Ntabwo bindeba: Perezida Kagame asubiza uwamubwiye ko nta muyobozi w’i Burayi utinda ku butegetsi

Yanditswe na Iradukunda Serge
Kuya 18 Gashyantare 2021 saa 03:26
Yasuwe :
0 0

Ni kenshi abayobozi b’ibihugu byo ku Mugabane wa Amerika n’u Burayi bumvikana banenga imiyoborere y’ab’ibikiri mu nzira y’amajyambere cyane cyane ibyo ku Mugabane wa Afurika ndetse rimwe na rimwe bakarenga aho bakanabereka uko bagakwiye kuba babiyoboye.

Kimwe mu byo bakunze kwitwaza banenga imiyoborere yo muri Afurika ngo ni uko aba Perezida baho bamara igihe kinini ku butegetsi, bakemeza ko ibi ubirebeye mu ndorerwamo za Demokarasi bidakwiye.

Mu bayobozi bo muri Afurika bakunze kubazwa n’itangazamakuru ku bijyanye na manda zabo harimo na Perezida w’u Rwanda, Paul Kagame.

Kuri iyi nshuro umunyamakuru wongeye kumubaza ikibazo nk’iki ni uwa CNN, Richard Quest.

Richard Quest mu minsi ishize wari uri mu Rwanda yagize n’umwanya wo guhura na Perezida Kagame baganira ku ngingo zitandukanye zirimo izijyanye n’icyorezo cya COVID-19, ibya Paul Rusesabagina uri gukurikiranwa n’inzego z’ubutabera z’u Rwanda.

Muri iki kiganiro cyagiye hanze ku wa 17 Gashyantare, Richard Quest abaza ibibazo bitandukanye Perezida Kagame, akagera n’aho abaye nk’umwibutsa ko nta mu Perezida wo Burengerazuba bw’Isi (u Burayi na Amerika) uyoboye igihe kinini nka we.

Avuga kuri iyi ngingo Richard Quest yagize ati "Nta muyobozi wo mu Burengerazuba bw’Isi wamaze ku butegetsi igihe nk’icyo umaze."

Mu kumusubiza Perezida Kagame yagize ati "Ese ibyo birandeba, umuyobozi wo mu Burengerazuba bw’Isi ni uwo mu Burengerazuba bw’Isi."

Richard Quest yahise agerageza gusobanura neza ikibazo yari abajije ati "Amatora akuraho abantu, imiterere y’amatora na Demokarasi ni uko iyo abantu bamaze kurambirwa bamusimbuza bakajya ku wundi."

Perezida Kagame mu kumusubiza yagize ati "Ibyo ni igihe wenda waba ushaka kumbwira uti urabibona buri wese agomba kujyana n’ibyo abo mu Burengerazuba bw’Isi batubwira gukora, ntabwo ndi umwe muri abo bantu. Isi yo mu Burengerazuba ni Isi ukwayo, bafite ibintu byinshi byiza bakora, ifite ibintu bibi byinshi bakora."

Aha Richard Quest yabaye nk’uwongera gusobanura ati "Nta muyobozi watowe binyuze muri demokarasi kandi akemera demokarasi wamaze ku butegetsi igihe nk’icyo umaze."

Perezida Kagame mu kumusubiza yamubwiye ko igisobanuro cya Demokarasi kidatangwa n’Abanyaburayi n’Abanya-Amerika.

Ati "Igisobanuro cya Demokarasi ntigitangwa n’Uburengerazuba bw’Isi, oya niba isobanurwa nabo, none uku kwivuguruza kuba mu Burengerazuba kwaba ari iki, aho tubona ibihugu byo mu Burengerazuba bw’Isi bitora abayobozi babyo ubundi bagahindukira bagatangira kwijujutira b’abayobozi batoye."

"Uri kumbwira ko Demokarasi igira umwihariko haba mu Burengerazuba cyangwa ahandi aho ariho hose ku Isi ariko sinshobora kubaho ngendera ku mwihariko wo mu Burengerazuba bw’Isi."

Ni kenshi Perezida Kagame yagiye yumvikana anenga uburyo ibihugu byo mu Burayi na Amerika byumva ko bigomba kugena ibikorwa muri Afurika nubwo byaba bihabanye n’ugushaka kw’abaturage babyo.

Mu kiganiro yagiranye na RBA ku wa 31 Ukuboza 2019 yavuze ko demokarasi nyayo ari ishingiye ku ndangagaciro z’abenegihugu, ashimangira ko politiki igihugu kigenderaho ikwiye kugenwa hagendewe ku muco n’ibibazo igihugu gifite n’icyerekezo cy’aho gishaka kugana, kuruta kugendera ku yo abandi bantu bagennye.

Perezida Kagame yavuze ko igisobanuro cya Demokarasi kidakwiye gutangwa n'abo mu Burengerazuba bw'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .