imvururu muri rubanda, gutanga amakuru y’ibihuha yifashishije ikoranabuhanga no gupfobya jenoside.

Barimo kandi Uzaramba Karasira Aimable, nawe ukurikiranweho ibyaha birimo guhakana no guha ishingiro Jenoside yakorewe Abatutsi mu 1994, gukurura amacakubiri no kudasobanura inkomoko y’umutungo.

Abandi barimo uwitwa Niyonsenga Dieudonné [Cyuma Hassan], Théoneste Nsengimana ufite ikinyamakuru cyitwa ‘Umubavu’, Agnès Uwimana Nkusi ufite igitangazamakuru cyitwa ‘Umurabyo’ n’abandi.

Abasesengura politiki n’ibijyanye n’amategeko bagaragaza ko hari impamvu zigera kuri enye zituma aba bantu n’ababayobotse bahitamo umurongo wo kugomera igihugu cyabo. Ibintu bavuga ko bikwiye gukumirwa mu buryo bwose bushoboka.

Ingengabitekerezo ihuriweho

Mu kiganiro na IGIHE, Umwarimu muri kaminuza, Karangwa Sewase Jean Claude, yavuze ko ibikorwa by’aba bantu bigamije kongera kwimakaza ingengabitekerezo ya ‘Hutu Power’.

Ati “Biriya byose barimo kugarura ni ibishingiye ku ngengabitekerezo ya ‘Hutu Power’ yagiye ikwirakwizwa guhera ku mwaduko w’Abakoloni. Bakaba bari mu murongo wa ‘Mbacemo ibice mbayobore.’”

Yakomeje agira ati “Aba rero nta yindi ntego, ni ukugira ngo twongere dusubira mu kaga twabayemo ubwo hadukaga Interahamwe. Iyo usesenguye imikorere yabo usanga ihura neza na za ngengabitekerezo zubatswe na ba Gitera na ba Kayibanda mu myaka ya 1959.”

Umushakashatsi kuri Jenoside yakorewe Abatutsi, akaba n’umusesenguzi mu bijyanye n’amategeko, Tom Ndahiro, yavuze ko benshi muri aba bagaragara mu bikorwa byo gushaka gusubiza igihugu inyuma, usanga bahuriza ku kintu kimwe cyo gushaka guhakana, gupfobya no guha ishingiro Jenoside, nk’imwe mu ngingo ifite ubusobanuro bukomeye ku gihugu.

Ibi bigaragazwa n’uburyo abarimo nka Karasira batawe muri yombi bageze ku rwego rwo gutuka ubuyobozi bw’igihugu ku mugaragaro, ndetse no kubugereranya n’ubundi buzwi nk’ubwa MRND yateguye ikanashyira mu bikorwa Jenoside yakorewe Abatutsi, ari nako ayipfobya avuga ko ari bo bizize, akongeraho no kugereka ubwicanyi ku ngabo za FPR zahagaritse Jenoside yakorewe Abatutsi.

Ndahiro ati “Bose bafite ingengabitekerezo bahuriyeho, uzi abantu bahuriye mu cyaha? Iyo urebye imikorere yabo ubona bakora nk’agatsiko k’abahuje umugambi wo gukora icyaha.”

Inda nini ntikwiye amayira

Mu byaha Karasira Aimable akurikiranyweho harimo n’icyo kutabasha gusobanura inkomoka y’umutungo w’amafaranga asanga miliyoni 30Frw yasanganywe iwe mu rugo no kuri konti ze za Mobile Money.

Karasira ariko ntabwo ari wenyine kuko ari kenshi havuzwe ibikorwa nk’ibi by’abantu bakira amafaranga aturutse mu mahanga, bigakekwa ko aba agamije kugusha neza abo bantu kugira ngo abanzi b’igihugu babanyuzemo amatwara yabo.

Ndahiro ati “Ni inyungu babonamo, hari amafaranga bahabwa na YouTube ariko hari n’ava mu mahanga, ibyo ntabwo nabihamya ariko mu magambo yabo uba usanga babivuga […] ngo abadufasha abagira bate, cyane cyane Agnes we akunda kubivuga.”

Karangwa yunzemo ati “Aba bose bahabwa amafaranga n’ubushobozi bwo kugira ngo bakore ibikorwa byabo, ikimenyetso kirahari ni uko Ubushinjacyaha bwagaragaje ko uwitwa Agnes Uwimana yahawe amafaranga na Rusesabagina Rusesabagina nawe yari afite abamuha amafaranga, aba rero ni abakozi ba mpatse ibihugu, batifuza ko hari igihugu cya Afurika kigira amahoro.”

Avuga ko hari ingero nyinshi z’abantu bakoreshwa na ba mpatse ibihugu bitifuza amahoro n’umutekano muri Afurika.

Ati “Ni kimwe n’aba ba Rusesabagina na ba Sankara, ubu se aho ari i Mageragere, ugira ngo gufungwa ni ikuzo cyangwa ubutwari? Baba bakoreshwa babizeza ko bazabafata bakabagira ibitangaza, rero bakwiye kureba ingero zihari z’abafashwe nabo bakirinda ko bazagwa muri uwo mutego.”

Ikiraro cy’abifuza gusenya ubumwe bw’Abanyarwanda

Muri Werurwe 2021, ubwo Idamange yari amaze gutabwa muri yombi, hari benshi mu Banyarwanda n’ababashyigikiye bagaragaye mu mijyi nka Paris bavuga ko barimo kwigaragambya bamagana ifungwa ry’uyu mugore.

Karangwa avuga ko uretse Idamange n’abandi byagiye bigaragara ko bafite abantu babakoresha bagamije guhungabanya ituze ry’Abanyarwanda no gushaka gusenya ibyagezweho.

Ati “Aba ngaba rero ubona ba Rachid na ba Agnes baza bakoreshwa kugira ngo bamunge ibitekerezo by’Abanyarwanda, bakoreshwa kugira ngo bongere bacemo ibice Abanyarwanda, hongere haduke ugukimbirana kw’Abanyarwanda.”

Ibihano bikwiye gukarishywa

Kenshi ibikorwa nk’ibi byo gusebya igihugu ndetse no kugoreka amateka, bikunze kuba mu isura y’uburenganzira bwa muntu, ariko Tom Ndahiro akavuga ko iyo uburenganzira bwa muntu bwatangiye kugoreka amateka y’igihugu, biba byahinduye isura.

Yagize ati “Kurwanya aba bantu, bagafatwa bagashyikirizwa ubucamanza, njyewe mbifata nko kuzimya igishashi cy’umuriro kiri ku nzu ya mugenzi wawe. Umuco wo kutabahana niwo utuma bakwirakwiza ingengabitekerezo ya Jenoside.”

Yakomeje agira ati “Umunyamakuru ashatse yanenga ibitagenda neza ariko iyo utangiye koroshya icyaha cya Jenoside, uvuga ko habayeho Jenoside ebyiri, niyo mpamvu hagiyeho amategeko abihana. Ibi bintu bakora hano ntabwo wabivuga kuri Jenoside yakorewe Abayahudi.”

Ubwisanzure bwo gutanga ibitekerezo ndetse n’ubwisanzure bw’itangazamakuru biteganywa n’Ingingo ya 38 mu Itegeko Nshinga rya Repubulika y’u Rwanda.

Hakuzimana Abdou Rashid amaze iminsi mike atangiye kumvikana mu mvugo zatunguye benshi
Abarimo Idamange baciye igikuba mu gihugu binyuze mu magambo bakwirakwije ku mbuga nkoranyambaga
Karasira Aimable wahoze ari umwarimu muri Kaminuza y'u Rwanda, afunzwe akurikiranyweho ibyaha birimo gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .