Kwamamaza

Ibyo utamenye ku rugendo rw’ishoramari ry’Umunyemari Makuza uherutse kwitaba Imana

Yanditswe kuya 15-11-2016 saa 04:50' na Rabbi Malo Umucunguzi


Umwe mu bacuruzi bakomeye mu Rwanda, Makuza Bertin, aheruka kwitaba Imana mu ijoro rishyira kuwa Kane tariki 3 Ugushyingo 2016 azize uburwayi butunguranye, ndetse yasezeweho mu cyubahiro n’umuryango we, inshuti n’abavandimwe kwa 7 Ugushyingo 2016.

Ibikorwa bye bizwi cyane ni umuturirwa uri mu Mujyi wa Kigali rwagati, M Peace Plaza n’uruganda rukora matola rwa Rwanda Foam.

Mbere y’Urupfu rwe, Makuza witabye Imana ku myaka 72 yari aherutse kuganira na Radio Rwanda, mu kiganiro cyagarutse ku buzima bwe kuva akiri muto, ishoramari rye kuva rigitangira n’uko abona kwihangira imirimo mu Rwanda rwa none ndetse n’uko yifuzaga ko yatabaruka abana be bamaze gutera intambwe.

Yize imyuga ababyeyi batabishaka

Makuza ni umwe mu banyarwanda bagize amahirwe yo kwiga mu bihe bigoye, aho yize muri ETO Kicukiro (Ecole Technique Officielle) nubwo yavuze ko yajyagayo atarumva ibyo aribyo, ati ‘numvaga iwacu bavuga ngo ni ukujya kwiga kubaza, iwacu batabishaka, ariko ndemera ndaza nta kundi nari kubigenza.’

Yavukiye i Kibeho mu karere ka Nyaruguru, mu 1943, ni naho yize amashuri abanza, agahora atekereza ko mu mashuri yisumbuye azajya kwigisha cyangwa akajya mu iseminari.

Mbere yo gutangira muri ETO Kicukiro mu 1958, Makuza yavuze ko yatangiye uwa karindwi yigira ahubatswe uruganda rwa Kawa i Gikondo, mu gihe iryo shuri ryari ryaratangiye kwimukira ku Kicukiro ariko amashuri ataruzura neza.

Ati “Ntagira iby’imyuga gutyo, sinajya mu bubaji njya mu bukanishi, hari hamaze kuza ishami rishya bitaga ‘Mecanique Generale’, gukoresha amamashini akora ibyuma, amaburo, ibyuma bibaza ibindi byuma, mbijyamo gutyo.’’

Icyo gihe ngo hari imodoka zitwara abanyeshuri , ari ishuri rya leta rikunzwe, ndetse n’Umwami Rudahigwa yaratanze buruse ngo abaharangije bajye boherezwa kwiga mu mahanga hagamijwe guteza imbere imyuga.

Yakomeje agira ati “Urabona iwacu muri Nyaruguru hari abantu babazaga udutebe n’urukero n’iranda, bakavuga bati urinda kujya kubyiga kwa naka ntibabikora? Ibyo bikujyane i Kigali? Umuntu wacu wari ukomeye yari mwarimu, ariko icyo Imana iba yaraguteganyirije ni icyo. ”

Yatandukanye n’Umuryango we badaherukanye

Muri ETO Kicukiro, Makuza yahize imyaka ine n’undi mwaka (mu wa karindwi) yize wo kwitegura, arangiza mu bukanishi mu 1963.

Ati “Nk’uko hari hakenewe abakanishi bakora ku mamashini, umuderegiteri wo muri SOMKI (Ikigo cyacukuraga amabuye y’agaciro i Rutongo) aza gushaka abakozi muri ETO, uyu akaba ari we wari mu kanama kakoreshaga ibizamini mbere yo guhabwa dipolome, aza kumfata mu bo yashakaga, njya gukora i Rutongo.’’

Gusa ngo kubw’amahirwe make ntiyahatinze kuko mu 1963 bahavuye birukanka mu Ugushyingo ubwo abitwaga ‘Inyenzi’ bari bateye mu Bugesera.

Ati “Ubwo natwe twamaze nk’icyumweru mu myobo i Rutongo, tuza kuhava mu Ugushyingo ngaruka hano i Gikondo, hashize iminsi mike njya gutura ku Kimihurura, mpita mbona n’akazi mu Basaleziyani ku Kimihurura.”

“Ndi i Rutongo nibwo iwacu muri Nyaruguru byagendaga nabi ndatakara, nsigara ino njyenyine. Kuko turangiza gukora ikizamini naravuze nti reka mbanze mbone akazi, mbone n’aho nzacumbika, menye aho ngiye hanyuma mbone gutaha, ntahe kuri Noheli nahembwe, naguze ishati, icyo gihe hari amashati ya shikibo yari yarateye, nti ngure shikibo ngure n’akaradiyo ntahane muri Nyaruguru.”

Ababyeyi be bahungiye i Burundi, we asigara mu Rwanda atyo. Mu bapadiri b’aba Seleziyani yakoraga ubukanishi yize, aza kuhava naho mu 1967.

Uko yaje gutangira ishoramari rye bwite

Mu 1967 nibwo yatangiye ubukanishi yikorera ku giti cye, aho yari afite imashini ishobora gutunganya ibindi byuma yabonye afashijwe n’abapadiri yakoreraga.

Ati “N’abapadiri babimfashijemo kuko hari haje imashini za okaziyo abapadiri bari batumije zo kujyana gukorera muri atoliye yabo, mbasabamo imwe barayimpa, nkodesha hangari hariya i Gikondo ku muntu wari uhatuye witwaga Sebera Antoine, aho yabumbiraga za rukarakara, nanjye nshyiraho imashini ntangira kwikorera gutyo.’’

Icyo gihe yatangije AMEGERWA (Atelier de Mechanique Generale du Rwanda) n’ubu iracyariho i Gikondo mu Mujyi wa Kigali.

Makuza yavuze ko mu buzima umuntu agomba kumenya kwifatira icyemezo akumva ko ubuzima butoroshye, umuntu atagomba kwibwira ko azabona ibyoroshye ahubwo agomba kwiyemeza gukora ibintu uko byagenda kose, bikananirana ariko ntacyo atakoze.

We yagize amahirwe biramuhira, ikigo cye kirakomera, abubaka akabakorera imiryango y’ibyuma, ibisenge by’inzu, amakarisori y’imodoka, Ubwo hari ahagana mu 1968.

Nyuma yaje kujya guhaha ubumenyi mu mahanga, agera i Nairobi yitegereza imikorere ya Vitafoam ikora matola ndetse anareba imiterere y’imashini bakoresha.

Ati “Ndareba nti imashini zikora gutya… ndareba nti kuki twe tutabikora? Bya bindi byo kwiyemeza rero, nabyo mbijyamo, njya muri banki bampa amafaranga kuko nari maze kubona ingwate, ntangira gutyo Rwanda Foam.”

Izina Rwanda ngo ryagiyeho mu kurwana ku gaciro k’igihugu, no kumenyekanisha ikintu ko gikorerwa mu Rwanda, ngo “umuntu ajye yumva ko aryamiye matola zakorewe mu gihugu cye.”

Makuza yavuze ko nk’umuntu wari uzi imikorere y’amamashini ngo byaramworoheye gushinga nogukurikirana uruganda rwe.

Akomeza agira ati “Nicyo gituma mbwira abahungu b’ubungubu n’abakobwa bose, nibajye mu myuga bige imyuga, ni igitekerezo cyiza leta yagize cyo gushyiraho amashuri y’imyuga kuko ugendana nayo, nta kintu kitabamo tekiniki na gitoya. Iyo rero ufunguye mu mutwe ukamenya kwiyemeza, urabishobora.’’

AMEGERWA na Rwanda Foam ngo zarimo abakozi biganye na Makuza, ku buryo nta mpungenge yari afite mu mikorere y’izo nganda zombi.

Politiki mbi yari imbogamizi ubwayo

Makuza mbere yo kwitaba Imana yatangaje ko mu buzima bwa politiki babagamo kwari “uguhora umuntu yibombaritse”, bikiyongeraho ko yari yarasigaye wenyine, ari ababyeyi, ari abavandimwe bari i Burundi, adafite umuntu wa hafi yakwitabaza uretse inshuti gusa.

Ati “Njye nari naririnze kujya mu bintu bya politiki kandi nta n’uburyo nashoboraga no kubyinjiramo muri icyo gihe, nibanda ku kazi kanjye ndikorera…”

“Ingorane ntabwo zijya zibura mu buzima bw’abantu cyane cyane muri ibyo bihe gukora n’ubucuruzi ubwabyo, ujyane ibikoresho hanze, ubikorere i Kigali ujye kubicuruza za Gisenyi, ingorane ntaho zitaba, ushatse gukora ikitagira ingorane ntacyo wakora.”

Gusa amahoro amaze kugaruka, Makuza yavuze ko ababyeyi be batahutse umutima umaze gusubira mu gitereko, nawe yumva ko ashobora gushora imari ifatika ndetse akaba yasaba n’umuntu bagafatanya bigashoboka.

Ati “Hari ikibanza nari mfite hariya hari RDB, nti reka mpubake ubwo tubonye amahoro, ndubaka ndaharangiza, ngira Imana leta irahamfatira tuhagura nayo, mba mbonye intangiriro ikomeye yatuma nshobora gukora n’ibindi bintu, bampa n’ikibanza hariya hahoze iposita kubera amafaranga bari bamaze kumpa nk’intango yabyo, nacyo ntangira kucyubaka.’’

Icyo gihe na AMEGERWA yari imaze kubyara urundi ruganda rubumba amatafari agezweho, kuko ‘buriya iyo abantu batekanye bafite amahoro bakora ibintu byinshi, ndetse ntumenya n’uko wanabikoze, bigenda byikora buhoro buhoro.’’

Perezida Kagame yatanze ikibanza cyubatsweno M Peace Plaza

Makuza yavuze ko umutekano umaze kuboneka, ishoramari ryakomeje kwiyongera, kugeza ubwo yubatse umuturirwa wa M Peace Plaza uri mu mujyi wa Kigali rwagati. Wuzuye utwaye miliyoni $40. Icyo gihe yanavuze ko kuba Perezida Kagame yarayitashye kuwa 10 Kanama 2015, ari “agaciro kari hejuru y’ibindi byose.”

Yakomeje agira ati “Ikibanza niwe wakimpaye, navuga ko ariwe watumye nyine kiriya gikorwa gikorwa kikagera aho kigeze, kuko iyo umuntu akora ibintu afite amahoro afite umutekano, umuntu akwizeye ngo agushinge ibintu nka biriya ati ‘ahangaha ndahaguhaye uzahubake inzu nziza, yari inshingano nanjye mbonye ikomeye,”

“Nagombaga gukora uko nshoboye kose kugira ngo icyizere bangiriye kitazahera, kugira ngo nanjye mbereke ko ibyo bankoreye babikoreye umuntu muzima, babikoreye umuntu wumva kandi uzi icyo ashaka, kugira ngo nanjye mpeshe agaciro abahampaye.”

Makuza yakomeje avuga ko yagize amahirwe mu kuyitaha Perezida Kagame akiyizira, ashima imiyoborere ye, we watumye u Rwanda rwongera kugira amahoro kuko ‘kugira amafaranga ariko udafite amahoro ntacyo amafaranga yakumarira.’

Yongeyeho ati “Nagize Imana ariyizira, kandi nakubwira se nti namushimira nte? Biragoye sinabona uko mushimira kandi yankoreye byinshi uretse na biriya by’inzu, no kurokoka niwe wandokoye, yatuguranye Interahamwe aradukiza. Umuntu wakurokoye se ikindi atagukorera ni iki?’’

‘Kwikorera ni ibitekerezo si amafaranga menshi’

Makuza Bertin yavuze ko kwikorera ari ukuba umuntu yiyemeza gukora ikintu uko byagenda kose, atavuga ngo uzakora icyoroshye kuko nta kintu kitabamo inzira ziruhije.

Ati ‘‘Icya mbere ni ukwemera ugafata icyemezo ukavuga ngo ngiye gukora iki. Ikindi ni ugukora ikintu ukunda, nkanjye nkunda ibintu byo kubaka, iyo umuntu yubatse inzu ukabona uko izamuka, wumva ari byiza, wumva bigushimishije. Ikindi ukagikurikirana.’’

‘‘Ushobora kuvuga ngo ndashaka gukora ikingiki ariko ndagiha abandi bazakinkorera. Hariya barambwiraga ngo Muzehe hariya hantu hazagushajisha ndi kuzamuka ndeba uko bubaka, n’iyo bamenaga beto hari ubwo nahavaga mu ma saa tanu z’ijoro, ubona ari ibintu byiza. Nka biriya byo kubaka ni na siporo nziza, ntabwo umuntu asazishwa no gukora ahubwo kudakora nibyo byasajisha kurushaho.’’

Makuza avuga ko gutegura umushinga neza nabyo ari ingezi, kuko nawe ubwo yashingaga Rwanda Foam yifashishije amafaranga ya BRD na M Peace Plaza agakoresha amafaranga ya Banki y’Isi, harimo aya IFC na PTA.

Makuza yitabye Imana asize abana batandatu barimo abahungu bane n’abakobwa babiri, ariko akagira n’abandi bana yareraga barimo aba barumuna be bazize Jenoside yakorewe abatutsi.

Uretse umwe ukora muri Banki, abandi bose bakoranaga na se mu nganda, hari ushinzwe AMEGERWA, ushinzwe uruganda rw’amatafari, muri Rwanda Foam hariyo babiri, hari n’undi ushinzwe imikorere ya M Peace Plaza.

Icyo gihe yagize ati ‘‘Nagiye ngerageza kubinginga, abana b’ubu ngubu ni ukubagenza buhoro ubereka inyungu bafite mu gukurikirana ibintu byabo, njyewe izabukuru nazigiyemo muri Rwanda Foam, ubu nsigaye ndi nk’umupolisi wabo, ngenzura ibyo barimo ngo ndebe ko nasiga bari ku murongo, umunsi nzatabaruka nzasige bari ku murongo mwiza.’’

Mu cyiriyo cyabanjirije umunsi wo gushyingura Makuza Bertin, ku Cyumweru tariki ya 6 Ugushyingo 2016, Perezida Kagame yagaragaje ko Makuza ari umwe mu bantu bafashije u Rwanda kwiyubaka nyuma y’ibihe bibi rwanyuzemo ndetse ko ibyo yakoze yaharaniraga inyungu rusange.

Makuza ashimirwa umurage mwiza yasigiye abakiri bato

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved