Kwamamaza

Ibyo PSD yishimira ni byinshi mu iterambere ry’u Rwanda – Biruta

Yanditswe kuya 9-10-2016 saa 10:41' na Ntakirutimana Deus


Perezida w’Ishyaka riharanira Demokarasi n’Imibereho myiza y’abaturage(PSD) Dr Vincent Biruta, asanga mu myaka 25 iryo shyaka rimaze ryaragiye rigira uruhare mu mpinduka zitandukanye mu bya politiki no kubaka iterambere ry’igihugu.

Dr Biruta yabigarutseho mu nama ya Biro politiki yaryo yateranye ku wa Gatandatu tariki ya 8 Ukwakira 2016.

Yavuze ko PSD yagiye igira abayobozi batandukanye bagize imyanya yo hejuru mu buyobozi bukuru bw’igihugu, kugeza ubwo rigiriwe icyizere umwe mu bayoboke baryo akagirwa Minisitiri w’Intebe.

Biruta ati “Ibyo twakwishimira ni byinshi kuko mu gihe cy’ imyaka 25 rimaze rishinzwe [PSD], usibye ibitekerezo ishyaka ryagiye ritanga biciye muri manifesto yaryo, biciye no mu gihe cyo kwamamaza abakandida bacu mu matora atandukanye, ryagize uruhare mu nzego zitandukanye cyane cyane nyuma ya Jenoside.”

Yavuze ko PSD yagize abadepite mu nteko ndetse n’Abasenateri mu gihe urwego rwa Sena rwamaraga kujyaho, ndetse n’abayobozi muri guverinoma uko zagiye zisimburana.

Ati “Uyu munsi umuyoboke wa PSD niwe uyoboye guverinoma, Minisitiri w’Intebe. Ibyo byose byaduhaye uburyo butandukanye bwo kubaka iki gihugu, cyane cyane kongera kugisana nyuma ya jenoside . Ibyo rwose ni ibintu byumvikana ko mu myaka 25, mu bihe bitandukanye twagiye tugira uruhare kugira ngo iki gihugu cyiyubake kandi turacyakomeza.”

Mu rwego rwo kwishimira imyaka 25 iryo shyaka rimaze ritanga umusanzu waryo muri politiki y’u Rwanda, PSD itareganya kwizihiza yubile y’iyo myaka mu mwaka utaha, aho izanamurika igitabo kivuga ku mateka yayo.

Iri shyaka kandi ryagiye rihatanira imyanya irimo n’uwa Perezida wa Repubulika mu matora yabaye muri 2010 aho ryari ryatanze Dr Ntawukuriryayo Jean Damascene, mu gihe muri 2003 ryari ryashyigikiye umukandida wari watanzwe na FPR Inkotanyi. Mu matora ateganyijwe muri 2017 ryamaze gufata umwanzuro ko rizatangamo umukandida.

Ishyaka PSD ryashinzwe mu mwaka wa 1991 mu nkundura y’amashyaka menshi, nyuma y’inama yabereye i Baume mu Bufaransa, ubwo Perezida François Mitterand wayoboraga icyo gihugu muri icyo gihe yasabaga Habyarimana Juvenal wari Perezida w’u Rwanda kwemera ko mu Rwanda hashingwa amashyaka menshi mu rwego rwo kwimakaza demokarasi, yakwanga agahagarikirwa inkunga.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved