Igipimo cy’izamuka ry’ubukungu bw’u Rwanda cyazamuwe kigera ku 8.5 ku ijana

Yanditswe na Rabbi Malo Umucunguzi
Kuya 13 Ugushyingo 2019 saa 07:09
Yasuwe :
0 0

Ikigega Mpuzamahanga cy’Imari, IMF, na Guverinoma y’u Rwanda, byemeje ko igipimo cy’izamuka ry’ubukungu bw’igihugu muri uyu mwaka wa 2019 gihindurwa, kikava kuri 7.8 ku ijana yemejwe mbere y’uko uyu mwaka utangira, kikaba 8.5 ku ijana.

Ni icyemezo cyafashwe nyuma y’ibiganiro byari bimaze ibyumweru bibiri hagati ya Guverinoma y’u Rwanda n’intumwa za IMF, mu biganiro biba buri mezi atandatu hasuzumwa ishyirwa mu bikorwa rya gahunda z’ubukungu zumvikanweho.

Umwanzuro wo kuzamura igipimo cy’ubukungu muri uyu mwaka watewe ahanini n’uburyo bwazamutse kurusha uko byateganywaga mu gice cya mbere cy’uyu mwaka wa 2019, aho bwageze ku 10.3 ku ijana.

Uwari uyoboye intumwa za IMF mu Rwanda Laure Redifer, yavuze ko ubukungu bw’u Rwanda buzakomeza kuzamuka neza, aho nibura mu myaka ibiri cyangwa itatu iri imbere buzaba buzamuka ku 8 ku ijana.

Ati "Impamvu twazamuye igipimo cy’izamuka giteganywa ni uko igipimo cyari gisanzwe cya 2019 cyari 7.8 ku ijana, ariko ubwo twabonaga izamuka ry’ubukungu risaga 10 ku ijana mu mezi atandatu ya mbere y’uyu mwaka, kugira ngo ugumane igipimo twafashe mbere byari gusaba ko ubukungu bumanuka 2.5 ku ijana mu gice cya kabiri cy’umwaka, kandi ibipimo dufite ni uko ubukungu buzakomeza kuzamuka.”

"Rero twafashe ko buzazamuka ku 8.5 ku ijana, kandi twumva ko byumvikana kuri uyu mwaka. Bimwe mu bipimo bizashyingirwaho ni ugukomeza kwaguka kw’imishinga y’ubwubatsi ku ruhande rwa leta n’abikorera, ni ibintu bizakomeza kugira uruhare mu kuzamura ubukungu."

Minisitiri w’Imari n’igenamigambi, Dr Ndagijimana Uzziel, yavuze ko uretse kuba IMF yishimiye uburyo ubukungu bw’u Rwanda buhagaze, yanatanze inama y’uburyo bwarushaho guhagarara neza.

Yagize ati "Iyi gahunda igamije cyane cyane gufasha u Rwanda gushyira mu bikorwa gahunda y’imyaka irindwi yo kwihutisha ubukungu, aho naho twahaganiriyeho rero basanga ubukungu bucunzwe neza, ariko iteka bajya n’inama yo gukomeza gushaka uburyo twakongera ubushobozi bw’imbere mu gihugu mu mafaranga ajya mu ngengo y’imari, gukomeza gucunga neza inguzanyo zaba iz’imbere mu gihugu cyangwa izo hanze, no gukurikirana neza ishyirwa mu bikorwa ry’imishinga cyane cyane imishinga minini.”

Imwe mu mishinga yaganiriwe muri izo nzego harimo ikomeje guhindura isura ya Kigali nk’inyubako ya Kigali Arena, imishinga y’amashanyarazi, imihanda n’ishoramari mu bikorwa bihindura imibereho y’abaturage n’ibikorwa remezo nk’ubwubatsi bw’inzu zo guturamo n’izikorerwamo ubucuruzi.

Muri serivisi zituma ubukungu bw’u Rwanda bukomeza guhagarara neza kandi harimo ubukerarugendo, ubwikorezi na serivisi.

Umuyobozi Ushinzwe ubukungu muri BNR, Prof Thomas Kigabo, avuga ko mu umusaruro uva mu bukerarigendo mu mwaka ushize wari miliyoni zisaga 380$, mu gihe muri uyu mwaka imibare izatangazwa mu mpera z’Ukuboza byitezwe ko azaba agera kuri miliyoni 405$.

Uwari uyoboye intumwa za IMF mu Rwanda Laure Redifer, yavuze ko ubukungu bw’u Rwanda buzakomeza kuzamuka neza, aho nibura mu myaka ibiri cyangwa itatu iri imbere buzaba buzamuka ku 8 ku ijana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza