Kwamamaza

Ikiganiro na Sibomana, umwe mu bana b’i Nyange bakomerekeye mu gitero cy’abacengezi

Yanditswe kuya 14-09-2016 saa 09:00' na Prudence Kwizera


Ishuri ryisumbuye ry’i Nyange riherereye mu Karere ka Ngororero, mu Ntara y’u Burengerazuba, rifite amateka akomeye mu Rwanda kubera abanyeshuri bahiciwe n’abahamugariye ubwo bangaga kwitandukanya nyuma yo kubihatirwa n’abacengezi bashakaga gutsemba abatutsi.

André Sibomana ni umwe mu bana bigaga mu yisumbuye muri iri shuri mu mwaka, yagiranye ikiganiro na IGIHE asobanura byinshi ku byababayeho ndetse n’imibereho ye kuri ubu.

Sibomana kuri ubu atuye mu Mudugudu wa Cyayove, mu Kagari ka Mwurire, Umurenge wa Mbazi, mu Karere ka Huye, Intara y’Amajyepfo. Ni umwarimu mu yisumbuye ku Rwunge rw’amashuri rwa Mutunda ruherereye muri uyu murenge wa Mbazi.

Ubwo umunyamakuru wa IGIHE yamusuraga mu rugo aho atuye, yasanze atagiye ku kazi kuko wari umunsi w’ikiruhuko. Yari ari gusana inzu yo kororeramo amatungo magufi, abana be bari mu bikorwa by’isuku naho umugore we ari gutegura amasomo kuko na we ari umwarimu kuri uru rwunge rw’amashuri rwa Mutunda.

Mu kiganiro, Sibomana yasonanuye byinshi ku gitero cyabagabweho n’icyatumye banga kwitandukanya nk’uko babisabwaga n’abacengezi.

Yavuze ko bagabweho igitero n’abacengezi mu ijoro ryo ku wa 18 rishyira 19 Werurwe 1997, ubwo bari ku ishuri ryisumbuye ry’i Nyange, ryari riherereye mu yari Komini Kivumu, muri Perefegitura ya Kibuye (kuri ubu ni mu Karere ka Ngororero, Intara y’u Burengerazuba).

Ngo muri icyo gihe hari intambara y’abacengezi, aka karere na ko kakaba kari gasanzwe karangwamo umutekano muke kubera abacengezi bihishaga mu ishyamba rya Gishwati, bagakora ibikorwa bihungabanya umutekano.

Yagize ati “Hagati ya saa moya na saa mbiri twari tuvuye kurya, tugeze mu ishuri gusubiramo amasomo tubanza gusenga, nyuma yaho ni bwo twumvishe amasasu nk’atatu avugiye mu ishuri ryo mu wa gatandatu, kuko njyewe nigaga mu wa gatanu”.

Akomeza avuga ko mu gihe bari bakibaza ibibaye bagiye kubona babona abacengezi binjiye mu ishuri ryabo babasaba kwitandukanya, abatutsi bakajya ukwabo n’abahutu ukwabo.

Ati “Umwe muri bo yaratubwiye ngo abahutu mujye ukwanyu n’abatutsi mujye ukwanyu, twese turabyanga ndetse n’umwana wari wicaye imbere witwa Benimana Helene aravuga ngo ‘nta muhutu cyangwa umututsi uri hano twese turi Abanyarwanda’, nabo baravuga ngo niba mubyanze tugiye kubyikorera”.

Akomeza avuga ko umucengezi umwe yahise akubita Benimana umugeri amutura hasi amurasa isasu mu mutwe arapfa, bituma abanyeshuri bose bari muri iryo shuri birukanka basohoka, abacengezi babajugunyamo igisasu cya gerenade bamwe barapfa abandi barakomereka.

Ati “Twari banyeshuri bagera kuri 40, ubwo twahise turwanira mu muryango dushaka gusohoka batujugunyamo gerenade ari nako bamwe babatera ibyuma, mu ishuri ryacu hapfuye abana batatu abandi 18 barakomereka, naho mu wa gatandatu hishwe bane abandi benshi barakomereka”.

Nyuma y’ubwo bugizi bwa nabi, ingabo z’igihugu zari hafi y’ikigo ngo zaratabaye zisanga abacengezi bamaze kugenda zifasha ubuyobozi bw’ishuri guhumuriza abanyeshuri, kugarura abakwiye imishwaro no gutora imibiri y’abishwe ndetse no kuvuza abakomeretse.

Sibomana we ngo yisanze yakomeretse ukuguru ajyanwa kuvuzwa mu bitaro bya Kabgayi aho yamaze ibyumweru bibiri.

Iyi gerenade kandi yamugizeho ingaruka kuko mu bigaragara agenda asa n’ucumbagira bitewe n’uko ngo ibishashi byayo bitashizemo, kuko kwa muganga bamubwiye ko bitahita bishiramo ahubwo ko azagenda akira buhoro buhoro.

Ubutwari bwo kwanga kwitandukanya bwavuye he?

Sibomana avuga ko n’ubwo hari hashize imyaka hafi ibiri mu Rwanda habaye Jenoside yakorewe Abatutsi kandi hari hakiri bamwe mu Banyarwanda batarareka ingengabitekerezo ya Jenoside, ngo ku ishuri bahuriraga mu bikorwa bibigisha kubana neza ntavangura. Ibi ngo byatumaga babana nk’abavandimwe bakumva ko bafite byinshi byiza bibahuza kuruta ikibatanya icyo ari cyo cyose.

Nubwo ku ishuri ryabo nta huriro (Club) y’Ubumwe n’Ubwiyunge yahabaga, ngo bahuriga mu matsinda bakaganira ku bikorwa bitandukanye harimo n’amateka y’u Rwanda bagamije kwimakaza ubumwe no guhindura amateka mabi yaranze igihugu.

Imibereho ya Sibomana kuri ubu

André Sibomana kuri afite imyaka 41 y’amavuko, ni umugabo ufite umugore n’abana bane, we n’umufasha ni abarimu.

Mu bindi bikorwa yakoze, Sibomana yabaye Perezida w’Urukiko Gacaca rw’Akagari ka Mwurire, aho avuga ko yatanze umusanzu ukomeye mu Bumwe n’Ubwiyunge bw’Abanyarwanda.

Abaturage bamugiriye icyizere bamutoranya mu bagize Njyanama y’Umurenge wa Mbazi, kuri ubu akaba ari Visi Perezida wayo.

Kuri ubu ni umwe mu batoranyijwe kuba “Umurinzi w’Igihango", ibintu avuga ko yishimira, kuko bimwibutsa igikorwa cy’ubutwari we na bagenzi be bakoze ubwo bari ku ishuri.

Mu bikorwa bitandukanye byo gutoza abaturage Ubumwe n’Ubwiyunge ndetse na gahunda ya ‘Ndi umunyarwanda’, Sibomana abigiramo uruhare kenshi. Ibikorwa byose akora ndetse n’icyizere agenda agirirwa ngo bimutera ishema no kwiyumvamo ingufu zo gukomeza gukorera igihugu no kucyubaka.

N’ubwo ubumuga yasigiwe n’abacengezi butarakira neza, avuga ko yiyumvamo icyizere cy’ejo hazaza kuri we, n’umuryango we ndetse n’igihugu.

Bamwe mu baturanyi ba Sibomana baganiriye na IGIHE bavuga ko bamufata nk’umugabo w’inyangamugayo kandi ngo uretse igikorwa cy’ubutwari cyamuranze we na bagenzi be, ngo n’ibikorwa akora kuri ubu hari benshi babifatiraho urugero rwiza.

Kugeza ubu abagera kuri 40 bigaga i Nyange barokotse ubwo bwicanyi, bibumbiye hamwe mu ishyirahamwe bise ‘Komezubutwari’, ribafasha kungurana ibitekerezo no gukomeza kubahuza.

Sibomana yicaye mu ruganiriro rw'inzu ye
Inzu Sibomana abanamo n'umugore we n'abana bane babyaye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved