‘Igihe maze ndi umuvugizi w’amashyaka nabonye ko mu Rwanda hari demokarasi ishimishije’

Yanditswe na Philbert Girinema
Kuya 30 Nzeri 2016 saa 07:57
46 31

Mukabunani Christine wari Umuvugizi w’Ihuriro Nyunguranabitekerezo ry’Imitwe ya Politiki mu Rwanda (NFPO) yatangaje ko mu Rwanda hari demokarasi isesuye, akurikije uburyo yayoboye kandi ari uwo mu ishyaka ryemeza ko ritavuga rumwe na leta.

Mukabunani wasimbuwe kuri uwo mwanya ku wa Kane tariki ya 29 Nzeri 2016 kubera ko yari agejeje ku musozo wa manda ye, yivugiye ko ari uwo mu ishyaka ritavuga rumwe n’iriri ku butegetsi, ariko ngo ntibyamubujije kungurana ibitekerezo n’abo badahuje hagendewe ku murongo ngenderwaho w’imitwe ya politiki.

Mukabunani akomeza avuga ko ari ubunararibonye yungutse, bunashushanya demokarasi y’u Rwanda muri iki gihe.

Ati “ Ubwo ni ubunararibonye bwa mbere nabonyemo, ni aho demokarasi igeze mu Rwanda. Ni ku kigero gishimishije aho twicara mu ihuriro twese tugahuza kandi mu by’ukuri ibitekerezo byacu bidahuye.”

Kuba abo banyapolitiki bahurira mu iryo huriro bakaganira ngo bituma hataba amakimbirane hagati yabo mu bya politiki.

Ati “Nkuko nabaga nyoboye inama cyangwa tuganira n’abandi banyapolitiki wumvaga intego yacu ari imwe yo kubaka igihugu, ugasanga igitekerezo rusange cyangwa inyungu rusange z’igihugu ni zo twese duharanira.”
Mukabunani yatangaje kandi ko iyo demokarasi yanatunguye abanyamahanga bazaga kubasura.

Amashyaka ashimangira ko atavuga rumwe n’ubutegetsi mu Rwanda ni PS Imberakuri riyoborwa na Mukabunani Christine na Green Party riyoborwa na Dr Frank Habineza.

Mukabunani Christine wari Umuvugizi w’Ihuriro Nyunguranabitekerezo ry’Imitwe ya Politiki mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE