Icyo Mineduc ivuga ku rwango ruvugwa hagati ya Minisitiri Musafili n’Umuyobozi wa Kaminuza ya Rusizi

Yanditswe na Rabbi Malo Umucunguzi
Kuya 20 Werurwe 2017 saa 07:52
Yasuwe :
1 0

Minisiteri y’uburezi yanenze bikomeye Umuyobozi wa Kaminuza ya Rusizi uheruka kwandikira Minisitiri w’Intebe, Anastase Murekezi, ashinja Minisitiri w’uburezi Dr Musafiri Papias Malimba ko ari inyuma y’ifungwa rya kaminuza ayoboye.

Kaminuza ya Rusizi iri mu mashuri makuru ane yahagarikiwe ibikorwa mu buryo bw’agateganyo nyuma y’igenzura ryakozwe na Minisiteri y’uburezi, bahabwa amezi atandatu ngo bakosore ahagaragaye inenge, babone kwemererwa gusubukura gutanga amasomo.

Gusa mu ibaruwa Dr Gahutu Pascal uyobora Rusizi International University yandikiye minisitiri w’Intebe kuwa 11 Werurwe, avuga ko Minisitiri w’Uburezi ari inyuma y’ifungwa rya Kaminuza ye, amwanga ndetse ari we uheruka no kumufungisha.

Mu kiganiro n’abanyamakuru kuri uyu wa Mbere, Minisitiri w’Uburezi Dr Musafili Malimba Papias yabwiye abanyamakuru ati « Icyo ntacyo nza kukivugaho », ariko ntibyabujije Umunyamabanga wa Leta Ushinzwe amashuri abanza n’ayisumbuye kubikomozaho.

Munyakazi yateruye agira ati «Reka mvuge kuri icyo utari ushatse kuvugaho, numvaga n’ubundi nukivugaho bisa n’aho ari urubanza ugiye kwiregura ku bakurega ko icyemezo cyafashwe ari uko mufitanye amasinde, reka njye mbivugeho. »

Yatangiye avuga ko bibabaje kuba umuyobozi wa kaminuza yashyira mu majwi Minisitiri w’uburezi ku giti cye aho guha agaciro amabwiriza yasabwe kubahiriza, ngo kaminuza ye ikomeze imirimo kimwe n’izindi.

Yakomeje agira ati «Kuba rero mu gihe abandi bose bakiriye amabaruwa bagasubiza na minisiteri bemera ibyavuzwemo banavuga ko bagiye kwihutisha kubishyira mu bikorwa, Rusizi yo ahubwo yafashe indi ntambwe. Aho kugira ngo isubize uwayandikiye, itaga ikirego izanamo umuntu ku giti cye. Aho kugira ngo ivuge ibibazo bihari ahubwo igiye ku muntu ku giti cye. Ibyo rero ni ukubura ubunyamwuga, reka mbivuge gutyo. »

Munyakazi yavuze ko kaminuza ya Rusizi itangombaga kuzanamo umuntu ku giti cye kuko Minisitiri yayandikiye nk’umuyobozi w’urwego, kandi ngo igenzurwa rya nyuma ryashingiweho rigatuma iyo kaminuza ihagarikwa ryakozwe n’abarimo n’abanyamahanga, badafite aho bahuriye n’ibyo ubuyobozi bwa Kaminuza ya Rusizi byita « ibibazo by’umuntu ku giti cye. »

Abo bagenzuzi ngo ni na bo bagaragaje ikibazo ku kindi muri byinshi biri muri Kaminuza Mpuzamahanga ya Rusizi.

Munyakazi yakomeje agira ati « Nimubikurikira rero mukamenya n’amateka y’iriya kaminuza, ni ukuvuga ngo igihe kirageze kugira ngo dutandukanye kuzana ubucuruzi mu burezi. Uburyo bwose leta yaba ishyigikira ishoramari ry’abikorera, uzashyira imbere inyungu kurenza uko icyo aha abana b’Abanyarwanda, uko yabyita kose, ngira ngo sinaba nshize isoni kuvuga ngo minisiteri ntizigera na rimwe ibyitaho.»

« Nimwinjiramo mukareba ibyo yakurikiranyweho, muzasanga amateka yayo yarabaye cyane ayo gukora ubucuruzi kurenza uko bajya mu burezi. Bahawe igihe nk’abandi, berekwa ibyo bagomba kuzuza, nibaza ko nibabyuzuza, nitubaha uburenganzira, sinzi icyo bazavuga icyo gihe kuko amahirwe abandi bahawe na bo barayahawe. »

Uretse Kaminuza enye zahagarikiwe ibikorwa mu buryo bw’agateganyo, hari amashuri yahagarikiwe by’agateganyo zimwe muri porogaramu z’amasomo yatangaga arimo University of Technology and Arts of Byumba (UTAB) ikorera i Gicumbi, Open University of Tanzania ikorera mu Karere ka Ngoma, University of Gitwe ikorera mu Ruhango, Jomo Ketta University of Agriculture and Technology ikorera muri Kicukiro, Institut Catholique de Kabgayi (ICK) ikorera i Muhanga na Institut d’Enseignement Superieur de Ruhengeri (INES-Ruhengeri) ikorera i Musanze.

Bose bafite amezi atandatu ngo buzuze ibyo basabwe, babone gukomorerwa.

Inkuru wasoma: Mineduc yahagaritse amwe mu mashami muri kaminuza 10, yiyemeza kugoboka abashaka kwiga ahandi

Dr Gahutu yikomye Minisitiri w’Uburezi ku ifungwa rya Kaminuza ya Rusizi :

Minisitiri w’Uburezi Dr Musafili Malimba Papias ntiyashatse kugira icyo avuga ku rwango Dr Gahutu amurega
Munyakazi yavuze ko bibabaje kuba umuyobozi wa kaminuza yashyira mu majwi Minisitiri w’uburezi ku giti cye aho guha agaciro amabwiriza yasabwe kubahiriza,

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza