Kwamamaza

Ihohoterwa rikorerwa abakozi ritumye hasabwa Urukiko rw’umurimo

Yanditswe kuya 6-11-2016 saa 12:17' na Emma-Marie Umurerwa


Sendika y’abakozi, COTRAF, igaragaza ko hari ibibazo bikomeje kwibasira abakozi birimo gukubitwa, kwicishwa inzara, guhembwa intica ntikize no kudahemberwa amasaha y’ikirenga, rimwe na rimwe byakurikiranwa n’inkiko bigafata igihe kinini cyane.

Umuyobozi wa COTRAF, Ntakiyimana François, agaragaza nko ku bakozi bakora mu nganda zimwe n’abakora mu bwubatsi bw’imihanda bakorerwa ihohoterwa ritandukanye n’abakoresha babo.

Ati “Twifuza ko Leta yakongera igashyiraho Urukiko rw’Umurimo, kubera ko imanza z’umurimo zigenda ziyongera, impamvu ya kabiri ni uko usanga mu rukiko rumwe harimo umucamanza umwe w’umurimo bigatuma imanza zitinda kuko hari nk’urubanza rumara imyaka itatu. Hari nk’umukozi waburanaga n’umukoresha aza gupfa urubanza rutarangiye.”

Ntakiyimana yavuze ko mu bihembwe bitatu by’uyu mwaka bakiriye ibibazo 105 bihuza abantu 682, bikagaragaza ko abakozi bafite ibibazo byinshi, dore ko hari n’abakozi batabona ubushobozi bwo gutanga amagarama y’urubanza.

Yakomeje agira ati “Dufite ibibazo by’abakozi bakora mu bwubatsi bw’imihanda cyane cyane abakorera ibigo by’Abashinwa. Umukozi witwa Manzi Abashinwa batandatu baramukubise amara igihe mu bitaro […] hari n’abakozi twasuye dusanga bari kurira impungure ku gitiyo, ibi twabifashe nk’ihohoterwa.”

Abakorera abanyamahanga bararemerewe

Ntakiyimana yavuze ko abakozi bamwe mu bubaka imihanda bahura n’impanuka zibaviramo ubumuga bwa burundu ndetse n’urupfu.

Ati “Umuhanda wa Gisenyi-Rutsiro –Karongi, ejo bundi twakoreye raporo ubugenzuzi bw’umurimo bwa Rubavu, dutanga kopi ku Bushinjacyaha bukuru ndetse twandikiye n’Inteko. Mutekereze ahantu impanuka zitera urupfu ziba zirenze 10 mu gihe nta mwaka urarangira, ibyo bikwereka ko ari ikibazo gikomeye. N’iyi saha hari umukozi uri mu bitaro bya Kibogora, isaha iyariyo yose ashobora gupfa.’’

Muri ibyo bibazo byose bigenda bibaho, mu bigo by’ubwubatsi biyoborwa n’Abanyarwanda nta kibazo barabonamo, nyamara mu biyoborwa n’abanyamahanga harimo ikibazo gikomeye.

Ati “Ntabwo ari ukwibasira abanyamahanga, ariko usanga batubahiriza uburenganzira bw’umukozi. Twavuga nko mu bigo biyoborwa n’Abahinde […] muribuka abakozi b’uruganda ‘Imana Still’ mu Bugesera bamugaye, abandi bapfira mu kazi, abandi bakirukanwa nta mperekeza […] ibi bibazo twabimenyesheje Polisi, Ubushinjacyaha Bukuru, hamwe n’Inteko Ishinga Amategeko.”

Mu mavugurura asabwa harimo ko abashoramari bajya basabwa ingwate, igihe badashoboye kubahiriza inshingano iyo ngwate igahembwa abakozi cyangwa ikaba indishyi, cyane ko ngo hari abakoresha batsindwa mu manza n’abakozi babo, ariko bakabura indishyi.

Hakenewe ibiganiro ku rukiko rw’umurimo

Umunyamabanga wa Leta muri Minisiteri y’Ubutabera ushinzwe ibyerekeye Itegeko Nshinga n’andi Mategeko, Uwizeyimana Evode, yavuze ko imanza z’umurimo ziburanishirizwa mu nkiko zisumbuye, ku buryo bisaba kureba niba hari impamvu zikomeye zatuma hajyaho urugereko rwihariye.

Ati “Ni ibintu abantu bicara bakavuga ngo birakenewe, ese hari icyuho mu nkiko zisanzwe ziburanisha ibyo bibazo? Kuko ntabwo dushaka gushyiraho urugereko wenda ruzajya ruburanisha imanza ebyiri mu kwezi, usange abacamanza birirwa aho ngaho nta kintu bakora.”

“Urabanza ukareba ngo ibibazo bihari bingana bite; ibiza mu nkiko bingana bite; ni ikihe cyuho gihari inkiko zisanzwe zihari zidashobora gukemura; Iyo ubonye uburemere bw’ikibazo nibwo bugena uko kigomba gukemurwa.’’

Uwizeyimana yavuze ko hadashobora kuvuka ikibazo kimwe ngo hajyeho urukiko kandi bisaba nabyo ingengo y’imari yihariye n’abacamanza baburanisha izo manza gusa.
Yakomeje avuga ko mu 2004 mu nkiko zisumbuye hagiyeho ingereko ziburanisha imanza z’ubucuruzi, iz’abana n’ubutegetsi, ntibibuze umucamanza urimo kuba yaburanisha n’izindi manza, ariko ugasanga “ni ikintu kiri aho cya baringa kidafite ikintu kimaze’’.

Uwizeyimana yavuze ko nk’inkiko z’ubucuruzi zagiyeho bisabwe na Banki y’Isi hanagamijwe korohereza abashoramari, ku buryo hazarebwa ubukana bw’imanza z’umurimo mu Rukiko rw’Ikirenga, Ubugenzuzi bw’umurimo n’ibirego byakirwa mu nkiko.

Muri izo mpaka zishobora gushyirwaho, hahabwa agaciro uburemere bw’ikibazo n’aho izo nkiko zashyirwa, bigizwemo uruhare n’inzego zinyuranye zirimo, abanyamategeko, imiryango itari iya leta n’izindi.

Umuyobozi wa COTRAF, Ntakiyimana François, avuga ibibazo byugarije abakozi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved