00:00:00 IGIHE NETWORK KN KINYARWANDA EN ENGLISH FR FRANCAIS

Ibyo kwitega kuri Minisiteri y’Ubumwe bw’Abanyarwanda yahawe ubuyobozi

Yanditswe na Akayezu Jean de Dieu
Kuya 7 Nzeri 2021 saa 02:06
Yasuwe :
0 0

Dr Bizimana Jean Damascène ku wa Mbere tariki 6 Nzeli 2021, yarahiriye kuyobora Minisiteri y’Ubumwe bw’Abanyarwanda n’Inshingano Mboneragihugu, yandika amateka yo kuba ari we wa mbere uyoboye iyi Minisiteri ibayeho ku nshuro ya mbere kuva u Rwanda rwabaho.

Iyi minisiteri nshya yashyizweho ku wa 14 Nyakanga mu gihe ku wa 31 Kanama, Umukuru w’Igihugu yagennye Dr Bizimana Jean Damascène nka minisitiri wa mbere ugiye kuyiyobora.

Ni Minisiteri benshi mu Banyarwanda n’abasesengura ibya politiki muri rusange , bagaragaza ko ifite akazi gakomeye ko komora ibikomere by’amateka mabi igihugu cyanyuzemo, ndetse ikanarushaho gukora ubushakashatsi ku mayeri yose akoreshwa mu gusenya ubumwe bw’Abanyarwanda.

Ubwo yari amaze kurahirira inshingano zo kuyobora iyi minisiteri, Dr Bizimana yavuze ko n’ubwo yari itaratangira ariko kuva yashyirwaho, icyahise gikurikiraho cyari ugutegura uko izakora, ibijyanye n’inshingano zayo ndetse n’ibindi bya ngombwa.

Ati “Minisiteri ntabwo navuga ko yari yaratangiye gukora nyirizina ariko kuva aho imaze gushyirirwaho hatangiye ibikorwa byo gutegura uko yazakora, inshingano zayo, imiterere yayo, ubu hari ibimaze kugerwaho, kimwe ni uko izaba ifite mu nshingano gutegura politiki zijyanye n’ubumwe n’uburere mboneragihugu.”

Yakomeje agira ati “Ariko inakurikirane ishyirwa mu bikorwa ry’iyo politiki. Ubundi hari Minisiteri zitegura politiki ubundi hakagira inzego ziyishamikiyeho zishinzwe gushyira mu bikorwa, iyi yacu ariko izagira ububasha bwo gutegura politiki ariko yo ubwayo inazishyire mu bikorwa.”

Yavuze ko n’ubwo aribo bazashyira mu bikorwa iyi politiki ariko bazafatanya n’izindi nzego zirimo n’imiryango itari iya leta, amadini, imiryango nterankunga n’abandi bafatanyabikorwa batandukanye.

Inzego zari zakoraga inshingano z’iyi Minisiteri biragenda bite?

Nubwo hari izindi nzego zizakorana bya hafi na Minisiteri y’Ubumwe bw’Abanyarwanda n’Inshingano Mboneragihugu, biteganyijwe ko izahuriza hamwe inshingano zari zifitwe na Komisiyo y’Igihugu Ishinzwe kurwanya Jenoside (CNLG) n’iza Komisiyo ishinzwe Ubumwe n’Ubwiyunge.

Ni mu gihe kandi ibijyanye n’inshingano mboneragihugu byakorwaga na Komisiyo y’Itorero ry’Igihugu.

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène kandi mu kiganiro yagiranye na RBA, yavuze ko hazasesengurwa igikwiye gukorwa ku bijyanye n’izo nzego zari zisanzwe zikora izo nshingano.

Ati “Ariko icy’ingenzi ni ukuvuga ko hazashyirwa imbaraga mu kureba […] inzego n’ubundi zari zifite ibyo zagezeho, haba mu bijyanye no kurwanya Jenoside n’ingengabitekerezo yayo, gukumira Jenoside, ubumwe n’ubwiyunge bw’Abanyarwanda, kwigisha guhugura indangagaciro z’umuco Nyarwanda n’ibindi. Hari ibyagezweho.”

Yakomeje agira ati “Ariko hakenewe imbaraga nyinshi mu buryo bwo guhuza no kugira ngo ahagaragara intege nkeya tubashe kuziba icyo cyuho. Kugira ngo ubufatanye burusheho gutanga umusaruro uko byakabaye bimeze, hakwiye ubufatanye bw’Abanyarwanda n’amahanga muri rusange.”

Iyi Minisiteri y’ubumwe bw’Abanyarwanda n’Inshingano Mboneragihugu igiyeho mu gihe mu myaka 10 ishize, igipimo cy’ubwiyunge mu Rwanda cyakomeje kuzamuka kiva kuri 82% muri 2010 kigera kuri 92.5% muri 2015.

Ni mu gihe ubushakashatsi bwa Komisiyo y’Igihugu y’Ubumwe n’Ubwiyunge buheruka muri 2020 bwerekana ko igipimo kigeze kuri 94.7%.

Umuco n’Amateka bizahabwa umwihariko

Akenshi mu bihugu byateye imbere nka za Korea, u Buyapani, u Bushinwa ndetse n’ahandi usanga byarabanje gushimangira amateka yabyo , abaturage babyo bakayamenya, bakayasobanukirwa neza ndetse bakajya bayagenderaho bubaka imbere hazaza.

Ikindi kintu cy’ingenzi kandi usanga gituma igihugu gikomera kigatera imbere imyaka myinshi, ni ‘Umuco’. Umuco abenegihugu bibonamo, bashyigikiye, bakunda, baharanira kandi bafatanyiriza hamwe kuwurinda.

Minisitiri Dr Bizimana ati “Kimwe mubyo numva bikenewe tuzakomeza gushyiramo imbaraga, ni ukureba uko amateka y’u Rwanda yatumye ubumwe bw’Abanyarwanda busenyuka kuko bufite icyabusenyuye.”

Yakomeje agira ati “Ibyo ni ngombwa rero ko ayo mateka asuzumwa, akandikwa, akigishwa ku buryo buhagije, tukagira amateka y’igihugu, yanditse, azwi, atari amateka avangavanze cyangwa se afite uko yagiye agorekwa nk’uko twahuye nabyo. Aho tuzinjira no mu bushakashatsi.”

Minisitiri Dr Bizimana yavuze kandi ko Abanyarwanda bari mu mahanga nabo bazahabwa umwihariko, aho kuri ubu hari ibiganiro byatangiye mu byiciro bitandukanye, baba abari mu Rwanda no mu mahanga.

Ati “Kugira ngo tunarebe ibyo Abanyarwanda bo mu byiciro bitandukanye bategereje kuri iyi minisiteri. Ibyo bitekerezo baduha biradufasha kumenya icyo Abanyarwanda badutegerejeho ndetse n’inshuti z’u Rwanda kugira ngo za nshingano zize zihuye n’ibyo Abanyarwanda bifuza.”

Izindi nshingano zikomeye iyi Minisiteri ifite ni izijyanye no gukomeza komora ibikomere byasizwe n’amateka ya Jenoside yakorewe Abatutsi mu 1994, kuko ibyo bikomere bikigaragazwa nk’ibibangamira urugendo rw’ubumwe n’ubwiyunge.

Ni mu gihe ubushakashatsi bwa 2020 ku gipimo cy’ubwiyunge mu Rwanda buheruka bwerekana ko abantu 27% basanga ibikomere bikomoka ku mateka y’ivangura n’amacakurubiri na jenoside yakorewe abatutsi u Rwanda rwanyuzemo ari byo nzitizi nyamukuru mu rugendo rw’ubumwe n’ubwiyunge.

Minisitiri w'Ubumwe bw'Abanyarwanda n'Inshingano, Mboneragihugu Dr Bizimana Jean Damascène, yarahiriye kuyobora iyi minisiteri ishyizweho bwa mbere mu Rwanda
Minisitiri Dr Bizimana ubwo yari amaze kurahirira inshingano nshya yafashe ifoto y'urwibutso na Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .