Ibyo wamenya ku ikoranabuhanga mu buvuzi bw’amatwi bukorerwa mu bitaro bya Kanombe

Yanditswe na David Eugène Marshall
Kuya 7 Gicurasi 2018 saa 09:05
Yasuwe :
1 0

Serivisi ya Audiology yibanda ku buvuzi bw’amatwi, ikanatanga inyunganirangingo ku bafite ubumuga bwo kutumva neza.

Amatwi nka kimwe mu byumviro bitanu by’umuntu, uretse kumva amajwi, anagira uruhare mu kumenya ibimukikije harimo no kumuburira hakiri kare ku cyamuhungabanya.

Mu bitaro bya Gisirikare i Kanombe, iyi Serivisi ifite umwihariko wo kuba ariyo yonyine itanga udukoresho dufasha mu kunganira amatwi afite ubumuga. Utwo dukoresho turi mu bwoko bugezweho buzwi nka ‘Digital Hearing Aid’, mu gihe udutangirwa ahandi dukoresha ikoranabuhanga ryo mu bihe bishize.

Jean Bosco Nikonsanzwe ukora muri ibyo bitaro aganira na IGIHE, yavuze ko serivisi ya Audiology muri ibyo bitaro yatangiye mu 2013 kandi imaze kugera kuri byinshi.

Yagize ati “Mu by’ukuri ibitaro bya Kanombe byagiraga abarwayi benshi bafite ubumuga bw’amatwi bakeneraga ubufasha bwo ku rwego rwo hejuru, haba ku ruhande rw’abasirikare ndetse n’abandi batuganaga.”

Nikonsanzwe akomeza avuga ko byari no mu rwego rwo guhangana n’ibibazo byari byibasiye abacitse ku icumu rya Jenoside yakorewe abatutsi mu Rwanda, bari bafite ubumuga bw’amatwi kenshi bagakenera ubufasha mu bihugu bya kure nk’u Buhinde, Afurika y’Epfo cyangwa Kenya.

Abajijwe ku ikoranabuhanga iyi serivise ikoresha, yagize ati “Dufite porogaramu za mudasobwa zabugenewe zifashishwa mu guhuza ibipimo by’amatwi y’uwaje kwisuzumisha. Ibi bikorwa kandi binagirwamo uruhare na Labolatwari yabugenewe ifite ubunararibonye mu gutunganya utwuma twagenewe gusuzuma bene urwo rugero rw’imyumvire n’imikorere y’ugutwi, bityo bikadufasha gutanga inyunganirangingo zifasha ugutwi dushingiye ku bipimo byizewe ku rwego rwo hejuru”.

Mu gihe uburyo busanzwe bwo gupima ubushobozi bwo kumva kw’amatwi bwifashishaga utwuma bakaragira mu gutwi n’intoki ngo babashe kumenya ikigero cyako cyo kumva, i Kanombe ho hari icyumba binjizamo umurwayi, abamusuzuma bagakoresha mudasobwa mu kumenya neza ibipimo bye.

Mu kumenya ububasha bwo kumva bw’ugutwi, Nikonsanzwe yavuze ko bagendera ku bipimo mpuzamahanga by’ijwi.

Yavuze ko urugero rusanzwe rwa muntu rubarirwa hagati ya Decibel (yifashishwa mu gupima ingano y’ijwi) kuva kuri -0,5 kugeza kuri Decibel 25. Ku muntu kumva kwe biringaniye aba afite hagati ya Decibel 26 kugeza kuri 40. Nikonsanzwe avuga ko iyo bigeze kuri urwo rugero aribwo hatangira kurebwa uko umuntu yahabwa inyunganirangingo.

Iyo decibel zigeze kuri 80 mu gutwi k’umuntu ntagire ikibazo, kuba kwaratakaje kumva ku kigero gikomeye, akeneye inyunganirangingo byihuse.

Nikonsanzwe asaba Leta gukomeza gushyira imbaraga mu kugenzura niba koko inganda zikoresha imashini zifite urusaku rushobora kwangiza amatwi y’abakozi zubahiriza amabwiriza yo kurinda umutekano w’amatwi haba ku bakozi n’abatuye hafi y’uruganda.

Yakomeje agira ati “Nk’uko hari utwuma twagenewe gupima ubushyuhe bw’ahantu, no kuri bene izi nyubako ziberamo ibintu bisakuza hagakwiye gushyirwa utwumva dupima urusaku [Sound meters], aho amajwi arengeje ibipimo byagenwe bigakosoka”.

Urusaku rujya kwangiza ugutwi bisaba ko umuntu aba arumazeho amasaha ari hejuru y’umunani, kandi ingaruka zarwo zitangira kwigaragaza nyuma y’imyaka icumi.

Inzobere kandi zerekana ko rimwe na rimwe urusaku rurengeje decibel 80 rushobora gutuma ugutwi gupfa mu buryo buhutiyeho [Surdité aigϋe], bityo rero hagomba gufatwa ingamba zikomeye zo kurinda amatwi kuko ‘kwirinda biruta kwivuza.’

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza