Itegeko rishya ryo gutanga umunani ntirivugwaho rumwe

Yanditswe na Jean Pierre Tuyisenge
Kuya 22 Nzeri 2016 saa 08:31
Yasuwe :
0 0

Itegeko rishya ryo gutanga umunani mu Rwanda ubu rivuga ko umubyeyi azajya abikora ku bushake bwe kandi akabikorera umwana ashaka, hari ababona iri tegeko nk’irizakurura amakimbirane mu muryango, nubwo hari n’abavuga ko bafitiye icyizere abaryizeho.

Amajwi y’abaturage batandukanye yumvikanye mu Kiganiro Ijwi ry’abaturage cyatambutse kuri Radio Rwanda ku wa 18 Nzeri 2016, aho bagaragaje ibitekerezo byabo kuri iri tegeko rishya ndetse n’impungenge barifitiye, gusa hari n’abavuze ko abadepite baryiganye ubushishozi.

Itegeko Nº27/2016 ryo ku wa 08/07/2016 risobanura ibijyanye n’impano, indagano ndetse n’izungura ku muryango nyarwanda wose.

Iri tegeko ku birebana n’imicungire y’umutungo w’abashyingiranywe, impano n’izungura, ryemerera umubyeyi gutanga umunani ku bushake. Abenshi bumvikanye bavuga ko rizatuma abana bagirana amakimbirane n’ababyeyi babo cyangwa abana bagasubiranamo hagati yabo.

Umubyeyi umwe yagize ati " Nk’umubyeyi mbona ari byiza ariko ku bana mbona hazazamo ikibazo, hari umubyeyi uzitwaza iryo tegeko ashake kurenganya abana. ku kigero cya 60% ni ryiza kuko iryariho ryatumaga abana badakora ngo bashake ibyabo, 40% ni izo mpungene mfite.”

Undi yagize ati " Umwana yitwaye neza rwose wamuha ariko yitwaye nabi ntacyo wamumarira, kuko hari abana bitwara nabi ku babyeyi, akabasuzugura, akabafata nabi, ariko umwana yitwaye neza wamuha, ririya tegeko ni ryiza abana benshi basuzuguraga ababyeyi babo.”

Arakomeza “Ariko biriya na none bizazamo ubwicanyi, umubyeyi nadaha umwana we azaza amwice.”

Undi yagize ati “Ni ikintu cyiza cyane kuko n’abadepite buriya bareba kure, barebera abaturage bakabona n’imbogamizi ziri mu baturage n’ingorane abana bashobora guteza ababyeyi, amategeko ni meza cyane bazakomeze badutorere n’andi, hari n’ibibazo biri mu ngo bazakomeze nabyo babicukumbure.”

Hari uwatanze igitekerezo avuga ko "uko mbyumva byaba byiza umubyeyi n’umwana bumvikanye, ariko kubera ubwumvikane buke busigaye buboneka ku bana, bishoboka ko umunani umubyeyi ashobora kuwumwima kubera yitwaye nabi.”

Undi ari " Ni ku bushake ariko hari icyo mbivugaho, hari abana bigira intakoreka ariko hakaba n’ababyeyi bikubira ku bintu bakumva batagomba kugabanya babana, njye mbona ababyeyi baha abana babaringanije noneho umwana wabubabashye bakamurengerezaho."

Uyu nawe yagize ati “Nonese niba umwana asuzuguye umubyeyi bigatuma ntacyo amugenera, uwo mwana yazaba uwande? Iryo tegeko na leta yagira icyo irivugaho kugira ngo na bariya bana batari kumva bazabashe kurenganurwa. No muri bibiliya haratubwira ngo umwana yaragiye arya ibyo bari bamuhaye abonye abimaze agaruka gutera umubyeyi kuri kakandi ke.”

Uko ubundi itegeko ryavugaga mbere yo kuvugururwa

Ingingo ya 42 yagenaga ko itangwa ry’umunani ari igikorwa ababyeyi bakora bakiriho kigamije kugabira umutungo abana babo cyangwa ababakomokaho bagahita bawegukana, bikitwa ko bashoje inshingano yo kubarera no kububakira.

Naho ingingo 43 igakomeza ivuga ko abana bose nta vangura hagati y’abahungu n’abakobwa abariho n’abahagarariye abakomoka ku bana bapfuye mbere y’ababyeyi, uretse abaciwe.

Uko ubu itegeko riteye mu ngingo ya 28 havugwa ko impano itanzwe mu rwego rw’umuryango ishobora gutangwa hagati y’abashyingiranywe ubwabo cyangwa igatangwa hagati y’ababyeyi n’abana babo kuri bimwe mu bigize umutungo wabo.

Iyo ababyeyi baha umwana wabo impano, babikora hadashingiwe ku ivangura hagati y’abana b’abakobwa n’abahungu. Impano itanzwe mu rwego rw’umuryango ishobora gukorerwa inyandiko mpamo cyangwa inyandiko bwite cyangwa igashyikirizwa gusa nyirayo.

Muri iyi ngingo, haravugwamo ko ari impano ababyeyi baha abana babo, bitandukanye n’uko byari biri mbere y’uko itegeko rivugururwa aho bawitaga umunani.

Ingoro y'Inteko Ishinga Amategeko y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza