Ibyishimo ku bahinduriwe ubuzima n’umushinga uteza imbere ubuhinzi bw’imboga n’imbuto

Yanditswe na Muhonzire Sylvine
Kuya 29 Mutarama 2021 saa 01:27
Yasuwe :
0 0

Abahinzi bakorana n’umushinga uteza imbere ubuhinzi bw’imboga n’imbuto mu turere twa Bugesera, Gasabo, Kayonza na Rwamagana barishimira intambwe bamaze gutera mu gihe cy’umwaka umwe bafashwa mu kongera umusaruro no kuwushakira amasoko.

Uyu mushinga uterwa inkunga n’Umuryango w’Ubumwe bw’u Burayi binyuze mu kigega cyawo gishinzwe iterambere (EUDF), ugashyirwa mu bikorwa n’Umuryango Nyafurika w’Ivugabutumwa, AEE Rwanda ufatanyije n’Umuryango mpuzamahanga witwa Tearfund, ndetse n’umuryango witwa FCI (Farm Concern International).

Uyu mushinga ugamije gufasha abahinzi kubona umusaruro mwiza, mwinshi kandi ukenewe ku isoko no kwiteza imbere. Abafashwa muri uyu mushinga bahinga urusenda, inanasi, gaperi, ibitunguru, tungurusumu, amashu atukura, imiteja ndetse na shufuleri.

Bahuzwa n’ababagezaho imbuto z’indobanure, amafumbire n’imiti, ndetse n’abaguzi b’umusaruro wabo.

Urayeneza Emelyne uhinga imiteja mu Karere ka Gasabo mu Murenge wa Gikomero, yavuze ko ataratangira gukorana n’uyu mushinga yahingaga ntabone isoko, ariko aho amariye gukorana nawo umufasha kubona amasoko.

Yavuze ko yacuruzaga ibyo yahinze ari uko yikoreye ku mutwe akabijyana ku isoko, ariko ubu asigaye yoroherezwa kubona abagura umusaruro we.

Yagize ati “Uyu mushinga ntarawuzamo, twarahingaga ariko ntitugire isoko, tugahinga buri wese atwara ku mutwe we ajyana ku masoko aciriritse, ariko uyu mushinga waje utuzaniye ibihingwa bifite isoko batuzanira n’ababasha kuduha amasoko.”

Yavuze ko aho uyu mushinga waziye asigaye abona inyungu y’amafaranga akubye inshuro eshanu z’ayo yajyaga abona ataratangira gukorana nawo.

Ati “Mu mwaka ndateganya kuzaba mfite 1 000 000 Frw yanjye kuri konti nkesheje uyu mushinga kubera ko wanzaniye isoko ukananyereka ubuhinzi bwagutse uko bukorwa, cyane ko banatwigisha guhinga neza kijyambere.”

Murerehe Donatha uhinga urusenda yavuze ko ataratangira gukorana n’uyu mushinga yahingaga bitari ibya kinyamwuga adafite n’abagura umusaruro w’ibyo yahinze.

Yavuze ko uyu mushinga umaze kugera mu gace atuyemo, wababwiye ko bakwiye guhinga ibihingwa bikenewe ku isoko maze we n’abandi bagore 25 bishyira hamwe batangira guhinga urusenda, ndetse kugeza ubu barukuramo agatubutse.

Ati “Ubu aho tugeze ni heza, ubuhinzi turi gukora uyu munsi buraduhesha amafaranga kandi atubutse, mbere nubwo twahingaga, twahingaga bitari ibya kinyamwuga tudafite n’amasoko. None ubu turahinga tukabona abaguzi, barimo Lotec Rwanda, n’abandi. uyu munsi tubasha kugemura mu mahanga.”

Murerehe yishimira cyane iterambere amaze kugeraho, kuko mbere yinjizaga ibihumbi 30 Frw ariko ubu ngo asigaye yinjiza ibihumbi 200 Frw mu gihembwe cy’ihinga.

Uyu mushinga uzamara imyaka itanu. Mu gihe cy’umwaka, ukorana n’abahinzi 8 110, bakorera mu matsinda y’abantu 20, ndetse barateganya kubongera kugeza ku bahinzi ibihumbi 30.

Tearfund niyo ihagarariye imiryango ishyira mu bikorwa uyu mushinga, aho ihuza abafatanyabikorwa bandi (FCI na AEE Rwanda) ikarebera hamwe imbogamizi n’uburyo zakemuka nk’uko twabitangarijwe na Jolie Murekatete, umuyobozi w’uyu mushinga muri Tearfund.

AEE Rwanda yo ifasha abahinzi mu rugendo rwabo rw’ubuhinzi, kuva ku kubasha gutegura ubutaka, kubona imbuto kugeza igihe umusaruro ubonekeye, naho FCI ikabafasha kubahuza n’amasoko abagurira ibyo bejeje.

Umuyobozi w’ibikorwa by’uyu mushinga muri AEE Rwanda, Simeon Uwiringiye, yavuze ko yishimira urwego bamaze kugeraho, kuko usibye n’amasoko yo mu gihugu hagati yiyongereye, basigaye bafite abaguzi bajyana umusaruro w’abahinzi bakorana mu muhanga.

Ati “Turahamagararira n’abandi bafatanyabikorwa benshi kuza bakareba ibyo turimo gukora, n’umusaruro mwiza abahinzi bafite […] kugira ngo bahe abahinzi bacu inyongeramusaruro n’amasezerano yo guhinga bityo bahinge ibisobanutse kandi bafite umutekano ko ibyo bazeza bitazapfa ubusa,ahubwo bazabona ababigura.”

Mu izina rya FCI mu Rwanda, Ngiramahirwe Maradona yavuze ko yishimira ibyagezweho muri uyu mushinga. Ati “Twabashije guhuza abahinzi n’abaguzi bajyana ibicuruzwa mu mahanga bagera ku munani.”

Yakomeje avuga ko mu gihe cy’umwaka abahinzi bamaze bakorana n’uyu mushinga babonye umusaruro wa toni 204 zavuye mu rusenda, inanasi, imiteja n’ibitunguru aho zinjije miliyoni 56 Frw.

Muri izo toni 30 z’urusenda zagurishijwe agera kuri miliyoni 17 Frw, ibiro 152,026 by’imiteja, birimo 14,467 byoherejwe mu mahanga, byagurishijwe agera kuri miliyoni 36 Frw, n’ibindi nk’inanasi n’ibitunguru nabyo byaragurishijwe.

Ngiramahirwe arahamagarira abaguzi b’imboga n’imbuto babijyana mu mahanga kuza bagakorana n’abahinzi bo muri uyu mushinga, bakabaha amasezerano kugira ngo abahinzi bahinge bizeye isoko.

Imihigo irakomeje

Nubwo ariko babonye umusaruro ufatika, bakomwe mu nkokora n’icyorezo cya Covid-19, ariko babasha kubyitwaramo neza bakangurira abahinzi n’abakangurambaga b’ubuhinzi kuyirinda, banabafasha kubona udupfukamunwa ndetse n’imiti isukura intoki.

Aba bahinzi kandi bafashwa n’ abakoranabushake batandukanye barimo abakangurambaga b’ubuhinzi, abahuza abahinzi n’amasoko ndetse n’abatanga amakuru ku migendekere y’ibiciro mu masoko, kandi bose bahawe ubumenyi buhagije.

Uyu mushinga urateganya gukomeza gufasha abahinzi gukora ingendoshuri, bakabubakira ibyumba byo gukonjesherezamo umusaruro wabo mu gihe bategereje abaguzi, gukora ubuhinzi hifashishijwe ikoranabuhanga, ndetse no gushishikariza urubyiruko rwiga mu mashuri y’imyuga n’ubumenyingiro (TVET) gukunda ubu ubuhinzi.

Uyu mushinga kandi urateganya gushyiraho porogaramu yitwa ‘e-Hingirisoko’ izorohereza abahinzi kumenya amakuru y’ibiciro biri ku masoko ndetse n’abaguzi kumenya umusaruro abahinzi bafite.

Uwiringiye yasoje avuga ko nk’abafatanyije uyu mushinga bishimira ubufatanye bwiza bagaragarijwe n’ubuyobozi bw’Uturere ukoreramo n’inzego zatwo kugera ku Mudugudu, ndetse n’ikigo cya Ministeri y’Ubuhinzi n’Ubworozi, NAEB kidahwema gutanga inama zijyanye n’ubu buhinzi. Yanashimiye Umuryango w’Ubumwe bw’u Burayi utera inkunga uyu mushinga.

Yakomeje guhamagarira abafatanyabikorwa babishaka kubegera kugira ngo ubu buhinzi bubashe kuba ubw’umwuga koko kandi bukiza ababukora. Ababyifuza bahamagara izi nimero: 0789364749, 0786490340, 0788546512.

Uyu mushinga wafashije abahinzi b'imboga n'imbuto
Urusenda ruri mu bihingwa bitezwa imbere n'uyu mushinga
Abahinzi b'inanasi bari mu bishimira ibyiza bagejejweho n'uyu mushinga
Aha ni mu karere ka Kayonza, hamwe mu ho uyu mushinga ukorera
Babifashijwemo n'uyu mushinga, ubuhinzi bw'urusenda bwabahinduriye ubuzima
Murerehe Donatha yemeza ko yavuye ku kwinjiza ibihumbi 30Frw agera ku bihumbi 200Frw
Simeon Uwiringiye ushinzwe gukurikirina iby'uyu mushinga muri AEE Rwanda yashimiye abawugiramo uruhare bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .