Ibyitezwe ku ruzinduko rw’iminsi itatu rwa Perezida Patrice Talon wa Bénin mu Rwanda

Yanditswe na Philbert Girinema
Kuya 29 Kanama 2016 saa 09:55
Yasuwe : XX
0

Nyuma y’isozwa ry’inama ya gatandatu yahuzaga u Buyapani na Afurika yaberya i Nairobi muri Kenya (TICAD VI), Perezida Patrice Talon wa Bénin wari wayitabiriye arakomereza urugendo rwe i Kigali, mu ruzinduko rw’akazi biteganyijwe ko rumara iminsi itatu.

Itangazo ryashyizwe ahagaragara n’Umunyamabanga Mukuru wa Minisiteri y’Ububanyi n’Amahanga n’Ubutwererane muri Bénin, Ambasaderi Marc Hermanne Arabas, rivuga ko kuva kuri uyu wa Mbere tariki 29 kugeza kuwa 30 Kanama 2016, Perezida Patrice Talon araba ari i Kigali.

Rivuga ko ari uruzinduko rugamije guteza imbere ubufatanye bw’ibihugu byombi kandi butanga umusaruro kuri buri gihugu.

Rikomeza rigira riti ‘‘Ruraba umwanya wo kongera imbaraga umubano w’ubucuti n’ubuhahirane usanzwe hagati y’u Rwanda na Bénin, no kwemeranya ku buryo bushobora gutuma ukoreshwa mu nzego zinyuranye.’’

‘‘Uruzinduko rwa Perezida Patrice Talon ruzaba amahirwe yo kurebera hamwe ibintu bitanga inyungu ku bihugu byombi no kurebera hamwe ibijyanye n’amategeko n’uburyo bw’imikorere mu guha isura nshya umubano hagati y’u Rwanda na Bénin, harimo n’isinywa ry’amasezerano hagati y’impande zombi.’’

Perezida Patrice Talon watangiye kuyobora Benin kuva kuya 6 Mata 2016 biteganyijwe ko mu Rwanda azasura Ikigo cy’Igihugu gishinzwe Iterambere, RDB, ndetse akazanagera mu gace kahariwe inganda kazwi nka Special Economic Zone.

Perezida Talon wari usanzwe ari umucuruzi ukomeye mbere yo kwinjira muri politiki, afatwa nk’ ‘Umwami w’Ipamba’ kubera uruhare rwe mu guteza imbere inganda ziritunganya mu gihugu.

Ipamba muri Benin ryihariye 40% by’amafaranga yinjira mu gihugu avuye mu byoherezwa hanze na 12% by’umutungo mbumbe w’igihugu ndetse 60% by’inganda mu gihugu ziraritunganya.
Perezida Talon yagiye ku butegetsi muri werurwe 2016 asimbuye Thomas Boni Yayi, muri ayo matora yatsinze Lionel Zinsou ku majwi 65% mu gihe uwo bari bahanganye yagize 35%.

Uretse abakuru b’ibihugu baheruka kwitabira inama y’Umuryango w’Ubumwe bwa Afurika muri Nyakanga, Patrice Talon abaye Umukuru w’Igihugu uje mu Rwanda mu 2016 nyuma ya Dr John Pombe Magufuli wa Tanzania, Ismaïl Omar Guelleh wa Djibouti, Joseph Kabila wa RDC na Idris Deby Itno wa Tchad.

Perezida Talon aragenderera u Rwanda ku nshuro ye ya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza