Kwamamaza

Hagiye kubakwa uruganda rutunganya ibiryo by’amafi mu Mujyi wa Kigali

Yanditswe kuya 17-09-2016 saa 15:17' na Jean Pierre Tuyisenge


Ikigo giteza imbere umusaruro w’ibikomoka ku burobyi cyane cyane mu byuzi byo mu mijyi,cyeguriwe ubushobozi buzagifasha kwita ku bikomoka ku mafi, gushaka amasoko, no gukemura ibibazo byabagaho byo kubura ibiryo by’amafi.

Ikigo AQUAHORT Export Ltd/AEL cyahawe ubu bushobozi na Leta y’u Rwanda kirasabwa kubaka uruganda rutunganya ibiryo by’amafi ruzajya rutanga nibura toni eshanu ku munsi.

Perezida w’Ihuriro ry’amakoperative y’aborozi b’amafi mu Rwanda(FEFICOORWA), Théophile Nyandwi yatangarije The Newtimes ko kubona ibiryo by’amafi ari imwe mu mbogamizi igihugu gifite.

Aborozi b’amafi bajyaga bakura ibiryo byayo mu bihugu bya Israel na Uganda bibahenze kuko ikiro bakiguraga ku madolari 1.5 ya Amerika angana n’amafaranga y’u Rwanda 1200.

Ikigo cy’Igihugu cy’Ubuhinzi n’Ubworozi RAB, n’abahanga mu by’ubworozi bw’amafi bavuga ko kororera mu byuzi ari kimwe mu bitanga umusaruro uhagije w’amafi, cyane cyane nko mu nkengero z’ikiyaga cya Kivu bitewe n’uko hari amazi adafite intungamubiri zihagije ku mafi.

Nyandwi avuga ko amafi yororewe mu byuzi, imwe ishobora gupima ikiro 1.5 mu gihe cy’amezi atandatu gusa ariko kubura ibyo bazigaburira byagiye bikomeza guca intege aborozi bayo.

Yagize ati “ Niyo mpamvu twasabye RAB na Minisiteri y’Ubuhinzi n’Ubworozi kudushyiriraho uruganda rwazajya rufasha aborozi kubona ibyo kurya by’amafi ku buryo bworoshye. Ruramutse rubonetse, ibitunga amafi bishobora kuboneka ku mafaranga make ugereranyije n’ayo bigura.”

Umuyobozi mukuru wa AQUAHORT Export Ltd/AEL, Bart Gasana yavuze ko igice cya mbere cy’umushinga w’uruganda kizatwara miliyoni 300 z’amafaranga y’u Rwanda.

Umuyobozi Ushinzwe ubworozi bw’amafi n’uburobyi mu Kigo cy’Igihugu gishinzwe ubuhinzi n’ubworozi, RAB, Dr.Rutaganira Wilson yavuze ko ibikoresho byo kubaka uruganda rw’ibiryo by’amafi bihari ndetse ko rugiye gutangira kubakwa ku buryo mu gihe cy’amezi atatu ngo ruzaba rwamaze gutangira gutanga ibiryo by’amafi.

Ibi byaje ari ishyirwa mu bikorwa ry’ ibyavuye mu byemezo by’inama y’abaminisitiri yateranye ku wa kabiri tariki ya 13 Nzeli 2016 yemeje amasezerano yo gukodesha n’Umushoramari AQUAHORT EXPORT LTD/AEL Centre yo muri Kigali Special Economic Zone igenewe guteza imbere ibikomoka ku burobyi, mu rwego rwo kuyicunga neza no kuyibyaza umusaruro utubutse.

Umunyamabanga wa Leta muri Minisiteri y’Ubuhinzi n’Ubworozi, Tonny Nsanganira yavuze ko icyo kigo cyashyizweho na Guverinoma y’u Rwanda mu mwaka wa 2012, kigamije korohereza aborozi gukusanya umusaruro w’amafi no kubashakira amasoko mu Mujyi wa Kigali.

Nsanganira yongeyeho ko Guverinoma yasanze icyaba kiza ari uko yashaka uzajya akurikirana icyo kigo. Iki cyemezo kiri muri gahunda ya Leta yo gukorana n’urwego rw’abikorera.

Umuyobozi mukuru wa AQUAHORT EXPORT LTD/AEL Centre, Bart Gasana avuga ko hariho umusaruro muke w’amafi ashyirwa ku isoko kuko amenshi yaturukaga hanze y’igihugu.

Yongeyeho ko imicungire y’icyo kigo ifite ikiciro cya kabiri kirimo gukusanya amafi, kuyitaho, no kuyatwara aho akenewe, igice cya gatatu kikazaba gishinzwe gutunganya amafi, kuyapakira, no kuyagemura hanze. Ibyo byiciro byombi bikazatwara miliyoni 500 z’amafaranga y’u Rwanda.

U Rwanda rugura hanze toni 15 000 ku mwaka, nkuko Umuyobozi Ushinzwe ubworozi bw’amafi n’uburobyi mu Kigo cy’Igihugu gishinzwe ubuhinzi n’ubworozi RAB, Dr.Rutaganira Wilson yabitangaje.

Yongeyeho ko u Rwanda ruri mu myanya ya nyuma mu kurya amafi mu bihugu byo muri Afurika y’Iburasirazuba, no munsi y’ubutayu bwa Sahara kuko umuntu umwe arya ibiro 2.3 byonyine ku mwaka.

Muri Werurwe 2016, Inteko y’Umuryango wa Afurika y’Iburasirazuba(EALA ) yasohoye icyegeranyo cyavugaga ko abaturage barya amafi make ari munsi y’urugero ruteganywa n’Umuryango Mpuzamahanga wita ku buzima OMS, usaba ko nibura umuntu yagakwiye kurya ibiro 25 by’amafi ku mwaka.

Iki cyegeranyo cyagaragaje ko mu Burundi umuntu umwe arya ibiro 3.6 by’amafi ku mwaka, Kenya 3.45, Rwanda 2.3, Uganda 10 naho Tanzania ibiro 8.

Imibare itangwa na Minisiteri y’Ubuhinzi n’Ubworozi igaragaza ko umusaruro w’amafi mu Rwanda wazamutse kugera kuri toni 30,000 mu mwaka wa 2015, uvuye kuri toni 9,117 wariho mu mwaka wa 2007.U Rwanda rwifuza ko mu mwaka wa 2020, ruzaba rubona toni 155 000 z’amafi.

Ikibazo cy'ibura ry'ibiryo by'amafi kigiye kubonerwa igisubizo kirambye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved