Igihombo n’ingaruka kugwingira bigira ku mwana

Yanditswe na Ferdinand Maniraguha
Kuya 8 Ugushyingo 2018 saa 05:59
Yasuwe :
0 0

Nibura mu bana 100 bari munsi y’imyaka itanu mu Rwanda, 38 baba baragwingiye hashingiwe ku bushakashatsi bwakozwe mu 2015.

Umwaka ushize, Ishami ry’Umuryango w’Abibumbye ryita ku buzima, OMS, ryatangaje ko ku Isi hari abana miliyoni 151 bari munsi y’imyaka itanu bagwingiye.

Kugwingira ni ingaruka z’imirire mibi zituma umwana adakura mu gihagararo no mu mitekerereze. Bigaragara iyo bamupimye bagasanga uburebure bwe ntibuhuye n’imyaka ye.

Ntibisaba kuba waravutse gusa kuko n’umwana uri munda ya nyina aragwingira. Ni ikibazo gishobora gukosorwa umwana akiri muto ariko yarenza imyaka ibiri bikaba nta garuriro.

IGIHE yagiranye ikiganiro kirambuye n’impuguke mu mirire y’umubyeyi n’umwana muri Gahunda Mbonezamikurire y’Abana Bato (NECDP), Machara Faustin, adusobanurira birambuye ku kugwingira.

Kugira ngo umwana bimenyekane ko yagwingiye baramupima. Machara yavuze ko hari ibipimo mpuzamahanga by’imikurire bigaragaza ibiro ndetse n’uburebure umwana agomba kuba afite ukurikije uko angana (amezi ye cyangwa imyaka).

Urugero nk’umwana w’umuhungu ukivuka yakagombye kuba afite santimetero (Cm) 49.9 z’uburebure, ariko iyo avukanye cm kugeza 46.1 ntabwo biba bikabije mu buryo bavuga ko yagwingiye. Batangira kumufata nk’uwagwingiye iyo basanze afite munsi ya cm 46.1. Iyo afite munsi ya cm 44.2 umwana aba yaragwingiye bikabije.

Umwana w’umuhungu w’amezi atanu yakagombye kuba afite cm 65.9 z’uburebure; iyo afite munsi yazo kugeza kuri cm 61.7 nta kibazo. Afatwa nk’uwagwingiye bidakabije iyo afite munsi ya cm 61.7 kugeza cm 59.6.Iyo ifite munsi ya cm 59.6 aba yaragwingiye bikabije.

Mu Rwanda hari 16 % by’abana bavutse baragwingiriye mu nda z’ababyeyi babo.

Machara yavuze ko imirire mibi n’indwara arizo mpamvu nyamukuru ituma abana bagwingira.

Ati "Kugira ngo umwana yitwe ko yagwingiye ni uko aba yaratinze mu bibazo by’imirire mibi, indwara zikamwikubitaho. Nibyo bigera aho bigatuma atagikura mu gihagararo ariko ibyo byose bijya kuboneka harabanje kugabanyuka ibiro n’ibindi."

Ingaruka za vuba ziba ku mwana wagwingiye harimo ibyago byo kurwaragurika cyane, bikamushyira mu bana bafite ibyago byo gupfa ugereranyije n’abana batagwingiye.

Umwana wagwingiye kandi iyo atitaweho akiri muto bimugiraho ingaruka mu mitsindire ye mu ishuri kuko byangiza imikorere y’ubwonko.

Ubusanzwe 80 % by’ubwonko bw’umwana bikura mu myaka itatu ye ya mbere.

Machara avuga ko umwana wagwingiye atanga umusarururo udahagije ku manota yakabaye abona mu ishuri hagabanyukaho hagati ya 5 na 11.

Igaruka ziza zitinze ni uko iyo umwana wagwingiye ageze mu myaka y’ubukure, umusaruro atanga mu byo akora uba muke ugereranyije n’igihe yari kuba ataragwingiye. Ku musaruro yakabaye atanga hagabanyukaho 10 %.

Aba afite kandi ibyago byo kurwara indwara azituruka ku mubyibuho ukabije n’izindi zitandura.

Ni gute warinda umwana wawe kugwingira?

Machara yavuze ko ibituma umwana atagwingira atari ibintu bigoye cyane.

Ati "Umugore utwite wariye indyo yuzuye, wapimishije ku gihe, agafata inyongera tubaha (ibinini bya fer na acide folique) akaruhuka, uwo mudamu afite amahirwe menshi yo kubyara umwana utagwingiye."

Yongeyeho ati "Uwavutse yaragwingiye ariko akitabwaho, akonka neza amezi atandatu nta kindi bamuvangiye, yarangiza akabona imfashabere ikwiye, indyo yuzuye, agakurikiza gahunda zo kwa muganga, uwo mwana afite amahirwe yo gukura ntagwingire."

Yavuze ko iyo umwana yagejeje imyaka ibiri yagwingiye, amahirwe yo kubigarura ngo za ngaruka zitazamugeraho aba ari make.

Yibukije ko igihugu cyashizeho ingamba zihamye zo guteza imbere imirire y’abana. Ongera Intungamubiri ni imwe mu ngamba zashyizweho na Leta y’u Rwanda igamije gukemura ikibazo cy’imirire mibi n’igwingira muri rusange by’umwihariko ibura ry’amaraso ku bana.

Ongera Intungamubiri ni agafu k’uruvange rwa vitamini n’imyunyu ngungu zigera kuri 15 kavangwa mu mafunguro y’abana bari hagati y’amezi 6 kugeza 23.

Nibura buri mwaka, ku Isi abana bagera kuri miliyoni eshatu barapfa bazize imirire mibi nk’uko Ishami rya Loni ryita ku bana ribitangaza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza