ICK yatanze impamyabumenyi ku basaga 300 basoje amasomo

Yanditswe na Mwizerwa Gilbert
Kuya 24 Ugushyingo 2017 saa 12:49
Yasuwe :
0 0

Ku nshuro ya gatandatu mu myaka 15 Ishuri Rikuru Gatolika rya Kabgayi (ICK) rishinzwe, ryongeye gutanga impamyabumenyi ku banyeshuri 380 barangije icyiciro kabiri cya kaminuza barangije mu myaka ya 2015 na 2016 mu mashami y’ubukungu, ishami ry’iterambere n’iry’itangazamakuru n’itumanaho.

Umuhango wo gutanga izi mpamyabumenyi wabaye kuri uyu wa 24 Ugushyingo ku cyicaro cya ICK mu Mujyi wa Muhanga.

Agaruka ku gaciro n’umwanya bahaye igikorwa cyo gutanga impamyabumenyi, Umuyobozi wa ICK , Padiri Dr Ntivuguruzwa Barthazar yahamije ko abasoje amasomo bahawe impamba y’ubumenyi buzabafasha guhangana ku isoko ry’umurimo bakiteza imbere n’igihugu cyabo muri rusange.

Ishimwe Theophile urangije mu ishami ry’itangazamakuru ahamya ko afite intego yo guhanga umurimo ashingiye ku bumenyi yavomye mu myaka ine amaze ku ntebe y’ishuri.

Umuyobozi w’Akarere ka Muhanga, Uwamariya Béatrice yavuze ko ICK yafashije kongerera ubumenyi abatuye Muhanga inafungurira amarembo bo mu tundi turere , bityo byongera ubukungu kuko hari ababonye imirimo abandi bakahanga kugeza ubu itunze benshi.

Nkuko bigarukwaho n’umuyobozi w’ikirenga wa ICK, Musenyeri Smaragde Mbonyintege, ICK yariyubatse mu buryo bushoboka cyane nyuma y’ikibazo cyo gufunga tumwe mu dushami twayo mu gihe cyashize ariko byabaye inzira yo gutera intambwe ihamye.

ICK ni rimwe mu mashuri ya Kiliziya Gatolika ;imaze gusohora ku isoko ry’umurimo abagera ku 2381 ndetse ikagira n’ibigo by’amahugurwa n’ubushakashatsi bigera kuri bine.

Abarimu ba ICK ubwo bari mu mutambagiro
Bamwe mu banyeshuri bahawe impamyabumenyi bari bafite akanyamuneza
Prof. Bakina Wellars, Umuyobozi w'ishami ry'Itangazamakuru asoma urutonde rw'abasoje amasomo

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza