Kwamamaza

Icyo Kagame,Obama,Narendra n’abandi batangaje ku ivugururwa ry’amasezerano ya Montreal

Yanditswe kuya 18-10-2016 saa 09:24' na IGIHE


Abakuru b’ibihugu na za Guverinoma, abayobozi batandukanye ku Isi yose ndetse nabo mu miryango mpuzamahanga, bakomeje kwishimira intambwe ikomeye yatewe havugururwa amasezerano ya Montreal agamije kubungabunga akayunguruzo k’izuba no kurengera ibidukikije.

Aya masezerano yashyizweho umukono i Kigali n’ibihugu hafi 200 kuwa Gatandatu w’icyumweru gishize, nyuma y’imyaka irindwi y’ibiganiro bigamije kugabanya ubushyuhe kugera munsi ya dogere 2 nk’uko byemejwe mu nama yabereye i Paris mu Bufaransa mu mwaka ushize.

Ni amasezerano agamije icibwa ry’imyuka ya “hydrofluorocarbons” (HFCs) yoherezwa mu kirere n’ibyuma bikonjesha nka za firigo cyangwa ibyuma bitanga ubuhehere bw’umwuka mu nzu, ariko bikagira ingaruka zikomeye mu gutuma ikirere gishyuha.

Perezida Paul Kagame wari mu bayobozi bitabiriye uwo muhango yavuze ko kuvugurura ariya masezerano bizatuma Isi iba nziza kandi igatera imbere.

Ku rubuga rwa Twitter Umukuru w’Igihugu yashimiye buri wese witabiriye ibiganiro byo kuyavugurura, avuga ko umurimo ukomeye wabyaye umusaruro w’amasezerano y’ingirakamaro cyane.

Perezida wa Leta Zunze Ubumwe za Amerika, Barack Obama, mu itangazo ryashyizwe hanze na Perezidansi y’icyo gihugu, yavuze ko ariya masezerano ari ikimenyetso kigaragaza gushyira hamwe.

Rigira riti “Izi ntambwe duteye ziratwereka ko nubwo dipolomasi itakoroha dushobora gukorera hamwe tugasigira abana bacu umubumbe umeze neza, uteye imbere cyane, utekanye cyane kandi wisanzuye kuruta uwo twasigiwe.”

Amasezerano ya Kigali agena uburyo ibihugu bikeneye inkunga byayihabwa kugira ngo ikoranabuhanga rishya ry’ibyuma bikonjesha ribashe kugera ku baturage babyo bose.

Perezida Obama akomeza avuga ko kuvugurura amasezerano bigaragaza ko bishoboka ko hagira igikorwa mu rwego rwo kurengera umubumbe, hitabwa ku gufasha ibihugu byose guteza imbere imibereho y’abaturage babyo.

Minisitiri w’Intebe w’u Buhinde, Narendra Modi, abinyujije kuri Twitter yavuze ko ariya masezerano azashyiraho uburyo ibihugu nk’u Buhinde byabasha kugera ku ikoranabuhanga ridatera imyuka yangiza akayunguruzo k’izuba.

Yagize ati “Ukoroherana n’ubufatanye bwagaragajwe n’u Buhinde n’ibindi bihugu kwabyaye aya masezerano atabogama, aciye mu kuri kandi afite intego. Ivugururwa ry’amasezerano ya Montreal ryabereye i Kigali, ni imwe mu ntambwe itewe mu mateka izagira umumaro urambye ku mubumbe wacu.”

Umunyamabanga wa Leta Zunze Ubumwe za Amerika, John Kerry, yagize ati “Kuvugurura amasezerano biranasobanura neza ubutumwa bw’ingirakamaro twoherereje inganda n’abikorera. Ba rwiyemezamirimo n’abahanga udushya aho bari hose, bashobora gukomeza gushora imari mu gushaka ibisubizo birengera ikirere nta mpungenge.”

“Ibihugu mu bice byose by’Isi, bishishikajwe no guhindura uburyo umubumbe wacu umeze. Turashaka guhindura Isi nziza mu buryo burambye kandi intambwe yacu irihuta.”

Kuvugurura aya masezerano birafasha ibihugu ko nibura iki kinyejana kizarangira ubushyuhe bugeze ku mpuzandengo ya dogere Celcius 1.5, ndetse imyuka ya CO2 ikagabanywaho jigatoni (gigatonnes) 100 bitarenze 2050.

Muri aya masezerano ibihugu bikize birimo ibyo ku mugabane w’u Burayi, Leta Zunze Ubumwe za Amerika n’ibindi bizatangira guhagarika ikoreshwa ry’ibyuma bikonjesha, HFCs, mu myaka mike iri imbere aho bizagabanya kugeza ku 10% mu 2019.

Ibihugu biri mu nzira y’amajyambere nk’u Bushinwa, ibyo muri Amerika y’Amajyepfo n’ibindi bizatangira kugabanya ikoreshwa ry’ibi byuma mu 2024.

Ibindi bihugu birimo u Buhinde, Pakistan, Iran, Iraq bizagabanya ikoreshwa ry’ibyuma bikonjesha mu 2028.

U Bushinwa nk’igihugu gikora ibi byuma kurusha ibindi ntikizahagarika inganda zibikora mbere ya 2029.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved