Ibyo utamenye kuri Charles Kinuthia ukurikiranweho ubutekamutwe bwabereye muri Kigali Convention Centre

Yanditswe na Bukuru JC
Kuya 15 Kanama 2019 saa 01:39
Yasuwe :
0 0

Abanya-Kenya batatu barimo ‘Dr’ Charles Chege Kinuthia, Rachel Matipei Nashipai na Vivian Khisa Mukhwana Mutenyo n’Umunyarwanda Mohamad Niyonkuru, bari mu maboko y’ubutabera bakurikiranweho ibyaha bifitanye isano n’inama bateguye muri Kigali Convention Centre, ku wa 25 Kamena 2019.

Icyo gihe urubyiruko rwakoranye ruvuga ko rwatumiwe mu nama yiswe ’Wealth and Fitness Summit’, rwijejwe ubumenyi ku kwihangira imirimo no gutahana $197 kuri buri muntu, ariko basabwa kwishyura nibura 4,500 Frw kugira ngo bemererwe kuyitabira.

Nyuma yo gutahura ko uburyo byateguwe harimo ibyaha, inzego zirimo urw’Ubugenzacyaha, RIB na Polisi, zijeje abatanze amafaranga kuzayasubizwa, n’ababikoze bakabibazwa.

Charles Chege Kinuthia wagombaga kuganiriza abitabiriye iyo nama, amaze kwamamara nk’umuntu utanga ibiganiro ku rwego mpuzamahanga, yazengurutse ibihugu akoranya urubyiruko ndetse hari amakuru ko abantu benshi basabwa kwishyura nubwo yari atarabibazwa, iminsi ye ikuzura ageze i Kigali.

Nyuma y’uko ifungwa ry’aba banya-Kenya rikomeje gufatwa kwinshi, rigahindurwa politiki ndetse bamwe bagafata ko barimo kuzira ubusa, uwitwa Duncan Makori yifashishije Twitter maze agaragaza byinshi azi kuri Kinuthia, imibereho ye ndetse n’uburyo yabonye impamyabumenyi y’ikirenga (PhD) yitirirwa.

Kinuthia yavukiye muri Kenya mu 1983, ku myaka 16 yerekeza muri Australia, akomereza muri Finland mbere yo kwimukira muri Texas muri Leta Zunze Ubumwe za Amerika mu 2006.

Nyuma y’imyaka 10 ageze muri Texas, mu 2016 yahawe ubwenegihugu bwa Amerika binyuze ku mugore yaje gushaka, ariko nyuma akamuta. Ashinjwa kuba yaragiye yinjira abagore benshi afite ibyo abatezeho, yamara kubahaga akabata.

Makori yashyize ahagaragara ubutumwa bw’umugore wavuze kuri Kinuthia ati “Ntabwo ntewe ishema n’ibyo nakoze, ariko nagiye ndyamana nawe igihe yari akibana n’umugore wa mbere. Nubwo inyuma agaragara nk’uwiyubashye, nta cyizere yigirira ari nayo mopamvu ava ku mugore umwe ajya ku wundi.”

“Ahora yiruka inyuma y’abagore ngo bamuheshe icyubahiro, kandi akenshi akareba ba bandi bafite abagabo. Muri Texas honyine uyu mugabo yaryamanye n’abagore 22 nzi neza. Iyaba twese twari tuziranye ngo tuzongere duhure twibukiranye ibyo twamumenyeho.”

Duncan Makori avuga ko muri Texas, Kinuthia yahashatse abagore bagera kuri batatu, aryamana na benshi cyane.

Yakomeje ati “Yagiye anagira imanza nyinshi mu nkiko aho abenshi bamushinjaga kubambura amafaranga. Ubu ntashobora kwakirwa ku butaka bwa Leta Zunze Ubumwe za Amerika kubera ibyo n’izindi mpamvu nza kuvuga nyuma.”

Uko yabonye impamyabumenyi yitirirwa

Kinuthia avuga ko afite impamyabumenyi ya PhD mu bumenyamuntu n’iy’icyiciro cya kabiri cya kaminuza (Bachelor’s) mu micungire y’ubucuruzi yakuye muri Kaminuza ya Helsinki muri Finland, ariko ngo amakuru ni uko yavuye mu ishuri atarangije agahita ajya muri Amerika, ku buryo nta we uzi uko byamugendekeye muri Finland.

Makori agaruka ku bya PhD ya Kinuthia, ati “Kinuthia afite PhD? Oya! Ku myirondoro ye kuri LinkedIn, avuga ko yahawe PhD y’icyubahiro mu bumenyamuntu ariko ntabwo adusobanurira uwayimuhaye. Ndetse no mu bijyanye n’amashuri ye nk’uko byagaragaye hejuru, ntabwo ayigarukaho.”

Iyi mpamyabumenyi y’ikirenga ngo yayihawe na ’Dr’ Clyde Rivers, na we ufite kaminuza itabaho, uwo na we akaba yarihaye impamyabumenyi y’icyubahiro.

Ibyo bigahuzwa n’ibyanditse na Standard Media yo muri Kenya mu 2010, ku mpungenge zari zabaye zose ku mpamyabumenyi z’ikirenga zari zikomeje guhundagazwa ku bantu bazwi muri Kenya, aho nibura abantu 25 bazihawe na United Graduate College and Seminary ya Clyde Rivers, mu myaka ibiri.

Izo mpamyabumenyi yanazitanze mu bindi bihugu bya Afurika n’abayobozi babyo barimo Perezida Yoweri Museveni wa Uganda n’umugore we Janet, Perezida Pierre Nkurunziza w’u Burundi, Laurent Gbagbo wayoboraga Cote d’Ivoire n’umugore we, n’abandi.

Byaje gutangazwa ko izo mpamyabumenyi zitangwa ku bantu benshi kandi bafite amazina azwi, kubera izindi nyungu babatezeho zirimo inkunga no kwimenyekanisha.

Charles Kinuthia yigaragaza nk’umuntu ufite ubumenyi bwinshi

Kinuthia agaragazwa nk’umuntu ufite ubumenyi ku bintu byinshi bishoboka, ndetse mu 2017 yateguye urugendo muri Nigeria, aho yumvishije abantu yari yakoranyije mu nama kwishyura ibintu byose azahakenera.

Muri Texas yahashinze ikigo yise "One Stop Tax", aho abantu bakiganaga bitwaje ibihumbi $25 batangamo, bakizezwa ko umwaka nushira bazahabwa ibihumbi $100. Abatanzemo amafaranga yabo ngo ntibigeze bayasubizwa, aho ubuyobozi bubimenyeye, Kinuthia ahita abura.

Makori yagize ati “Kimwe mu binyamakuru cyo muri Amerika cyigeze kumwandikaho ko ari umuntu wateye imbere cyane abinyujije mu kwihyangira imirimo, ava ku kubeshwaho n’amadolari 10 ya Amerika ku kwezi ashinga ikigo gikomeye muri Amerika.”

Akomeza avuga uko Charles Kinuthia yagaragaje nk’umutekamutwe, yashyizeho icyapa asaba urubyiruko rudafite akazi kwitabira inama igamije amafaranga, ubucuruzi no guhanga ubukire muri Kigali Convention Centre, agatizwa umurindi n’ubushomeri bwugarije urubyiruko.

Yakomeje ati “Inama yagombaga kuba ku wa 25 Kamena kandi kwinjira byari ubuntu. Ariko ibintu byaje guhinduka mbere y’iminota mike ngo inama itangire, urubyiruko rwari rutegereje rusabwa kugira icyo rwishyura.”

“Gusaba urubyiruko rudafite akazi kwishyura $5 - $25 rwaje kwiga uko bashaka amafaranga byabaye umutwaro ku bihumbi by’urubyiruko, biteza akaduruvayo maze bitera amakenga polisi yahise yihutira gusubiza ibintu ku murongo.”

Charles Kinuthia ngo ni umuntu wagiye yita cyane ku kwifotozanya n’abantu bakomeye, nka bimwe mu bituma abayabona bizera ko afite izina rikomeye, bityo akabasha kwambura benshi batabanje kumugiraho amakenga.

Makori ati “Ibi byamufashije gucuruza amagambo akabona amafaranga. Impano idasanzwe waha urubyiruko ni icyizere kandi abakire ni bo bashobora kukirema bakoresheje amagambo yabo. Umwe mu bagore ba Kinuthia yahishuye ko nubwo yataye ishuri ariko ari umuntu usoma cyane.”

Abaregwa ubwo butekamutwe baheruka kugezwa imbere y’urukiko rw’ibanze rwa Kagarama mu Karere ka Kicukiro, bahakana ibi byaha ndetse basaba ko bakurikiranwa badafunzwe, ariko urukiko rwanzura ko bakurikiwana bafunzwe.

Bajuririye icyo cyemezo basaba urukiko gusuzuma niba barekurwa by’agateganyo, bategereje kuburana mu bujurire.

Umushinjacyaha Mukuru, Jean Bosco Mutangana, aheruka kubwira IGIHE ko ibirimo gukorwa n’u Rwanda bikurikije amategeko, bityo n’umwanzuro uzafatwa ari yo uzakurikiza.

Ati “Bafunzwe mu buryo bukurikije amategeko kandi ibyemezo by’inkiko utabyishimiye arabijuririra. Bityo icyo kibazo, kimwe nk’izindi manza zose, giharirwa inkiko mu bwigenge bwazo.”

Ubushinjacyaha kandi bwanateye utwatsi ibyavugwaga mu itangazamakuru ryo muri Kenya ko Kinuthia afunzwe nabi, ibyo bukaba bwarabikozeho iperereza.

Mu kiganiro Perezida Paul Kagame yahaye urubyiruko kuri uyu wa Gatatu mu gikorwa cyiswe Meet The President, yagarutse ku myitwarire ikwiriye kuranga urubyiruko rw’u Rwanda, yo guhitamo igikwiriye.

Ati “Niba dufite urubyiruko rwumva rutyo, rwirukankira ibintu, umuntu akavuga ati njye nkiza abantu, rukiruka rukajyayo hari ikibazo. Nta gutekereza! Ikibi cyane muri byo ni uko uwo wabashutse ko abakiza, yashaka ko bamukiza kubera ko yabavanyemo amafaranga batari bafite.”

Perezida Kagame yavuze ko urubyiruko rukwiye kwirinda ibishuko bya hato na hato.

Kinuthia akurikiranweho ubutekamutwe bushingiye ku nama yari yateguwe muri Kigali Convention Centre
Kinuthia yahawe impamyabumenyi y'ikirenga y'icyubahiro na 'Dr' Clyde Rivers
Kinuthia yifotozanyije na Perezida George Bush wayoboye USA
Inama yari yateguwe muri Kigali Convention Centre yahuruje ibihumbi by'urubyiruko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza