Igishanga cya Kamiranzovu cyatangiye kubungwabungwa mu buryo bwihariye

Yanditswe na Akimana Erneste
Kuya 9 Gicurasi 2018 saa 01:47
Yasuwe :
0 0

Mu ntangiriro za Gashyantare 2018, Akarere ka Nyamasheke katangaje umushinga wo gushyira ibimenyetso ahantu hagaragaza amateka y’imibereho y’Abanyarwanda ndetse no kubungubunga ibidukikije harwanya isuri mu bishanga bihingwamo.

Nyamasheke ikungahaye ku byiza nyaburanga birimo Pariki y’Igihugu ya Nyungwe, Ikiyaga cya Kivu, amateka y’abami bahatuye n’abahateguriye ingamba, igishanga cya Kamiranzovu n’ibindi.

Mu rugamba rwo kwita ku bidukikije, Akarere ka Nyamasheke n’abafatanyabikorwa bako batangiye kubungabunga Igishanga cya Kamiranzovu haterwa ibiti 500 n’urubingo ku nkengero zacyo mu rwego rwo kurwanya isuri.

Iki gikorwa cyabaye bwa mbere ndetse biteganyijwe ko ibiti byatewe bizajya bibungwabungwa n’abahinzi b’umuceri bahakorera.

Uyu mwanzuro wafashwe nyuma yuko Igishanga cya Kamiranzovu gikikijwe n’imisozi cyakundaga kuzura amazi ndetse rimwe na rimwe umuceri uhinzemo ukarengerwa n’isuri.

Abaturage bakora ubuhinzi mu Gishanga cya Kamiranzovu bagaragaje ko iki gikorwa kizabafasha kwirinda isuri yavaga mu misozi igikikije.

Minana Alphonse yagize ati “Ibi biti bateye bizadufasha kurwanya isuri kandi iyo urubingo rukuze bakuramo imishingiro bityo bikadufasha no mu bundi buhinzi dukora.”

Umuyobozi Wungirije w’Umuryango Nyarwanda uharanira Iterambere ryo mu Cyaro no kubungabunga Ibidukikije (REDIRE), Mutambarungu Esther, yavuze ko bita ku bikorwa byo kubungabunga ibidukikije.

Yagize ati “Uyu mushinga wita ku kubungabunga ibidukikije nko gutera amashyamba. Ntabwo aribyo gusa kuko dufite n’inshingano zo kwita ku mibereho myiza, tukaba turwanya imirire mibi no kurwanya ihohoterwa ryose, byose dufatanyije n’akarere.”

Umunyamabanga Nshingwabikorwa w’Umurenge wa Kagano, Ndanga Janvier, yavuze ko kuba iki gishanga kiri hagati y’imisozi miremire ishobora kuba yatuma haba isuri cyari gikenewe kubungwabungwa byihariye.

Yagize ati “Iki gishanga cya Kamiranzovu kiri hagati y’imisozi kandi gifasha abaturage benshi, twahisemo gutera ibiti n’urubingo kugira ngo isuri itacyangiza.”

Igishanga cya Kamiranzovu gifite hegitari zirenga 100 aho izigera kuri 80 zihingwamo umuceri naho izindi ziteyeho ibihingwa birimo imyumbati, imboga n’ibindi. Abahinzi 1000 bagihingamo umuceri basarura toni esheshatu ku mwaka.

Muri Kamiranzovu haturukamo isumo riri muri Pariki ya Nyungwe ku birometero 3 uvuye ku gishanga. Iri sumo rifite uburebure bwa metero zisaga 100, ryohereza amazi mu Kivu agakomereza mu ruzi rwa Congo anyuze mu kiyaga cya Tanganyika.

Mu mushinga gushyira ibimenyetso ku hantu nyaburanga muri Nyamasheke, uduce tuzibandwaho turimo Akarwa k’abakobwa ahajugunywaga abatwaye inda z’indaro no ku Bigabiro by’Umwami Rwabugiri.

Abahinzi b'umuceri bateye ibiti ku nkengero z'umugezi wa Kamiranzovu mu rwego rwo kwirinda isuri
Abaturage b'i Nyamasheke bitabiriye iki gikorwa ari benshi
Igishanga cya Kamiranzovu gifite hegitari zigera kuri 80 zihingwamo umuceri
Umuyobozi Wungirije w’Umuryango Nyarwanda uharanira Iterambere ryo mu Cyaro no kubungabunga Ibidukikije, Mutambarungu Esther n'Umunyamabanga Nshingwabikorwa w’Umurenge wa Kagano, Ndanga Janvier, batera ibiti
Umugezi wa Kamiranzovu uherereye hafi ya Nyungwe
Aho umusaruro w'umuceri ukusanyirizwa
Bamwe mu baturage banahawe ubwisungane mu kwivuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza