Ibyihariye kuri Mugemana umaze imyaka 23 avura abakinnyi ba Rayon Sports

Yanditswe na Manzi Rema Jules
Kuya 14 Nzeri 2018 saa 05:10
Yasuwe :
0 0

Kuva mu 1995, Mugemana Charles ni Umukozi wa Rayon Sports nk’umuganga. Ni we umaze imyaka myinshi kurusha abayobozi, abakinnyi n’abatoza bose b’iyi kipe ikomoka i Nyanza.

Si kenshi umukozi aramba ahantu akahakora imyaka irenga 20 by’umwihariko kuyimara mu ikipe nka Rayon Sports ni agashya.

Mugemana atuye mu Murenge wa Rwezamenyo akaba umuforomo wabyigiye. Afite ivuriro rye ku giti cye aho atuye kuko iyo atari mu kazi ka Rayon Sports, aba arikoramo.

Yakoze amahugurwa menshi ajyanye no kuvura abakinnyi yamubashishije kuba ari ku rwego mpuzamahanga.

Mu buzima busanzwe ni umubyeyi ubana n’abana be barimo umuhanzi kazi Queen Cha.

IGIHE yasuye Mugemana Charles umaze imyaka 23 ari umuganga w’iyi kipe atangaza byinshi byatumye abasha kumara iki gihe cyose, ibihe byiza yagizemo, ibyamubabaje n’ibindi.

Ikiganiro kirambuye na Mugemana Charles

IGIHE:Watangiye kuvura muri Rayon Sports ryari?

Mugemana: Natangiye kuvura muri Rayon Sports mu 1995. Icyo gihe twari dufite umutoza witwa Rudasingwa Longin. Umuntu waje kunsaba kuza kuvuramo ni Paul Ruhamyambuga, icyo gihe yari Perezida.

Nabitangiye ari ibintu bisanzwe, mbona ari nk’ikiraka nta n’amasezerano ngira. Si narinzi ko bizaba iby’igihe kirekire gutya.

IGIHE : Isano yawe na Rayon Sports ni uko uri umukozi wayo gusa?

Mugemana: Rayon Sports ni ikipe yanjye. Ni iy’i Nyanza hafi y’iwacu. Natangiye kuyireba ndi umwana nkura ndi umukunzi wayo bisanzwe. Nyuma ngiye kwiga, nize ibijyanye n’ubuvuzi ari nabyo byaje gutuma nyizamo nk’umukozi ariko birumvikana naranayifanaga.

IGIHE : Ni ibiki byakugoye muri uyu mwuga wo kuvura abakinnyi?

Mugemana : Kera tugitangira ntabwo abakinnyi n’abayobozi bamwe bumvaga akamaro k’umuganga mu ikipe.

Byari bigoye ko ugira umukinnyi inama ngo azikurikize. Ni ibintu byagiye biza gake gake ariko ubu barabyumva, umuganga aba afite agaciro ndetse gakomeye mu ikipe.

IGIHE: Kuki urambye muri Rayon Sports bene aka kageni? Nta yindi kipe yigeze igushaka?

Mugemana: Mu 2006 hari ikipe yitwaga Les Citadins [yahindutse AS Kigali] yigeze kunsaba ko njya kuyibera umuganga. Icyo gihe Perezida wayo yitwaga Saidi aranshaka turavugana anyemerera ibirenze ibyo nabonaga muri Rayon Sports.

Naramubwiye nti ntabwo byankundira kuko n’ubwo ndi umukozi ndi n’umufana wa Rayon Sports kandi burya umufana ntawe umugura. Ubwo rero nshobora kuba nicaye ku ntebe ya Les Citadins, Rayon Sports yatsinda igitego nkitera ibicu.

IGIHE : Mu myaka 23 uri umuganga w’abakinnyi wagiye uhura n’imvune z’ubwoko butandukanye, ni iyihe ikomeye wabonye itajya ikuva mu mutwe ?

Mugemana : Muri aka kazi nagiye mpura na byinshi, uretse no kuvunika napfushije abakinnyi.

Umukinnyi wa mbere twamupfushije mu 2003 yari myugariro wo hagati yitwa Zigabe Jean Marie.

Icyo gihe twari tuvanye muri Tunisia aza kugira uburwayi bwo mu nda, ntiyarwara igihe kinini buhita bumuhitana.

Abandi murabibuka nk’Umunyezamu wacu Mutuyimana Evaliste n’umutoza wari wungirije wanadukiniye igihe kinini, Ndikumana Hamad Katauti bitabye Imana umwaka ushize.

Ku ruhande rw’abagize imvune zikomeye harimo Umunya-Kenya witwa Cox Mule wavunitse cyane (fracture ouverte) mu 2005 kuri Stade Amahoro.

Yagiye ku Bitaro byitiriwe Umwami Faisal amarayo amezi atandatu nyuma ajya kwivuza iwabo biranga ahita areka umupira.

Icyo navuga ni uko icyo gihe ubuvuzi bwari butaratera imbere nk’uko bimeze ubu.

Ahari iyo biza kuba muri iki gihe byari gushoboka ko tumuvura kuko nyuma twagiye tugira imvuze zikomeye nk’iya Usengimana Faustin, Habimana Yousouf, Rwatubyaye n’abandi bakavurwa bagakira.

IGIHE: Hakunze kuvugwa amakuru y’abakinnyi bagira imvune bakajya kwivuza mu baganga ba gakondo, murabizi?

Mugemana: Abaganga ba gakondo ngira ngo mu Rwanda barakora mu buryo bwemewe. Gusa njye uburyo bakora ni ibintu ntafiteho ubumenyi bwinshi, nta n’abaganga gakondo tuziranye.

Abakinnyi bajyayo nabo bagenda bihishe, ntashobora kugaruka ngo akubwire ibyo yakorewe. Abo baganga nabo hari ukuntu bagira ibanga, iyo umwengereye ntabwo aba ashaka kukwereka ibyo akora neza.

Simvuze ko batavura kuko umukinnyi ashobora kujyayo akazagaruka yarakize ariko mwibuke ko niba agiye akamarayo amezi abiri, adakora imyitozo ashobora no gukizwa n’icyo kiruhuko yafashe noneho we akibwira ko ari bya bindi yakorewe bimukijije.

IGIHE: Haba hari ibihe by’akataraboneka wagiriye muri Rayon Sports ?

Mugemana: Rayon Sports yagiye ikora amateka menshi na mbere y’uko ntangira kuyikoramo n’ubu nkibuka. Gusa mu 1997 kwegukana CECAFA muri Zanzibar ni amwe mu mateka akomeye ntashobora kwibagirwa kuko icyo gihe nari naratangiye n’akazi.

Kenshi abantu bakunze kwibeshya bakavuga ko ari mu 1998 ariko ndabyibuka hari tariki 27 Ukuboza 1997.

Ibindi bihe ntashobora kwibagirwa ni shampiyona yo mu 2002. Icyo gihe twazamukanye na APR FC bigera ku mukino wa nyuma ifite amanota 62 twe dufite 60 kandi tugomba guhura ubwacu.

Ndabyibuka twakiniye kuri Stade Amahoro tuyitsinda 4-1 harimo ibitego bitatu byagiyemo mu minota 15 ya mbere. Perezida wa Repubulika, Paul Kagame, yari ahari ni nawe waduhaye igikombe.

IGIHE: Wakoranye n’abakinnyi benshi muri Rayon Sports. Dukorere 11 b’ibihe byose kuri wowe

Mugemana: Twagize abakinnyi benshi bakomeye ariko 11 b’ibihe byose kuri njye barimo:

Ndayishimiye Eric Bakame, Saidi Ndabaniwe, Ndikumana Hamad Katauti, Richard Hitimana, Kalisa Claude, Witakenge Jeannot, Thierry Hitimana, Buranga Araf, Jimmy Gatete, Cédric Amissi na Zappy Mola.

IGIHE: Ni uwuhe mutoza w’ibihe byose kuri wowe?

Mugemana: Twagize abatoza benshi beza ariko mbabwije ukuri ubu dufite umutoza mwiza cyane “Robertinho”.

Umutoza kuba mwiza njye mbifata mu buryo bubiri, kumenya kubana n’abo mukorana no kumenya gutoza.

Robertinho byose arabyujuje, mbona ari umwe mu batoza beza ikipe yagize. Abandi navuga barimo Luc Eymael, Didier Gomes da Rosa, Raoul Shungu n’abandi.

IGIHE : Kuba umukobwa wawe Queen Cha yaragukurikiye mu gufana Rayon Sports ubyakira ute?

Mugemana: Ni byiza kuko yavutse abona ndi umu-Rayon, ndi umukozi wayo, aho ageze hose akabona amafoto ya Rayon, naba ngiye kuri stade akambaza ugiye kureba uwuhe mukino nti ni uwa Rayon Sports. Mbese ibintu byose yakuze abona byabaga ari Rayon Sports.

Mugemana Charles umaze imyaka 23 avura abakinnyi ba Rayon Sports
Igitanda avuriraho abarwayi ku Ivuriro rye riri Rwezamenyo
Umudali yahawe nyuma y'uko Rayon Sports ibonye itike yo kujya mu matsinda ya CAF Confederation Cup
Amwe mu mafoto ari mu biro bya Mugemana y'urwibutso
Aha Mugemana yari kumwe n'ikipe y'igihugu Amavubi ikirimo ba Jimmy Mulisa, Karekezi Olivier, Nshimiyimana Canesius n'abandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza