Ibyo ukwiye kumenya kuri "Raporo ya Muse" yinjiye mu mutima w’uruhare rw’u Bufaransa muri Jenoside ya 1994

Yanditswe na IGIHE
Kuya 13 Ukuboza 2017 saa 08:35
Yasuwe :
0 0

U Rwanda rwokeje igitutu u Bufaransa binyuze muri Raporo yiswe ‘Muse’ aho igaragaza umugambi w’iki gihugu n’uruhare rwacyo muri Jenoside yakorewe Abatutsi igasiga ihitanye ubuzima bw’inzirakarengane zisaga miliyoni.

Iyi raporo yasohotse kuri uyu wa Gatatu, yakozwe n’Ikigo cyo muri Leta Zunze Ubumwe za Amerika cyitwa Cunningham Levy Muse. Ambasaderi w’u Rwanda mu Bufaransa, Jacques Kabale, niwe wayishyikirije ubuyobozi bw’iki gihugu, abusaba kugaragaza inyandiko zose zagizwe ubwiru zivuga ku mibanire yabwo na Leta ya Habyarimana.

Muri iyi raporo, havugwamo ko u Bufaransa bwafashije mu gutanga intwaro ku bakoze Jenoside no kubarinda mbere na nyuma y’iminsi ijana yayo.

Iyi “Muse Report”, u Rwanda ruvuga ko ari igihamya kigaragaza umugambi w’u Bufaransa kugeza ubu, aho inashinja abayobozi babwo gukomeza guhakana uruhare rwabwo muri Jenoside no gutesha agaciro ibijyanye no kuburanisha abakekwaho Jenoside benshi mu bari mu Bufaransa.

Nubwo u Rwanda rwari igihugu cy’u Bukoloni bw’u Bubiligi, u Bufaransa bwagize uruhare runini mu mitegekere yarwo kuva mu myaka ya 1970 ndetse bwateye ingabo mu bitugu ubutegetsi bwa Perezida Juvenal Habyarimana.

Iri raporo ivuga ko Guverinoma ya François Mitterrand yahaye imyitozo abapolisi n’abasirikare bagize uruhare muri Jenoside ndetse yashoboraga no kuba yaratanze umusanzu mu gukora amalisiti y’Abatutsi bari baragaragajwe ko bagomba kwicwa. Inavuga ko abayobozi bakuru b’u Bufaransa bagize uruhare mu kubiba ingengabitekerezo ya Jenoside by’umwihariko mu icengezamatwara ryo kwanga Abatutsi.

Igaragaramo ibyavuzwe na Gen. Christian Quesnot wari Umujyamana wihariye mu by’Ingabo wa Perezida Mitterand kuva mu 1991 kugeza mu 1995.

Uyu mugabo ni umwe mu bashyigikiye bivuye inyuma ubutegetsi bwa Habyarimana. Yigeze kubwira Mitterrand ko ukwinjira mu Rwanda kw’ingabo za FPR ari igikorwa kigamije kubaka igihugu cy’abatutsi bafashijwe n’Ibihugu bivuga Icyongereza. Aha hakaba harashyirwaga mu majwi u Bwongereza ndetse na Leta Zunze Ubumwe za Amerika.

Uyu mugabo ni we wamenyeshaga ubuyobozi bw’ingabo ibikorwa bya gisirikare by’ingabo z’u Bufaransa mu Rwanda, byaba ibyakorwaga ku buryo buzwi cyangwa bwihishe. Mu nyandiko zose yagejeje kuri Perezida Mitterand, Christian Quesnot yasabiraga ubufasha bukomeye ubutegetsi bwa Habyarimana n’ingabo zabwo.

Inyandiko zigeze gushyirwa hanze na Komisiyo y’Igihugu yo kurwanya Jenoside, CNLG, zigaragaramo ko mu gihe cya Jenoside, Christian Quesnot yavuganaga kenshi na Perezida wa guverinoma yakoraga jenoside, akanasaba Perezida Mitterand ko u Bufaransa bwaha ingabo za FAR ubufasha bwa gisirikare.

Ikindi kandi tariki 29 Mata 1994, nyuma y’ibyumweru bitatu Jenoside itangiye, Christian Quesnot yanditse amagambo asebya FPR agira ati “FPR ni ishyaka ry’ ‘aba “fachistes” ntari nabona ahandi. Umuntu yarigereranya n’aba “Khmers noirs”. Bafitanye akagambane n’ababiligi”.

Tariki ya 4 Gicurasi 1994, iryo sebanya ryarongeye. Tariki 6 Gicurasi 1994, Christian Quesnot yatanze inama yo gushyigikira abasirikare ba FAR kandi bariho bakora jenoside.

Tariki 24 Gicurasi, Jenerali Quesnot yarasubiriye, abwira Perezida Mitterand ngo afate icyemezo ku buryo bwihuse cyo guha ubufasha bwa gisirikare butaziguye ingabo za FAR na Guverinoma y’inzibacyuho yitwaje ko “ Kujya ku butegetsi mu karere kwa ba nyamuke bafite intego n’imitere idatandukanye n’iya aba “Khmers rouges” byazatuma haba ihungabana ry’akarere n’ingaruka abo bose bagize ubufatanye no kubera uruhande rumwe batari baratekerejeho mbere”.

Iyi raporo ya Muse yabonywe n’Ikinyamakuru Financial Times, ikomeza ivuga ko mu 1998 Komisiyo y’Inteko Ishinga Amategeko y’u Bufaransa yanzuye ko nta bimenyetso bifatika bigaragaza ko u Bufaransa bwagize uruhare muri Jenoside.

Iyo komisiyo yashimangiraga ko uruhare rw’u Bufaransa muri Kamena 1994 ruzwi nka Opération Turquoise, rwari igikorwa cyiza kigamije guha umutekano usesuye impunzi.

Hashize imyaka u Bufaransa nta Ambasaderi bugira mu Rwanda ndetse mu minsi ishize u Rwanda rwari rwahamagaje urebera inyungu zarwo i Paris nyuma y’uko iki gihugu cyari kibyukije iperereza ku ihanurwa ry’indege ya Habyarimana mu gihe ryari ryarakozwe kera kandi u Rwanda narwo rugatanga umusanzu rwasabwaga.

Minisitiri w’Ububanyi n’Amahanga, Louise Mushikiwabo, yabwiye Financial Times ko hakunze kubaho ibikorwa byo guhisha no guhindura imvugo ku ruhande rw’u Bufaransa hagamijwe gukingira ikibaba ‘abasirikare b’u Bufaransa no guhisha imikoranire ya Politiki mu gihe cya Jenoside’.

Impuguke muri Kaminuza ya Londres, Will Jones, yatangaje ko u Rwanda rwagaragaje inyandiko n’ibimenyetso bitagira ukwivuguruza mu kugaragaza uruhare rw’u Bufaransa.

Minisitiri Mushikiwabo yakomeje atangaza ko Perezida Mitterrand yagaragaje Jenoside muri Afurika ‘nk’ikintu kidahambaye’.

Yanagarutse ku bavuga ko mu Rwanda habaye Jenoside ebyiri, aho ngo Jenoside yaba yarakozwe n’Abahutu ku rundi ruhande ikanakorwa n’Abatutsi; ko byose biri mu mugambi w’abayobozi b’u Bufaransa wo guhisha uruhare rwabo mu gihe bari mu gihugu.

Iyi raporo isohotse nyuma yaho imiryango itatu yo mu Bufaransa irimo uwitwa Sherpa ugizwe n’abanyamategeko baharanira kurwanya ibyaha by’imari no kurengera ababikorewe; Impuzamiryango iharanira ko abakoze Jenoside mu Rwanda baburanishwa (CPCR) na Ibuka, bamaze kurega banki ikomeye mu Bufaransa BNP Paribas, bayishinja kugira uruhare muri Jenoside yakorewe abatutsi.

Ubutabera bw’u Bufaransa buherutse gusaba ishami ryabwo riri i Paris rishinzwe ibyaha bya Jenoside n’iby’intambara, gutangira iperereza ku birego bivuga kuri BNP Paribas.

Ikirego kivuga ko iyi banki yasohoye amafaranga bisabwe n’abari abayobozi mu Rwanda akishyurwa intwaro zazanwe mu gihugu muri Kamena 1994, bikanyuranya n’umwanzuro Umuryango w’Abibumbye wari wafashe ku wa 17 Gicurasi 1994, ukumira u Rwanda ku isoko ry’intwaro nyuma yo kubona ko hari kuba Jenoside.
Igurwa ry’izo ntwaro ngo ryari rihagarikiwe na Col Theoneste Bagosora wakatiwe gufungwa imyaka 35, ari kumwe na Petrus Willem Ehlers wari nk’umuhuza, uwo akaba yarabaye Umunyamabanga wa Pieter Willem Botha, Minisitiri w’Intebe wa nyuma wa Afurika y’Epfo.

Nk’uko ikirego cyashyikirijwe umucamanza mu rukiko i Paris kibigaragaza, ngo uwo muhuza yishyuwe inshuro ebyiri kuri konti iri muri banki yo mu Busuwisi (Union Bancaire privée de Genève), ubwa mbere ahabwa $592 784 indi nshuro ahabwa $734 099, yose hamwe akagera kuri miliyoni $1.3, yatanzwe na BNP Paribas bisabwe na Banki Nkuru y’u Rwanda, BNR.

Mu bihe bitandukanye, hagiye hakorwa raporo zivuga ku ruhare rw’u Bufaransa muri Jenoside yakorewe Abatutsi ndetse no ku ihanurwa ry’indege ya Habyarimana ubwayo.

Izwi cyane ni ‘Raporo Mucyo’ yakozwe ikuriwe n’uwari Senateri Jean de Dieu Mucyo aho yerekana uburyo u Bufaransa bwari buzi ko hari jenoside iri gutegurwa, uruhare rwabwo mu bikorwa by’ingenzi byo gutegura jenoside, uruhare rwabwo mu ishyirwa mu bikorwa ry’umugambi wa jenoside.

Harimo kandi igice cya kivuga k’uburyozwe bw’ingabo z’u Bufaransa mu gukomeza ibikorwa bya jenoside mu gace kiswe ak’ubutabazi bubinyujije mu cyiswe operation turquoise n’ikindi cyerekana abayobozi bo mu nzego za politiki n’iza gisirikare z’u Bufaransa bagize uruhare rugaragara muri jenoside.

Hashize iminsi kandi u Rwanda rusohoye ndetse rugatangira iperereza ku basirikare bakuru b’u Bufaransa bagize uruhare muri Jenoside yakorewe Abatutsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza