Igerageza ryakozwe ku mupaka wa Gatuna ryasize iki?

Yanditswe na Habimana James
Kuya 29 Kamena 2019 saa 09:46
Yasuwe :
0 0

Tariki ya 7 Kamena 2019 nibwo Ikigo cy’imisoro n’amahoro (RRA) cyatangaje ko umupaka wa Gatuna ufunguye by’agateganyo ku modoka nini mu gihe cy’ibyumweru bibiri, nyuma y’uko zabujijwe kuwukoresha muri Werurwe kubera imirimo yo kubaka uyu mupaka uhuriweho, One Stop Border Post.

RRA yagendeye ku busabe bw’Ikigo gishinzwe iterambere ry’ubwikorezi, RTDA, cyashakaga gukora igerageza ry’ubwubatsi bwari bumaze gukorwa, maze hatangazwa ko amakamyo atwaye imizigo iremereye yemerewe by’agateganyo kwambukiranya umupaka wa Gatuna (OSBP) mu gihe cy’ibyumweru bibiri, hagati ya tariki ya 10 - 22 Kamena 2019.

Umuyobozi mukuru w’Ikigo cya Leta gishinzwe iterambere ry’ubwikorezi (RTDA), Imena Munyampenda, yabwiye IGIHE ko nyuma y’igenzura bakoze, basanze hari bike bigomba gukosorwa ariko Nyakanga izasiga imirimo yose irangiye.

Ati “Hari utuntu duto nko gusanga ahantu irangi risize nabi, inzugi zisizwe nabi ariko ibi ni ibintu ubona ko bidakomeye, gusa mbere yo kwakira inzu twe nk’abubatsi tureba ko yo inzu yose ikoze neza, iyo ubonye ibyo bintu umwongerera igihe kugira ngo abashe kubikosora.”

Yakomeje agira ati “Muri Nyakanga twe tuzaba twarangije akazi kacu ubwo kongera kuhakoresha bizakorwa na RRA.”

Komiseri wungirije Ushinzwe abasorora muri RRA, Mukashyaka Drocelle, yabwiye IGIHE ko kuva tariki 22 nta modoka ninini zari zemerewe kongera kunyura ku mupaka wa Gatuna kuko byari igerageza ryari ryasabwe na RTDA.

Ati “Izi modoka zakomeje gukoresha umupaka wa Kagitumba kugira ngo RTDA banoze ibyo bashakaga ko binozwa ariko imodoka nto ziracyahanyura nk’uko bisanzwe.”

Kubaka umupaka wa Gatuna ni umushinga wagombaga guhurirwaho n’ibi bihugu byombi hagamijwe koroshya ubucuruzi n’urujya n’uruzi mu nzira y’umuhora wa ruguru. Iyi nzira ikoreshwa cyane mu kuvana ibicuruzwa ku cyambu cya Mombasa muri Kenya inyuze muri Uganda, igakomeza mu Rwanda.

Umushinga wo kubaka umupaka wa Gatuna biteganyijwe ko uzatwara miliyari 15 Frw.

Nubwo imirimo igeze ku musozo ku ruhande rw’u Rwanda, ku ruhande rwa Uganda ho imirimo isa nk’itarimo gukorwa kuko ahagombaga kubakwa nta gikorwa kihagaragara. N’umuhanda uhari ni uw’igitaka, inyubako zihari nazo zigaragara ko ari iza kera kuko zishaje, izari zatangiye kubakwa nazo zarahagaze.

Umushinga wo kubaka umupaka wa Gatuna ku ruhande rw’u Rwanda watewe inkunga na Guverinoma y’u Rwanda mu gihe ku ruhande rwa Uganda hari hitabajwe abaterankunga barimo Banki y’Isi ariko nayo iza kwisubiraho.

Iyi mirimo kandi ikomeje mu gihe umubano w’u Rwanda na Uganda utifashe neza, aho u Rwanda rukomeje gushinja icyo gihugu guhohotera abaturage barwo bafungwa mu buryo butemewe n’amategeko ndetse bagakorerwa iyicarubozo, ku buryo muri Werurwe rwasabye abaturage kuba bahagaritse kujya muri Uganda.

U Rwanda kandi rushinja icyo gihugu gucumbikira no gutera inkunga imitwe igamije kuruhungabanyiriza umutekano, irimo RNC ya Kayumba Nyamwasa, FDLR, FLN n’indi.

U Rwanda rugeze ku musozo w'imirimo yo kubaka umupaka uhuriweho wa Gatuna
U Rwanda rugeze hafi 100% kugira ngo rube rwujuje umupaka wa Gatuna
U Rwanda ruri mu mirimo ya nyuma ngo kubaka umupaka wa Gatuna birangire
Mu gihe cy'ibyumweru bibiri, amakamyo manini yemerewe gukoresha uyu mupaka
Ku ruhande rwa Uganda nta mirimo iharangwa n'ubwo u Rwanda rugeze kure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza