Ihishurwa ry’umugambi w’umuryango wa Rwigara mu guhirika ubutegetsi (Amajwi)

Yanditswe na IGIHE
Kuya 25 Nzeri 2017 saa 10:35
Yasuwe :
5 5

Nyuma y’umunsi umwe byemejwe ko Diane Rwigara, mukuru we Anne n’umubyeyi wabo Adeline batawe muri yombi bakekwaho ibyaha birimo guhungabanya umutekano w’igihugu, hagiye hanze amajwi y’amagambo bagiye bavuga ku buryo bakorana n’abarwanya ubutegetsi bw’u Rwanda, n’uko icyabukuraho cyose bakijyamo.

Mu majwi yagiye ahagaragara, humvikana Adeline Rwigara nyina wa Diane bombi ubu bari mu maboko ya polisi; aganiriza Tabitha Rwiza nyirasenge wa Diane, ku mugambi wo kwinjiza abantu mu mutwe utavuga rumwe n’ubutegetsi, n’inyota y’uko icyabuhirika cyose bagitera ingabo mu bitugu. Ni ibiganiro bagiye bahererekanya kuri WhatsApp mu bihe bitandukanye.

Diane mu mugambi wo kwinjiza abantu mu barwanya ubutegetsi

Muri ayo majwi, Tabitha Rwiza na Adeline Rwigara bumvikana mu majwi bafite ubwoba bw’uko inzego z’iperereza zishobora kuba zarageze ku muzigo warimo amadosiye y’ibimenyetso bishobora kubashyirishamo.

Uwo muzigo ngo waburiye muri Ethiopia mu ndege yajyanye Diane Rwigara imuvanye i Kigali agana i Los Angeles.

Adeline Rwigara yumvikana avuga ko “yumye yumagaye” kubera ko Diane adashobora kuva mu gihugu, akibaza ikigomba gukurikira niba amadosiye yafashwe.

Adeline aterura avuga ko hari ibiteye ubwoba, ati “ariko nturire”, agakomeza yumvikana avuga ko Diane ajya kugenda ngo yafashe amadosiye akayashyira mu ivalisi, bamubwiye ko aza guhurira nayo i Los Angeles.

Ati “Ayashyiramo kandi arimo bya bindi bya politiki, nakubwiye ko amanywa n’ijoro aba yandika, ahura n’abantu. Ari muri opozisiyo ya hano mu gihugu, dore ko ihari nini cyane, amaze kwinjiza bamwe, bamwinjijemo nawe yinjizamo abandi, ntabwo mbazi ni abantu batabarika, sinzi ibyo aribyo, afite abantu bakorana.”

“Ibyo yandika buri munsi simbizi, yari abizanye sinzi aho yari abijyanye, mu mutwe we ni politiki gusa, none urabona kugeza ubu imizigo yarabuze. Niyo yaboneka, umuzigo nk’uwe ntushobora guhita batawurebye.”

Avuga ko bishoboka ko bamuhagaritse muri Ethiopia imizigo ye bayikuyemo bayisomye, ati “Ubu rero igikurikira ni Imana ikizi.”

Adeline yavuze ko atewe impungenge n’uko bari basanzwe bafite dosiye bakurikiranwaho, ndetse ngo yajyaga asaba Diane ko ashobora gusohoka mu gihugu aciye iy’ubutaka, kuko batabura abantu bamwambutsa, ubundi agashaka igihugu ajyamo.

Yakomeje agira ati “Ubwo kandi ntugire ngo kudashaka kuva aha ni ibyo bintu arimo ngo abo bakorana batabonako yabaye ikigwari, ati shwi ntabwo nahava babona ko nabaye ikigwari.”

“Ubwo ibyo yavuganye nabo ni uko bagomba guhangana bari mu gihugu, iryo tsinda ryabo ngo biyemeje kujegeza aba badayimoni bari mu gihugu.”

Umugambi wo kwigumura ku butegetsi

Muri icyo kiganiro kandi Adeline yumvikana akoresha ibimenyetso mu kuvuga abantu, umwe akamwita Nzobe, hari n’undi bita Muganga, undi yamugeraho akamwita Uw’Epfo.

Yavuze ko hari umuntu bahuye yita Nzobe uri muri opozisiyo, akamubwira ko bafite gahunda yo gushyiraho ishyaka, ariko ngo amubwira ko izatinda, bemeranya ko bashobora kwandika bamagana cyangwa bakajya mu mihanda bakigaragambya.

Akomeza agira ati “Turaganira, duhana gahunda kuko hari abo azazana hano. Ubwo ibyo ni Muganga gusa tubivugana wenyine. Abo ngabo nyine bakorana niyo opozisiyo, ko azabanzanira hano tukavugana tukavuga uko tuzakora.”

Yakomeje avuga ati “byo nashakaga kukubwira rero ni uko, mu bintu uriya mukobanyi yihaye kubwira Uw’Epfo n’iki, ati yanamubwiye iby’ishyaka barimo. Ubwo urumva natahuye ko Nzobe, ibyo arimo ari nabyo wa mukobanyi arimo.”

“Nabwiye Nzobe nti abavandimwe banjye bari muri opozisiyo, kandi iyi leta iranyanga yanyiciye umugabo, yanteye agahinda, yantereye abana agahinda, abavandimwe banjye bose baheze hanze mba muri iki gihugu njyenyine, nti ndayanga nayo iranyanga, icyayikuraho cyose nakijyamo.”

Adeline avuga ko yagiye mu bintu Imana yamubujije, kuko ngo politiki ubusanzwe si umuhamagaro we, akaba avuga ko yakarabaye ndetse yanasabye Imana imbabazi.

Tabitha yasabye Umuryango wa Diane kwitandukanya nawe

Tabitha yabwiye Adeline Rwigara ko bitumvikana uburyo umuntu yaturutse i Kigali yagera muri Ethiopia imizigo ye ikabura.

Yumvikana abwira nyina wa Diane ati “karabaye, weee, murapfuye mwese kubera ibyo bidosiye babonye kandi n’ubundi mwari mufite dosiye. Niba Diane adashaka gusohoka mwikusanye mugende, aho bigeze niba abona ko atagomba gusohoka.”

Tabitha yavugaga ko Adeline ageze i Burayi atabura uko agera muri Amerika kuko afite pasiporo y’u Bubiligi. Akomeza agira ati “Barayatwaye ayo madosiye weee, erega n’ubundi bari bamuriho n’ubundi.”

“Ubwo bamuriho birenze na mbere, kubera ayo madosiye bafashe, yebaba data weee, Mana yo mu ijuru, nyagasani mana yanjye… n’ayo madosiye arabamara aho bukera”

Hagati aho, Umuvugizi wa Polisi, ACP Theos Badege nta kintu aratangaza kuri aya makuru.

Kuri iki Cyumweru nibwo Polisi yatangaje ko ku mugoroba wo kuwa Gatandatu yataye Diane Rwigara, murumuna we Anne n’umubyeyi wabo Adeline, bakurikiranyweho ibyaha birimo kunyereza imisoro no gukoresha impapuro mpimbano, hiyongeraho no gushaka guhungabanya umutekano w’igihugu.

ACP Theos Badege yagize ati “Ariko igikomeye cyane nyuma yo gukomeza gukurikiranwa badafunze, ni uko banze kujya bakorana neza n’ubugenzacyaha ku bwende bwabo. Ibyo byasabaga kubazana, mwumvise ko mu minsi ishize [Diane] uko abajijwe avuga ibyo yabajijwe byose. Ibyo byose rero bari banatangiye no gutambamira iperereza niyo mpamvu ubugenzacyaha bwafashe icyemezo cyo kubakurikirana bafunze.”

Diane Rwigara yari asanzwe akurikiranyweho icyaha cyo gukoresha impapuro mpimbano mu gihe yashakaga kandidatire ku mwanya wa Perezida wa Repubulika, ndetse ku bashyigikiye kandidatire y’uyu mukobwa w’imyaka 35, hanagaragayeho abantu bapfuye aribo Rudahara Augustin; Maniraguha Innocent na Byiringiro Desire.

Abandi bo mu muryango we bo bakurikiranyweho ibijyanye no kunyerereza imisoro y’imyaka itanu guhera mu 2012, binyuze mu ruganda rw’itabi rwanditse ku muryango wabo. Amakuru akavuga ko habarurwa asaga miliyari eshanu z’amafaranga y’u Rwanda.

Umva amajwi yumvikanisha umugambi wo guhirika ubutegetsi w’abo kwa Rwigara

Uhereye ibumoso: Diane Rwigara; Anne Rwigara n’umubyeyi wabo Adeline Rwigara


KANDA HANO USHOBORE KUMVA


KANDA HANO USHOBORE KUMVA


KANDA HANO USHOBORE KUMVA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza