Kwamamaza

Icyegeranyo ku mpanuro Perezida Kagame yatangiye muri Rwanda Day esheshatu ziheruka

Yanditswe kuya 2-10-2015 saa 10:20' na Cyprien Niyomwungeri


‘’Rwanda Day’’ ni umunsi uhuza Abanyarwanda baba mu gihugu no mu mahanga, kimwe n’inshuti z’u Rwanda bakaganira ku cyarushaho guteza imbere igihugu, hakabaho kumara amatsiko bamwe mu Banyarwanda baba bamaze igihe kitari gito batagera mu Rwanda babwirwa aho rugeze, bityo buri wese agasuzumira hamwe n’abandi uruhare rwe mu iterambere ryarwo.

- Mu 2011 i Chicago: “Twaraburaye, twarabwiriwe, twarapfushije, twarapfuye, umutima wacu niwo wanze gupfa.”

- Mu 2011 i Paris: “U Rwanda rwa none n’urw’ahazaza ni uruha bose amahirwe angana”

- Mu 2012 i Boston: “Ntidukwiye kwemerera uwo ari we wese kugena abo dukwiye kuba bo.”

- Muri 2013 i Toronto ati “ Byaba ari ishyano gupfa bwa kabiri”

- Mu 2013 i Londres ati “Iyo wiyubashye ukubaha n’abandi, n’abandi barakubaha”

- Mu 2014 i Atlanta ati “Uhinga mu murima we ntabwo asigana”

Kuva mu mwaka wa 2011, Rwanda Day imaze kubera i Chicago, Boston na Atlanta muri Leta Zunze Ubumwe za Amerika, i Paris mu Bufaransa, i Toronto muri Canada, i Londres mu Bwongereza.

Imaze kwitabirwa n’abantu basaga ibihumbi 15 barimo; Abanyarwanda baba mu mahanga, inshuti zabo, abayobozi bakuru bo mu nzego za Leta n’abikorera naho buri gihe Perezida wa Repubulika Paul Kagame akaba ariwe mushyitsi mukuru.

Muri uyu mwaka, Rwanda Day izaba ku itariki ya 03 Ukwakira mu Buholandi,Umukuru w’Igihugu azaganira n’Abanyarwanda baturutse mu bihugu bitandukanye byo ku mugabane w’u Burayi hamwe n’abazaba baturutse mu Rwanda nkuko byagiye bigenda mu zindi Rwanda Day zabanje.

Rwanda Day, umunsi wo kwigira hamwe icyerekezo cy’igihugu

Rwanda Day imaze kuba inshuro esheshatu mu bihugu bitandukanye, mu butumwa Perezida Kagame agenera Abanyarwanda baba mu mahanga nabo mu Rwanda bwibanda ku rugendo u Rwanda rwanyuzemo mu iterambere, aho rugeze n’aho rwerekeza. Umukuru w’Igihugu ntahwema gukangurira Abanyarwanda baba mu mahanga kugira uruhare mu iterambere ry’igihugu cyabo.

Icyo wamenya kuri Rwanda Day yabereye mu Mujyi wa Chicago mu 2011

Rwanda Day yabaye bwa mbere tariki ya 10 na 11 Kamena 2011 ibera mu Mujyi wa Chicago muri Leta ya Illinois. Yahuje Abanyarwanda bagera ku bihumbi bine bari baturutse mu bihugu bitandukanye byo mu Burayi, Canada na Leta Zunze Ubumwe za Amerika n’inshuti z’u Rwanda hamwe n’abari baturutse mu Rwanda.

Icyo gihe yitabiriwe na Perezida Paul Kagame ari kumwe n’umufasha we Madame Jeannette Kagame, abayobozi batandukanye bo muri Guverinoma n’abandi.

Insanganyamatsiko yagiraga iti “Agaciro: Umurage Wacu. Ahazaza Hacu.”
Muri iyi Rwanda Day humvikanye cyane ijambo “Agaciro’’ kuko mu byo bagombaga kwiga, harimo indangagaciro nyarwanda, no mu gusoza uwo munsi Perezida Kagame akaba yaragarutse ku kintu cyitwa ‘kwihesha agaciro’.

Perezida Paul Kagame yaganiriye ndetse anataramana n’Abanyarwanda baturutse mu bice bitandukanye by’Isi, aho yagarutse ku buryo burambuye ku kwiha no kwihesha agaciro nk’Abanyarwanda, avuga ko politiki y’u Rwanda ibanza igashingira ku kwiyubaha no kwihesha agaciro kandi imibereho ya buri wese ari yo imwigisha agaciro k’amajyambere.

Yagize ati: “Imibereho yacu ubwayo itwigisha agaciro k’amajyambere, uwaburaye ntabwo umwigisha akababaro k’inzara, arabizi kukurusha, azi uko ibabaza. Twaraburaye, twarabwiriwe, twarapfushije, twarapfuye, umutima wacu niwo wanze gupfa.”

Yasabye Abanyarwanda baba mu mahanga by’umwihariko ababa mu bihugu u Rwanda rufite byinshi rwakwigiraho ko bakwiye kujya batahuka mu Rwanda bagasangiza abo mu gihugu hagati ubumenyi baba barungutse, gusa abasaba kwirinda imico mibi yo hanze.

Yagize ati: “Bigireho, ufate ibyo wabigiyeho ubinyarukane mu rugo. Mu Kinyarwanda hari icyo bita guhaha ubumenyi, hano mugomba kuhahaha ubumenyi, niyo mwahaguma, ibyo mukora, ibyo muvanamo, aho amazi atemba agana murahazi.”

Icyo wamenya kuri Rwanda Day yabereye i Paris mu 2011

Mu mwaka wa 2011, Rwanda Day yabereye i Paris ku itariki ya 11 Nzeli, yitabirwa n’abantu 3700 barimo Abanyarwanda n’inshuti zabo. Insanganyamatsiko ya Rwanda Day yabeye i Paris yagiraga iti “Urungano rufite agaciro. Icyerekezo cy’Iteramabere.”

Muri iyi Rwanda Day, mu butumwa Perezida Kagame yahaye abayitabiriye yagize yibanze ku Rwanda rubereye Abanyarwanda agira ati “U Rwanda rwa none n’urw’ahazaza ni uruha bose amahirwe angana, atuma abatishoboye badasigara inyuma ahubwo bagira uruhare iterambere ryacu.”

Icyo wamenya kuri Rwanda Day yabereye i Boston mu 2012

Rwanda Day yabereye i Boston yabaye ku itariki 28 na 29 Nzeli 2012, yari ifite intego igira iti “Agaciro, urugendo rurakomeje”. Yabereye mu Mujyi wa Boston uherereye muri Leta ya Massachusset. Yitabiriwe n’abantu basaga ibihumbi bitatu.

Mu ijambo ryari rikubiyemo impanuro n’ubutumwa yagejeje ku bayitabiriye, Perezida Kagame yibukije buri wese ko afite inshingano zo kubaka no guteza imbere igihugu, aho gukeka ko hari undi wabibakorera.

Yagize ati “Byari bikwiye kutubera isoko y’ishema kuba tubasha guteza imbere igihugu cyacu, kuba dukomoka mu gihugu cy’abantu bafite agaciro n’ubwenegihugu busobanutse bw’u Rwanda […], mukwiye gukomeza kuvuga iby’igihugu cyanyu kuko nimutabikora undi muntu azifuza kubigukorera kandi akabikora nabi.”

Yakomeje agira ati “Ntidukwiye kwemerera uwo ari we wese kugena abo dukwiye kuba bo. Tubifitiye ubushobozi, ubushake n’uburenganzira bwo kugena abo dukwiye kuba bo. Twateye intambwe muri iki cyerekezo, kandi bikwiye gukomeza kuko ari byo dukwiye.”

Muri iyi Rwanda Day yashimangiye ko iterambere ryagezweho nta nzira y’ibusamo cyangwa ibinyoma byifashishijwe.

Yagize ati “Ntitwabeshya ku birebana n’intambara turwana umunsi ku munsi kugira ngo tugere ku iterambere. Iterambere rikurura abanzi (detractors), gusa ibyo na byo nta kibazo biteye. Nta kibazo mfitanye n’abanzi. Abanzi mukore akazi kanyu, nanjye nzakora akanjye. Njyewe nawe akazi kacu ni ako gukomeza gukora ngo tugere ku iterambere.”

Icyo wamenya kuri Rwanda Day yabereye i Londres mu 2013

Rwanda Day yabereye i London mu Bwongereza yabaye kuwa 15 Gicurasi 2013. Abanyarwanda 3000 n’inshuti zabo baba mu Burayi, muri Amerika ya Ruguru no muri Afurika barayitabiriye.

Rwanda Day yabereye i London yari ibaye ku nshuro ya kane ikaba yari ifite insangamatsiko igira iti “Agaciro: Duharanire Kwiteza Imbere”.

Perezida Paul Kagame yahaye impanuro abari bitabiriye iki gikorwa ngarukamwaka, abasaba gukomeza kwiha agaciro, kwima amatwi abashaka kubatanya kandi no gukora cyane kugirango babashe kwibeshaho badategereje inkunga.

Yagize ati “Amateka yacu yatwigishije kumva ko tugomba kuba ibisubizo by’ibibazo duhura nabyo kandi tukigenera icyerekezo. Icyo Abanyafurika bakwiye guhuriraho bose uko bangana ni ugucika ku muco wo ku gufashwa ahubwo bagaharanira kwigira”
Yakomeje ashimangira ko buri wese aho ava akagera afite ubuzima bwe kandi ko umuntu atabaho ubuzima bwe ngo abeho n’ubw’undi.

Perezida Kagame yavuze ko ibibazo Abanyarwanda bagize babigize ibyabo, bityo n’ibisubizo bikaba bigomba kuva muri bo kandi byose bigashingira ku kwiha agaciro. Ati “Iyo wiyubashye ukubaha n’abandi, n’abandi barakubaha, iyo wiyandaritse uba wiyimye agaciro nta wundi ukaguha.”

Yibukije abari aho ko nta muntu ufite umwenda wo gutunga Abanyarwanda, kandi ngo iyo ibitekerezo bihindutse umuntu abasha kwibeshaho.

Icyo wamenya kuri Rwanda Day yabereye i Toronto mu 2013

Rwanda Day yabereye i Toronto muri Canada, kuwa 28 Nzeli 2013. Abantu basaga 3000 barimo Abanyarwanda n’inshuti zabo barayitabiriye.

Insanganyamatsiko ya Rwanda Day yabereye i Toronto yagiraga iti “Agaciro: Dushyigikira iterambere ry’ahazaza’’. Muri Rwanda Day yabereye i Toronto inzobere z’Abanyarwanda n’inshuti zabo batanze ibiganiro ku bukungu n’ishoramari mu Rwanda.

Perezida Kagame yasabye abayitabiriye kutagera mu mahanga ngo usange biga imico mibi yaho, ababwira ko ahubwo bagomba kumera nk’abagiye guhaha kandi ko ntawe uhaba ibibi.

Yagize ati“Imico mibi ntawayigendera ibirometero igihumbi, kuko n’aho muba mwavuye imibi irahari […] Njye nagenze nkamwe, ntabwo nagenda ibirometero igihumbi njyanywe no kwiga imico mibi.”

Perezida Kagame kandi yavuze ko u Rwanda rwapfuye inshuro imwe, ariko rutazongera gupfa indi ya kabiri.

Yagize ati : “Twebwe nk’Abanyarwanda rero ntabwo twapfa kabiri, twapfuye rimwe, ibyo birahagije, byaba ari ishyano gupfa bwa kabiri, ntidushobora kubyemera.”

Aha yabwiye Abanyarwanda ko kugira Abanyarwanda bazima, ari ikintu kireba abayobozi bose ndetse n’Abanyarwanda bose, atari inshingano za Perezida gusa.

Yanabakanguriye gukomeza kugira uruhare mu kubaka u Rwanda, bakomeze kugira umugambi mwiza wo kureba politiki nzima yubaka.

Icyo wamenya kuri Rwanda day yabereye i Atlanta mu 2014

Ku nshuro ya gatandatu, Rwanda Day yabereye mu Mujyi wa Atlanta muri Leta ya Georgia kuwa 19 na 20 Nzeli 2014, yitabiriwe n’ibihumbi by’Abanyarwada baba mu mahanga ndetse n’inshuti z’u Rwanda.

Yabayemo ibikorwa bitandukanye bitari bisanzwe bikorwa mu yindi minsi y’u Rwanda,birimo nk’umuganura, guhuza abashaka akazi n’abagatanga, inama yahuje abacuruzi n’ibindi.

Kuri iyi nshuro kandi abashoramari na ba rwiyemezamirimo barenga 238 baturutse mu Rwanda mu rwego rwo gushaka imikoranire n’abashoramari b’Abanyamerika.
Perezida Kagame yabahaye impanuro, by’umwihariko aho yasabye ababa mu mahanga gukora bibuka iwabo.

Yagize ati “Mwese ababa hano muri iki gihugu cy’Amerika mujye mwibuka ko muri hano nk’abaje guhaha ubumenyi twashingiraho dukora ibyo ari byo byose byubaka ubuzima bwacu, ari nabyo byubaka igihugu cyacu.”

Perezida Kagame yibukije ko abantu batagomba gusiganira igihugu cyabo.
Yagize ati “Uhinga mu murima we ntabwo asigana, ibyo dukora rero turahinga mu wacu, ntabwo twasigana hagati yacu cyangwa se hagati yacu n’inshuti zacu, ntabwo twasigana buri wese agomba kugira uruhare rwe n’umusanzu we aho yaba ari hose.”

Rwanda Day ku nshuro ya karindwi izabera mu Buholandi kuwa Gatandatu tariki ya 03 Ukwakira 2015. Byitezwe ko Umukuru w’Igihugu azaganira n’Abanyarwanda baturutse mu bihugu bitandukanye byo ku mugabane w’u Burayi hamwe n’abazaba baturutse mu Rwanda nkuko byagiye bigenda mu zindi Rwanda Day zabanje.

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved