Ihuriro ry’imitwe ya politiki rizakoresha asaga miliyoni 440 Frw mu birimo amatora y’abasenateri

Yanditswe na Sekamana Mathias
Kuya 27 Kamena 2019 saa 04:59
Yasuwe :
0 0

Ihuriro nyunguranabitekerezo ry’imitwe ya politiki mu Rwanda, rizakoresha amafaranga y’u Rwanda arenga miliyoni 440 mu bikorwa bitandukanye mu mwaka wa 2019/2020, bizibanda cyane cyane kongerera ubushobozi imitwe ya politiki ndetse n’amatora y’abasenateri.

Kuri uyu wa Kane hagaragajwe ingengo y’Imari y’iri huriro, yiyongereyeho arenga 10% kuko yavuye kuri miliyoni 400 akagera kuri miliyoni 444 z’amafaranga y’u Rwanda.

Aya mafaranga azakoreshwa mu mibereho ya buri munsi y’ihuriro, guhugura urubyiruko rwo mu mitwe ya politiki n’ibikorwa byo gushishikariza abagore gukora politiki.

Umuvugizi w’iri huriro Depite Mukabunani Christine, yavuze ko hari ibikorwa bateganyaga gukora bitazakunda kubera ubushobozi budahagije.

Yagize ati “Hari ibikorwa tutazakora kubera ubushobozi bw’igihugu. Ibitazakunda harimo guha inzego zihariye zo mu mitwe ya politiki cyane cyane z’abagore n’urubyiruko amahugurwa ahagije”.

Depite Mukabunani yongeyeho ko nubwo batazareka burundu ibikorwa byo guhugura urubyiruko no gushishikariza abagore gukora politiki, abazahugurwa ari bake muri buri mutwe hanyuma na bo bakazahugurana hagati yabo.

Ati “Tuba tugomba guhugura abantu umunani muri buri mutwe wa politiki bo mu Ntara n’Umujyi wa Kigali buri mezi atatu, bikadutwara miliyoni 38 kuri buri cyiciro, ariko ubu tuzabikora rimwe gusa”.

Umunyamabanga nshingwabikorwa w’iri huriro Oswald Burasanzwe yavuze ko nubwo ingengo y’Imari rigenerwa na leta yiyongereyeho nibura arenga gato 10%, ibikorwa byateganyijwe gukorwa biruta ingengo y’imari, bazagerageza kugabanya ikiguzi aho bishoboka hose.

Ati “Iby’ibanze tuzakora ni ukongerera ubushobozi imitwe ya politiki, imibereho rusange y’ihuriro, guteza imbere ibiganiro bya politiki, inama izahuza urubyiruko rwo mu mitwe ya politiki yo mu bihugu bitanu ivuga ku ruhare rw’urubyiruko mu gukumira imvururu ziba nyuma y’amatora n’ibindi.”

Mu bindi bizakorwa mu kugabanya ingano y’amafaranga iri huriro rizakoresha, harimo kugabanya umubare w’indorerezi rizohereza mu matora y’abasenateri ateganyijwe muri Nzeri uyu mwaka.

Mukabunani avuga ko hateganyijwe ibikorwa byo guhugura abagore n'urubyiruko mu mitwe ya politiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza