Kwamamaza

Ikigega BDF kigiye kwitabazwa mu rugamba rwo guca caguwa

Yanditswe kuya 17-09-2016 saa 09:29' na Cyprien Niyomwungeri


Guverinoma y’u Rwanda igiye kwifashisha ikigega gifasha imishinga mito n’iciriritse y’ubucuruzi, BDF, muri gahunda yo guca imyambaro ishyirwa ku isoko yarambawe n’abandi bantu, izwi nka caguwa.

Abakuru b’ibihugu by’Umuryango wa Afurika y’Uburasirazuba, EAC baheruka kwemeza guca burundu imyenda ya caguwa izanwa mu Karere, hakongererwa ubushobozi bwo gukora imyenda n’inkweto kuri ba rwiyemezamirimo bo muri ibi bihugu.

Mu birori byo kwizihiza isabukuru y’imyaka itanu BDF imaze ifasha imishinga mito n’iciriritse, byabaye mu ijoro ryo kuwa Gatanu tariki 16 Nzeli 2016, Minisitiri w’Ubucuruzi n’Inganda, François Kanimba, yavuze ko bagiye kwifashisha iki kigega mu gushyigikira ba rwiyemezamirimo bato badoda imyenda n’inkweto.

Yagize ati“Tuzifashisha BDF mu gufasha abadozi kwishyira hamwe bagakora, bakabona inguzanyo, bagahanga imirimo bityo bagafasha Leta guca Caguwa. Iyi kandi ni imwe muri porogaramu yanafasha benshi kuva mu bushomeri.”

Mu myaka itanu, BDF imaze gushora 62,689,952,320 z’amafaranga y’u Rwanda, zafashije imishinga y’ubucuruzi mito n’iciriritse 23,411, mu guhanga imirimo ibihumbi 145,222.

Muri zo, miliyari 50 zatanzweho ingwate zifasha abantu kubona inguzanyo ya miliyari 174,965,270,853 z’amafaranga y’u Rwanda.

Umuyobozi wa BDF, Innocent Bulindi, yavuze ko biteguye gukomeza gufatanya na Guverinoma kugeza gahunda z’iterambere ku Banyarwanda. Yemeza ko biteguye no gutanga umusanzu mu guca Caguwa nkuko bamaze kubikora bashyira mu bikorwa gahunda 16 zigamije kuzamura ibyiciro by’abasigajwe inyuma muri serivisi z’imari.

Yagize ati“ Turiteguye gufasha abadozi gushyiraho inganda nto, kubaha ibikoresho kandi twizeye ko bizabateza imbere bikanafasha gahunda yacu yo guca caguwa.”

Kugeza ubu urubyiruko rurenga 9000 n’abagore barenga 7000 bamaze guterwa inkunga na BDF muri gahunda zirimo guhabwa ingwate, ubujyanama n’ibindi.

Umwe mu bafashijwe nayo Nkurikiye Solange, avuga ko imaze gutuma agera ku kigero cyo gutunga imodoka za Coaster 15 kubera kwishingirwa ku ngwate.

Yagize ati “Mu 2014 nahawe ingwate ya 75% na BDF ngura Coaster eshanu, ubu babonye ko bigenda neza bongera kunyishingira mu Banki y’u Rwanda itsura amajyambere, BRD, bampa indi nguzanyo ngura izindi 10 zizatangira gukora vuba.”

Ku rundi ruhande ariko 11% by’inguzanyo BDF yishingiye ikaziha ingwate ntizishyurwa neza. Imishinga 392 mu irenze 4800 yatewe inkunga yahombeyemo miliyari eshanu zikirimo kugaruzwa ku bufatanye n’amabanki n’ibindi bigo by’imari izo nguzanyo zafashwemo.

Zimwe mu mpamvu BDF itanga zituma imishinga ihomba ngo ni amasoko, aho abenshi bahanga imirimo ariko ibyo bakora bikabura abaguzi.

Muri BDF imishinga y’Ubuhinzi n’Ubworozi ntijya irenza ingwate ya miliyoni 500, mu gihe iyindi itari iy’ubuhinzi n’ubworozi itarenza miliyoni 300.

Ubu BDF ikorera mu turere twose tw’igihugu ikaba ifitanye amasezerano n’ibigo by’imari bigera kuri 503.

Umuyobozi wa BDF, Innocent Bulindi, yavuze ko biteguye gukomeza gufatanya na Guverinoma kugeza gahunda z’iterambere ku Banyarwanda
Minisitiri w’Ubucuruzi n’Inganda, François Kanimba, yavuze ko bagiye kwifashisha BDF mu gushyigikira ba rwiyemezamirimo bato badoda imyenda n’inkweto

Amafoto: Luqman Mahoro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved