Igihamya cy’uko uko Ingabire Victoire yinjiye muri gereza ari ko yavuyemo

Yanditswe na Tom Ndahiro
Kuya 12 Nzeri 2019 saa 08:39
Yasuwe :
0 0

Mu minsi itarenze itatu, uwitwa Ingabire Victoire Umuhoza (IVUmuhoza) araba amaze umwaka afunguwe ku mbabazi za Perezida w’u Rwanda, Paul Kagame. Muri uwo mwaka amaze afunguwe, agahabwa imbabazi zo kugabanyirizwa uburebure bw’igifungo ho imyaka irindwi, biragaragara ko urwishe ya nka rukiyirimo.

Nyuma y’amezi hafi icumi afunguwe, ndetse maze kwitegereza bihagije imyitwarire ye muri icyo gihe, nanditse inyandiko ishingira ku bye, mvuga ko “Abakwiza ingengabitekerezo ya Jenoside bakwiye akato.”

Ibyo nabivuze ngereranya ububi bw’ingengabitekerezo ya Jenoside n’indwara ya Ebola, nkerekana ko iyo ndwara yica bake ugereranyije n’ubukana bwa Jenoside yishe Abatutsi barenga miliyoni mu mezi atatu gusa.

Agifungurwa, IVUmuhoza yasohotse muri Gereza asohokanye ubukana bw’ingengabitekerezo kirimbuzi nk’uko yinjiyemo. Kuwa 24 Nzeri 2018, amaze iminsi icumi afunguwe nanditse inyandiko igaragaza ko IVUmuhoza atari umunyapolitiki ahubwo ari umugore w’umugome, kandi n’ikivugwa ko ayobora cyitwa FDU-Inkingi ikwiye gucibwa vuba.

Mbere y’aho, ku wa 20 Nzeri 2018, nari nanditse indi ngaragaza ko kumwemerera gukora Politiki imurimo mu Rwanda, ari uguhembera Jenoside. Muri iyo nyandiko navuzemo ibiganiro yari yaragiranye n’ibitangazamakuru bitandukanye harimo n’icy’uwo mutwe wa FDU-Inkingi ayoborera aho ari hose.

Icyo kiganiro cya radiyo ye nashyizemo agace gato kacyo, ubu nkaba ngishyizemo cyose. Ni ikiganiro yagiranye n’umucengezamatwara ya Jenoside witwa Gaspar Musabyimana.

Dore uko cyagenze

Musabyimana Gaspard: Presidente Victoire Ingabire ndagusuhuje ni
Musabyimana Gaspard kuri Radio Inkingi.

Victoire Ingabire: Muraho murakomeye!

Musabyimana Gaspard: Komera komera ni wowe wakomera, ni wowe wabona ukomera.

Victoire Ingabire: Njye nta kibazo mfite ‘uko ninjiyemo niko nsohotse imbaraga zanjye zicyari za zindi’. Gereza burya itera ikibazo uwayigiyemo atazi impamvu agiyemo ariko iyo umuntu agiyemo azi impamvu agiyemo nta kibazo imutera.

Musabyimana Gaspard:Yeee! Urumva abarwanashyaka bakomeje kumbaza bati “wowe kuri Radio Inkingi, umunyamakuru, tubarize mu Rwanda niba Victoire Ingabire koko yosohotse akaba yageze mu rugo”, ubu rero nagira ngo ubahumurize.

Victoire Ingabire: Oya bahumure rwose ubu ndi mu rugo, nakiriwe n’abarwanashyaka b’ishyaka ryacu baturutse hirya no hino mu turere tunyuranye tw’igihugu, bari hano baje kunyakira. Rero abo barwanyashyaka bacu mwese muri hanze ndabasuhuje kandi ngira ngo mbashimire bikomeye cyane, mbashimire, ubwo mvuga nti “imbaraga ninjiranye n’izo nsohokanye nzikesha mwebwe kuko mwambaye bugufi uko mushoboye kose, imbaraga zanjye nazikuye muri mwebwe”.

Musabyimana Gaspard: Yeee urakoze ariko se kuvuga ko ari ugutaruka, iyo nkuru yo kugira ngo bagufungure, tubwire ukuntu byakugezeho, uko wabyakiriye?

Victoire Ingabire: Byabaye inkuru yantunguye cyane kuko nayimenye mu ma saa yine z’ijoro, mu ma saa tanu mu by’ukuri nibwo nayumvishije. Nari naryamye, jyewe numva abandi bafungwa basakuje cyane! Twebwe aho nari mfungiye na Diane, ntabwo twarebaga hagati y’abandi, twumva bashakuje rero ariko buri wese afite n’icyumba cye, noneho numvise bashakuje ngira ngo n’ikindi kibazo ariko nyuma numva bavuga bati buri muntu niyumve Radio, mpita nanjye mfungura Radio mpita nkubitana n’itangazo ry’abaminisitiri rivuga ko nyine mu bantu bafunguwe nanjye ndimo. Murabona mu myaka umunani nari maze muri gereza, ni ubwa mbere hafungurwa umubare munini cyane w’abantu 2100 ni benshi.

Musabyimana Gaspard: Bafunguye abantu 2100?

Victoire Ingabire: Yeee bafunguye abantu 2100.

Musabyimana Gaspard: Muri abo ngabo harimo abandi bafunzwe kubera ibya politike?

Victoire Ingabire: Oya, nta wundi wari urimo. Ni yo mpamvu nizera ko ubwo bakoze intambwe ya mbere yo kumfungura na bagenzi bacu, murabizi ko abarwanashyaka bacu bandi ndetse na Visi-perezida wa mbere n’umubitsi n’umunyamabanga mukuru bose barimo. Nari niteguye ko nk’umunyamabanga mukuru yashoboye kuba arimo ariko ntawatugezeho ubwo ni ukuvuga ko nawe akirimo, agifunze. Ni ukuvuga ko nta bandi bafunguwe.

Musabyimana Gaspard: Yeee! Ariko twabonye amakuru yacicikanye cyane cyane nasomye nk’ikinyamakuru cy’aho mu Rwanda cyavugaga ibyawe na Kizito Mihigo, gisa n’aho kivuga ko mwasabye imbabazi Perezida wa Repubulika kugira ngo abafungure.

Victoire Ingabire: Ahaha (aseka)! Ariko abo wenda ni uko batazi amategeko ariko nababwira ko Perezida wa Repubulika afite ububasha ahabwa n’itegeko nshinga, afite ububasha ahabwa n’itegeko No 30 – 2013 rirebana n’imiburanishirize (Code Procedure Penal) mu Kinyarwanda ndumva ntabona uko nabivuga.

Harimo ingingo zose zimuha ububasha bwo kuba yafungura umufungwa uwo ariwe wese, cyane iyo barebye ko umuntu yitwaye neza. Ngira ngo rero mwese musanzwe munzi ndi “Disciplinée”, mfite discipline [ikinyabupfura], ntawe nigeze ndwana nawe, ntawe nigeze ngira nte, ku buryo mu by’ukuri basangaga kumfunga nta mpamvu n’imwe ihari.

Musabyimana Gaspard: Iyo myaka umunani umazemo se wayibayemo ute? Mbese kugira ngo umuntu amare imyaka umunani ari muri prison [gereza], abarwanashyaka wababwira ko umuntu aba ameze ate?

Victoire Ingabire: Ni ibintu bitoroshye niko nakubwiye, ugiyemo utazi impamvu ugiyemo ntabwo byakorohera kuko nabonaga benshi byagoraga ugasanga barwana cyangwa bagira gute, ariko nkanjye nagiyemo nzi ko ngiyemo ku mpamvu za politike. N’igihe nahagurukaga mu Buholandi mu byo natekerezaga bishobora kumbaho ni uko natekerezaga ko no kuba nafungwa byashoboraga kumbaho, bimbayeho rero ntabwo byantunguye, nta n’ikibazo byanteye, ni ukuvuga ko nari nariyakiriye.

Navuga ko icyangoye cya mbere ni imyaka itanu ya mbere, imyaka itanu ya mbere nabaga ahantu ha njyenyine, nta muntu mvugana nawe umunsi wose, nsa nkaho, mu gifaransa ibyo bita “Isolement”. Donc n’abantu bansura baransuraga ariko urumva natangiye nsurwa n’abarwanashyaka benshi bakaza ari ikivunge, bigera aho barabagabanya umubare bati “ntidushaka abantu benshi, dushaka batanu.” Bigera aho barabagabanya basigarana umwe, n’umwe basigara ntawe ukibaho.

Ubu ni ukuri, mfunguwe nta bantu mu by’ukuri bari bakingeraho ariko kuba nk’uko nabivugaga nzi ko mwabaga muhari nubwo ntabangeragaho. Ariko kuba nari nzi ko muhari, muri inyuma hari ibikorwa by’ishyaka bikorwa kuko hari ibikorwa byinshi by’ishyaka mwakoraga, haba hano mu gihugu no hanze, ibyo byose byampaga imbaraga zo kumva ko igikorwa twatangije mu gihugu cyacu gikomeje kitigeze gihagarara. Donc kumfunga ntacyo byagabanyije. Nari kugira ikibazo iyo njya kubona ko igikorwa twatangije hano mu Rwanda cyazimye ariko ntabwo cyazimye.

Cyarakomeje kubera ko mwe muri hanze mwagiteye imbaraga n’abari mu gihugu nabo, n’ubwo hari ibyo bibazo, ndafunzwe n’abandi nabo bagiye bafungwa, bagafungurwa, kuba harabaye izo mbaraga, iyo “synergie”, hagati yanyu muri hanze natwe turi mu gihugu byatumaga kuri jyewe numva…(ntiyujuje interuro). Kandi koko igikorwa cyarakomeje kuko n’ikimenyimenyi n’abarwanashyaka bari hano wenda baraza gufata amafoto baboherereze cyangwa wenda bayaboherereje ngisohoka muri gereza kuko bari baje kunyakira kuri gereza.

Kubona badufunga, bagira gute, ariko abantu bakaba bagihari, bagakomeza ntibagire ubwoba, icyo ni icyerekana ko mu by’ukuri igikorwa twatangije gihari, gikomeye, cyafashe imizi, ko ibyo bakora byose kidashobora gusenyuka. Hakaba rero ibyo byose byampaga imbaraga zo gukomeza kwihanganira ya myaka itanu nabayeho nsa nk’uwigunze.

Nyuma nagize igihe cyo kujya kuba muri rusange, kuva muri 2016, nabaye muri rusange, ngira ngo nagiye mpurirayo n’ibibazo rimwe na rimwe ndumva mwaragiye munabitangazaho, by’abantu wenda babona umuntu wo muri opposition [utavuga rumwe n’ubutegetsi] bati “uyu ni umwanzi w’igihugu”.

Hari ikintu cy’imyumvire itari myiza tugifite hano mu gihugu, abantu bakumva ko umuntu wo muri opposition, ari umwanzi. Ngatekereza ko nko mu cy’ingenzi ngiye gushyiramo imbaraga cyane ari ukumvisha abantu ko kutabona ibintu kimwe n’ubutegetsi, kutavuga ibintu kimwe n’ubutegetsi atari ukuba umwanzi w’igihugu ahubwo ari izindi mbaraga ziba zije abantu bagombye gufata abantu bagashyira hamwe, bakagira icyo bageraho.

Kuko kuri jyewe nemera ko nta munyarwanda umwe cyangwa ishyaka rimwe rishobora kwiyemeza ko ariryo ryonyine ryashobora gukora ibintunganye mu gihugu. Ariko nemera ko Abanyarwanda twese dushyize hamwe, dushobora kubaka iguhugu cyacu mu buryo bwiza, kandi ngasanga ari nabwo buryo bwiza bwo gutegura urubyiruko rw’ejo hazaza.

Musabyimana Gaspard: Nakubajije icyo kibazo kubera ko FDU Inkingi yigeze gushyira itangazo hanze ivuga ko hari igihe bagufunganaga n’abantu bashaka kukwendereza cyangwa kukugirira nabi, bavuzemo umugore mwafunganywe, ndumva ari communiqué ya nyuma ahari, ibyo bintu nibyo navugaga nti “aha se mama wabicikaga ute?” Iyo umuntu nk’uwo yahageraga agatangira kukureba ikijisho wabigenzaga ute? Ni ibyo nagira ngo wenda abarwanashyaka… kuko bagiye basoma ayo matangazo, ubabwire uko wabyikuragamo?

Victoire Ingabire:Nibyo habaye ibibazo bikomeye. Ni ibyo nababwiraga by’abantu bazaga bakumva ko umuntu ari uwo muri opposition, bakumva bagomba kumubuza uburyo. Hari igihe rwose, ntekereza hagati y’umwezi kwa 11 kw’umwaka ushize kugeza mu kwezi kwa gatatu kw’uyu mwaka nari mu bibazo bikomeye cyane, mfite abantu bandwanya impande zo hirya no hino, bivanga.

Byabaye ibintu birebire cyane ariko navuga ko byageze aho ubuyobozi bw’amagereza, buza kubona ko ari ikibazo, kuko natumye, byabaye ngombwa ko mfata Maitre Gatera ngo ajye kubwira umuyobozi mukuru w’amagereza mu Rwanda ko mfite ikibazo gikomeye, hanyuma ibyo birarangira.

Ariko mu gihe byari birangiye, muzi ko muri iyi minsi, ku itariki ya 30 z’ukwa gatandatu twimukiye i Mageragere, mu yindi gereza nshyashya ngari. Icyo gihe nabwo nari ahantu nari jyenyine ariko hari umuntu bari bahazanye twagombaga kubana. Ariko ahaza nyine ari umudamu ngo ufite abantu bakomeye, anshyiraho ibintu by’ibikabyo byinshi cyane byo gushaka kuntera ubwoba, no kuvuga ko ashobora kuzana abantu bakandasa. Ariko ku bw’amahirwe, haba hari ikibazo abafungwa ubwabo n’ubuyobozi bw’amagereza ubwabo butandukanya ibyo bibazo. Nk’aho ngaho ubuyobozi bw’amagereza nahise mbusaba ko mfite icyo kibazo, bukora ku buryo uwo mudamu buhita bumunkura iruhande ajya kuba ahandi.

Donc, ibibazo nabiterwaga kenshi n’abafungwa bamwe biyitiriraga ko ari abo mu ishyaka rya FPR, noneho bagashaka mu by’ukuri kugaragaza ko barimo bakorera ishyaka ariko mu by’ukuri nta nubwo n’iryo shyaka ryabaga ryabatumye. Nabiboneraga ku byemezo ubuyobozi bw’amagereza bwahitaga bufata, iyo abo bantu bashakaga kungirira nabi.

Musabyimana Gaspard: Nonese ubungubu baragufunguye, hagiye gukurikiraho iki?

Victoire Ingabire: Ikigiye gukurikiraho, ahantu ngiye gushyira imbaraga ni mu bintu bibiri: icya mbere ni ugukomeza guharanira ko bariya bagenzi bacu bafunzwe nabo bafungurwa, icya kabiri n’ubundi ni bwa butumwa n’ubundi mwari mwampaye bwo kuza kwandikisha ishyaka.

Ariko kwandikisha ishyaka atari ukugira ngo tugwize umurongo w’amashyaka ahubwo ari uguharanira ko ishyaka ryacu ryandikwa amarembo ya politiki afunguye. Ni cyo cy’ingenzi, ni cyo ngiye kongera gushyiramo imbaraga n’abarwanashyaka bacu, ku buryo ntekereza ko nta kibazo bizatera ubutegetsi. Kuko ntekereza ko nabwo bubona ko gufungura amarembo, kureka hakaba imiyoboro myinshi yo gutanga ibitekerezo, aribwo buryo bwiza bwo gutegurira ejo hazaza urubyiruko rw’u Rwanda.

Musabyimana Gaspard: Yeee, nabonye umunyamakuru ashaka kongera kukubaza ibyerekeye ibitero waba warateguye, ngira ngo burya urya mu “procureur” wagushinje yanditse igitabo asa n’aho abishimangira ngo ko babonye impapuro ngo zerekana ko wari ufite ibintu by’igitero, ntacyo wamusubije ariko sinzi niba abarwanashyaka barebye ibyo bintu hari icyo wababwira?

Victoire Ingabire: Abarwanashyaka ba FDU Inkingi ngira ngo bazi principes z’ishyaka ryacu, bazi ko turi ishyaka ry’amahoro. Bazi ko tutemera ibintu byo kuzana intambara. Tuzi ko twemera ko urugamba bw’ibitekerezo ari rwo rugamba FDU yiyemeje. Ni narwo izanakomeza, ni narwo nzanakomeza, uriya we rero yabifashe kuriya, avuga kuriya kubera ko harimo benshi bakomeje kubifata gutyo ariko ntekereza ko ari ukudakurikira kuko ngira ngo hari Urukiko Nyafurika ruharanira uburenganzira bwa muntu, nk’ibyo byaha byo kuvuga ngo ibintu by’imitwe ya gisilikare, bavuze ko ibyo bintu bitigeze bibaho, kwabaye kwica amategeko.

Kandi ikindi gikomeye ni uko, muribuka ko no mu gihe bandegaga, hari n’umutwe bari baranawuhaye n’izina bavuga ngo uwo mutwe ni uwa FDU ariko byarangiye bigaragara ko FDU nta mutwe wa gisirikare ifite, n’uwo mutwe ntawari uhari, ntawo bigeze bashobora kugaragaza.

Musabyimana Gaspard: Ndibuka n’abasikirakare bamwe ko bari bivuguruje bakavuga bati “ibyo by’imitwe ya gisirikare ntabyo tuzi” bageze mu bucamanza.

Victoire Ingabire: Tugeze mu bujurire abasirikare bamwe banavugaga ngo hari ibikorwa twafatanyije by’iterabwoba, bageze aho bakajya ahubwo bahindukira “procureur” [umushinjacyaha] bakamubaza bati “ibyo bitero, ibyo bikorwa uvuga twakoze ni ibihe?” Ahubwo igitangaje nyine ni uko uwo mu “procureur” wavugaga, Mukurarinda, atigeze nko mu gitabo cye nk’ibyo ngibyo abishyiramo, ngo agaragaze ko n’abo bantu mbere bari kumwe byageze aho bakamuhinduka, bakavuga bati “ibyo bikorwa mutubwira ntabyayeho” kandi koko nabo nta bikorwa bya gisilikare bigeze bashobora kugaragaraza ko nigeze njyamo cyangwa nigeze nkora ku gihugu cyacu kuko igihugu cyanjye ndagikunda.

Hamenetsemo amaraso menshi ntabwo nifuza ko hari andi maraso yakongera kumeneka, cyane ko jyewe nemera yuko dukoresheje imbaraga z’ibitekerezo, tukageza ku Banyarwanda gahunda za politiki zinyuranye, Abanyarwanda bagahabwa ubwisanzure mu gutanga ibitekerezo, utanze ibitekerezo akaba afite umutekano we usesuye, ntafungwe cyangwa ngo agire umuhutaza, ibyo bintu twakubaka u Rwanda rwacu mu mahoro rwose kandi birashoboka, kandi ndizera ko tuzabigeraho.

Musabyimana Gaspard: Yeeee reka tukureke uruhuke, kereka niba hari akajambo wabwira abatwumva.

Victoire Ingabire: Ni ukubasaba ko umurava wabaranze mu myaka ishize n’ubundi ukomeza. Nababwira ko urugamba ariho rugitangira. Ni nkaho tugiye kurutangira, tugiye gukomeza. Najyaga nkunda kubwira abarwanashyaka bari hano mu gihugu ko niba duhinze tudatekereza ko tuzahita dusarura ako kanya.

Ndagira ngo rero nsabe abarwanashyaka bacu ari abari mu gihugu ari abari hanze, kumva ko batagomba kurambirwa ngo bavuge ngo ibihe birarambiranye ariko bagomba kumenya ko icyo turimo gukora ni igikorwa cyiza turimo dutegurira igihugu cyacu, ni igikorwa gisaba ubwitange, ni igikorwa gisaba umurava, nkaba mbasaba gukomeza kugira umurava n’ubwitange kugira ngo tugere ku ngamba twiyemeje yo guha igihugu cyacu demokrasi isesuye iha buri wese umwanya we mu gihugu cyacu.

Musabyimana Gaspard: Yeee urakoze presidente!

Victoire Ingabire: Yego namwe murakoze!

Iki ni ikiganiro nibukije kugira ngo nzagihereho mbwira abantu, cyane abanyamakuru, ko guha IVUmuhoza, ijambo ari ugutera inkunga ingengabitekerezo yicishije abarenga miliyoni mu Rwanda ikangaza benshi. Ni inyandiko ije ikurikira iyerekana abanyamigabane ba mbere ba RTLM kuko mu isesengura tuzakora bifitanye isano.

RTLM ni kimwe na Jenoside. RTLM ni yo FDU-Inkingi. Kuba hari abanyarwanda nka babiri bitandukanyije nayo bakarwanya ingengabitekerezo yayo, ni iby’agaciro. Abo bayitaje bakaba ari bamwe mubafatanyije n’abandi kurwanya igwingira ry’imitekerereze n’imyumvire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza