IGP Gasana yashyikirije Col Ruhunga Jeannot abagenzacyaha n’ibikoresho bigenewe RIB

Yanditswe na Ndayishimye Jean Claude
Kuya 18 Mata 2018 saa 01:09
Yasuwe :
0 0

Polisi y’Igihugu yashyikirije Urwego rushya rw’Ubugenzacyaha (RIB) abari abapolisi 463 n’ibikoresho byabarizwaga mu Ishami rya Polisi rishinzwe ubugenzacyaha (CID).

Inama y’abaminisitiri yo ku wa 11 Mata 2018, yemeje Iteka rya Minisitiri w’Intebe rigena uburyo abakozi 463 n’umutungo byari muri Polisi y’u Rwanda birebana n’Ubugenzacyaha byimurirwa mu Rwego rw’Igihugu rushinzwe Ubugenzacyaha.

Ku wa 18 Mata 2018, nibwo habaye umuhango w’ihererekanya bubasha hagati ya Polisi y’Igihugu na RIB, Komiseri Mukuru wa Polisi y’Igihugu, IGP Gasana Emmanuel, ahamiriza uru rwego rushya ko rubonye abakozi beza.

Yagize ati “Ni abapolisi beza twizera ko mu ntangiriro, abo mutangiranye bazabafasha RIB kugira ngo itangire ishinge imizi noneho n’abandi bagende baboneka ukomigihe kizaza. Bakoze akazi neza ntabwo biba byoroshye, bakoranye ubwitange, ubunyamwuga, ubunyangamugayo, ndetse nkanavuga ko bakoze akazi kenshi cyane, ubu twari tugeze aho kuvuga ngo buri mwaka amadosiye ashyikirizwa Ubushinjacyaha arenga ibihumbi 20.”

Umunyamabanga Mukuru wa RIB, Col Ruhunga Jeannot, yashimiye ubunyamwuga bwa Polisi mu gukumira no gukurikirana ibyaha, kongerera abagenzacyaha ubushobozi kugira ngo babashe kuzuza inshingano zabo neza.

Yavuze ko RIB izibanda cyane ku byaha bitandukanye birimo ikoranabuhanga, icuruzwa ry’abantu, ibiyobyanwenge, ruswa, kunyereza umutungo n’ibindi.

Minisitiri w’Ubutabera, Busingye Johnson, yashimiye Polisi y’igihugu akazi yakoze kandi ikomeje gukora, aho ibikorwa byayo bimaze guhesha ishema u Rwanda mu ruhando mpuzamahanga.

Yavuze ko ihererekanyabubasha ribaye ridakuraho kuba izi nzego zombi zizakomeza gukorana bya hafi.

Yagize ati “Ndashishikariza aba bayobozi b’izi nzego kurushaho gufatanya, muzirikana ko ububasha mwahawe mugomba kubukoresha mu nyungu no ku neza bw’Abanyarwanda.”

Yasabye abagenzacyaha bahawe RIB kuzarangwa n’ubunyangamugayo n’ikinyabupfura kugira ngo bazagere ku nshingano zabo uko bikwiye.

Biteganyijwe ko guhera tariki ya 20 Mata 2018, akazi kose kakorwaga na CID kazatangira gukorwa na RIB.

Ibyo wamenya kuri RIB

Itegeko rishyiraho uru rwego risobanura ko rufite inshingano zo gukumira no kubuza ikorwa ry’ibyaha binyujijwe mu gushakisha no gukora iperereza ku bikorwa byose bifatika cyangwa mu ikoranabuhanga, gukora iperereza rigamije gushakisha, guhagarika no kuburizamo ibyaha biri gukorwa cyangwa ibyaha bishya n’udutsiko dukora ibikorwa bihungabanya cyangwa bishobora guhungabanya igihugu, abantu n’imitungo.

Gushaka, gusesengura, gusuzuma no kubika neza amakuru y’ibyavuye mu iperereza ndetse n’ibimenyetso by’ibyaha byakozwe cyangwa byateganywaga gukorwa. Gushakisha no gufata abenegihugu n’abanyamahanga bakekwaho ibyaha n’abahunze kubera gukora ibyaha hakurikijwe amategeko abigenga.

Gushyiraho no gushyira mu bikorwa ingamba zigamije kurwanya iterabwoba no gukora iperereza rijyanye na ryo mu rwego rwo kurirwanya, gushyiraho no gucunga mu buryo bw’ikoranabuhanga amakuru ajyanye n’iperereza hagamijwe kugira ububiko bw’amakuru yagenderwaho mu gushyiraho politiki na porogaramu zijyanye n’ubutabera.

Uru rwego kandi rufite inshingano zo gukoresha ubuhanga bw’isesengurabimenyetso bibaye ngombwa, hagamijwe gutanga ubufasha bushingiye ku buhanga mu gukora iperereza ku byaha no gutanga ubundi bufasha bwakenerwa, kurinda umutekano w’abakorewe ibyaha n’uw’abatangabuhamya n’ibindi.

Umuhango w’ihererekanya bubasha hagati ya Polisi na RIB wayobowe na Minisitiri w’Ubutabera, Busingye Johnson (Hagati)
Komiseri Mukuru wa Polisi, IGP Gasana Emmanuel
Umunyamabanga Mukuru wa RIB, Col Ruhunga Jeannot
Bamwe mu bapolisi bahawe RIB
Kalihangabo Isabelle wagizwe Umunyamabanga Mukuru Wungirije wa RIB
Umuvunyi Mukuru mushya, Murekezi Anastase yitabiriye ihererekanyabubasha

Kanda hano urebe andi mafoto menshi

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza