Kwamamaza

Ibyaranze ingendo za Perezida Kagame i Maputo, Brazaville na Libreville

Yanditswe kuya 30-10-2016 saa 18:07' na Rabbi Malo Umucunguzi


Perezida Kagame yagarutse mu gihugu kuri uyu wa Gatandatu nyuma y’uruzinduko mu bihugu bitatu bya Afurika, birimo Mozambique, Repubulika ya Congo na Gabon, aho yagiye agirana ibiganiro birambuye na bagenzi be, Perezida Filipe Nyusi, Sassou Nguesso na Ali Bongo.

Kuwa 24 Ukwakira nibwo Perezida Kagame yatangiye uruzinduko mu bihugu bitatu byose bikora ku nyanja, ahera muri Mozambique ku meza hateguwe ingingo zirimo ubuhinzi n’uburobyi, ibikorwaremezo n’ubutabera.

I Maputo aho yari kuwa 24 na 25, Perezida Paul Kagame yunamiye intwari za Mozambique zirimo uwaharaniye ubwigenge bw’icyo gihugu, Eduardo Chivambo Mondlane.

Soma ibyaranze urugendo rwa Perezida Kagame muri Mozambique

Perezida wa Mozambique, Filipe Nyusi, nawe yasezeranyije mugenzi we w’u Rwanda Paul Kagame ko nta Munyarwanda uzava muri Mozambique ngo ahungabanye umutekano w’u Rwanda, nk’uko Minisitiri w’Ububanyi n’Amahanga w’u Rwanda, Louise Mushikiwabo, yabibwiye itangazamakuru.

Ati “Dufashe aka kanya ngo dushimire umukuru w’iki gihugu cy’inshuti, ku byo yavuze ko atazemera ko hari igikorwa na kimwe gihungabanya umutekano w’u Rwanda, kizakorwa n’Abanyarwanda baba hano muri Mozambique.”

Perezida Kagame aganira na Filipe Nyusi wa Mozambique

Haganiriwe ku buryo RwandAir yazatangira gukorera ingendo muri iki gihugu cyo mu majyepfo y’uburasirazuba bwa Afurika muri gahunda yo kwagura ingendo.

Ibitangazamakuru bitandukanye byanagaragaje ko u Rwanda rwasabye Mozambique kohereza Abanyarwanda 12 bakekwaho uruhare muri Jenoside yakorewe Abatutsi mu 1994, ndetse icyo gihugu kikaba kigicumbikiye Abanyarwanda basaga 3 000 babayo nk’impunzi.

I Brazaville

Nyuma ya Maputo, Perezida Kagame yerekeje muri Afurika yo hagati ku nyanja ya Atlantika, ahera muri Congo Brazaville aho yagiriye uruzinduko rw’amasaha 48.

Itangazo rya Minisiteri y’Ububanyi n’Amahanga ya Repubulika ya Congo, rigaragaza ko abakuru b’ibihugu byombi baganiriye ku ngingo zirimo ibibazo bishingiye ku matora muri Congo Kinshasa, umutekano muri Centrafrique n’iterabwoba ridahwema kwiyongera mu Isi.

Muri uru ruzinduko rwabaye kuwa 27 na 28 Ukwakira, Perezida Kagame na Denis Sassou-N’Guesso, baganiriye byihariye ku bufatanye hagati y’ibihugu byombi.

Iryo tangazo rivuga ko ‘‘abakuru b’ibihugu byombi bishimiye urwego rw’ubucuruzi hagati y’ibihugu byombi, by’umwihariko uko bwiyongereye hashingiwe ku ishyirwa mu bikorwa ry’imyanzuro y’inama ya kane ya komisiyo ihuriweho, yabereye i Rubavu kuva kuwa 27 kugeza kuwa 29 Nyakanga 2016.’’

Abakuru b’ibihugu biyemeje kwihutisha ubu buhahirane, kandi bugakorwa mu nyungu z’Abanyarwanda n’abaturage ba Congo.

Perezida Denis Sassou-N’Guesso yongeye gushimira Perezida Paul Kagame kubera uruhare rwe mu guteza imbere u Rwanda, anamwizeza ubufatanye mu nshingano yahawe n’ibindi bihugu bya Afurika, yo kuvugurura imikorere y’Umuryango wa Afurika Yunze Ubumwe.

Perezida Kagame nawe yamushimiye uko yashimangiye demokarasi, amahoro n’iterambere ry’ubukungu muri Repubulika ya Congo n’imbaraga ashyira mu gushakira amahoro ibindi bihugu bya Afurika.

Rikomeza rigira riti ‘‘Bashimye itangizwa rya Pasiporo Nyafurika muri Nyakanga i Kigali, mu nama ya 27 y’Umuryango w’ibihugu bigize uyu mugabane. Aba bakuru b’ibihugu bishimiye ukugaruka k’u Rwanda mu Muryango w’Ubukungu bw’Ibihugu bya Afurika yo hagati (CEEAC). Kugaruka kwarwo bizatuma akarere karushaho kwishyira hamwe.’’

Perezida Kagame na Sassou-N’Guesso baganira

Aba bakuru b’ibihugu kandi bashimye isinywa ry’amasezerano ya Pasir ku ihindagurika ry’ibihe, banizera ko inama itaha ya COP22 izabera i Marrakesh muri Maroc izashimangira intambwe yaterewe i Paris.

Bashimangiye uko bifatanyije n’ibihugu bikomeje guhura n’iterabwoba n’ubugizi bwa nabi bw’imitwe yitwaje intwaro, baniyemeza gushyira hamwe mu kubirwanya ku bufatanye bw’umuryango mpuzamahanga.

Aba bayobozi bahurije hamwe mu gusaba impande zitumva kimwe amatora muri Repubulika Iharanira Demokarasi ya Congo gukomeza ibiganiro, bagaragaza impungenge ku igaruka ry’umutekano muke muri Centrafrique, banagaragaza akamaro ko kwishyira hamwe kw’ibihugu kuzatuma Abanyafurika babasha kugenderanira bisesuye, nk’uko biteganywa na gahunda y’icyerekezo 2063 Afurika yihaye.

Libreville

Perezida Kagame yakomereje mu majyaruguru ya Brazaville muri Gabon, mu ruzinduko rwamaze amasaha 24, kuva kuwa 28 Ukwakira 2016.

Ni uruzinduko rwari rugamije kurushaho kunoza umubano usanzwe ari nta makemwa hagati y’ibihugu byombi, aho hari byinshi Gabon yari yakereye kwigira ku ntambwe u Rwanda rutera ubutitsa.

Nta wakwibagirwa ko Perezida Paul Kagame yabaye umwe mu bakuru b’ibihugu ba mbere muri Afurika bashimiye Perezida Ali Bongo Ondimba uheruka kongera gutorerwa kuyobora Gabon, ndetse mu irahira rye, Perezida wa Sena y’u Rwanda, Bernard Makuza niwe wajyanye ubutumwa bwa Perezida Kagame.

Uretse umubano n’ubuhahirane hagati y’ibihugu byombi, birashaka gushyiraho uburyo bw’ubufatanye mu iterambere ry’ubucuruzi n’ikoranabuhanga mu isakazamakuru u Rwanda rukatajemo.

Mu byaganiriwe bijyanye n’ubukungu, harimo n’imikorere ya RwandAir, ikorera ingendo i Brazaville, nka kimwe mu bimenyetso by’icyerekezo ibi bihugu bisangiye mu iterambere.

Umubano mwiza hagati y’u Rwanda na Gabon ugaragazwa n’uko muri Kamena, Madamu Jeannette Kagame yanifatanyije na Madamu Sylvia Bongo Ondimba, mu kwizihiza umunsi mpuzamahanga w’abapfakazi wari ubaye ku nshuro ya gatandatu, wizihizwa buri mwaka tariki 23 Kamena.

Perezida Kagame na Bongo baganira n'abayobozi batandukanye ku mpande zombi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved